သျှမ်းပြည်နယ် မြောက်ပိုင်း နောင်ချိုမြို့ နယ်အတွင်းနေ ဒေသခံများအား မူးယစ်ဆေးဝါးပညာပေး ဟောပြောသည့် သျှမ်းပြည်ပြန်လည်ထူထောင်ရေးကောင်စီ (RCSS) အဖွဲ့ဝင် ၆ ဦးအား တပ်မတော်မှ နှစ်ပတ်ကြာ ဖမ်းဆီးသွားသော်လည်း ယနေ့တိုင်ပြန်မလွတ်ပေးကြောင်း ပြောရေးဆိုခွင့်ကပြောသည်။

အဆိုပါ RCSS အဖွဲ့ဝင် ၆ ဦး သည် ဇွန်လ ၂၉ ရက်နေ့က နောင်ချိုမြို့နယ် ကုန်းကြီးကျေးရွာအုပ်စု ကုန်းကြီးကျေးရွာ ဘုန်းတော်ကြီးကျောင်းတွင် ဒေသခံများအား မူးယစ်ဆေးဝါး တားဆီးကာကွယ် အသိပညာပေးဆိုင်ရာ ဟောပြောနေစဉ် နောင်ချိုအခြေစိုက် တပ်မတော် ခမရ ၁၁၄ နှင့် ခမရ ၁၁၅ ပူးပေါင်းတပ် မှ ဖမ်းဆီးသွားခြင်း ဖြစ်ကြောင်းသိရသည်။

ဖမ်းဆီးခံရသည့် RCSS အဖွဲ့ဝင် ၆ ဦး ကိစ္စ နှင့် ပတ်သတ်ပြီး RCSS/SSA ၏ ပြောရေးဆိုခွင့်ရှိသူ ဒုတိယ ဗိုလ်မှူးကြီးစိုင်းဦး က “ အခုထိ ပြန်မလွှတ်သေးဘူး။ ကျနော်တို့ကတော့ ပစ်ခတ်တိုက်ခိုက်မှု ရပ်စဲရေး ဆိုင်ရာ ပူးတွဲစောင့်ကြည့်ရေးကော်မတီ (JMC-U) ကို ဖြစ်ပြီးတော့ ၂ ရက်နေ့မှာ ပြန်လွှတ်ပေးဖို့ စာတင် ထားတယ်။ ” ဟု ပြောပါတယ်။

ဖမ်းဆီးခံရသည့် RCSS အဖွဲ့ဝင် ၆ ဦး သည် မူးယစ်ဆေးဝါး ပညာပေးဟောပြောပွဲပြုလုပ်နေစဉ် RCSS စစ်ယူနီဖောင်းများ ဝတ်ဆင်ထားခြင်း မရှိသလို လက်နက်လည်း ကိုင်ဆောင်ခြင်းမရှိကြောင်း ဒုတိယ ဗိုလ်မှူးကြီး စိုင်းဦးကပြောသည်။

နောင်ချိုမြို့အခြေစိုက် တပ်မတော် ခြေမြန်တပ်ရင်း အမှတ် (၁၁၄) နှင့် (၁၁၅) ပူးပေါင်းအဖွဲ့တို့ ဖမ်းဆီးသွားသည့် RCSS အဖွဲ့ဝင် (၆) ဦးမှာ စိုင်းမောင်ထွန်း ၊ စိုင်းသန်းထွန်း (ခ) လုံးပီး ၊ စိုင်းပီး (ခ) စိုင်းဖိလစ် ၊ စိုင်းရွှေ ၊ စိုင်းအွန်ခေး (ခ) စိုင်းဟိန် နှင့် စိုင်းဆိုင်ဖ တို့ဖြစ်ကြောင်း သိရသည်။

RCSS တပ်ဖွဲ့ဝင် ၆ ဦးအား တပ်မတော်မှ ပြန်လွတ်ပေးခြင်းမရှိသည့်အပြင် နယ်မြေကျူးကျော်လှုပ်ရှားသည်ဟု ဆိုကာ စစ်အင်အားအလုံးအရင်းဖြင့် မိုင်းကိုင်မြို့နယ်အတွင်း နေ RCSS/SSA တပ်ဖွဲ့ဝင်များ အား ထိုးစစ်ဆင်တိုက်ခိုက်ခဲ့ပါသေးသည်။ နှစ်ဘက်ကြားဖြစ်ပွားသော တိုက်ပွဲကြောင့် ကျေးလက်ဒေသခံ တထောင်ကျော်နေရပ်မှ စွန့်ခွါနေရသည်။