သျှမ်းပြည်တောင်ပိုင်း လဲချားမြို့နယ် ဝမ်ထီကျေးရွာအတွင်း စစ်ဘေးရှောင် တစ်ချို့ထပ်မံ ရောက်ရှိလာပြီး စားဝတ်နေရေး ခက်ခဲနေကြောင်း စုံစမ်းသိရှိရသည်။
အဆိုပါ စစ်ဘေးရှောင်များသည် လွန်ခဲ့သည့် (၂) လခန့်က ဖြစ်ပွားသည့် ကျေးသီးမြို့နယ် လွိုင်ဟွန်း တိုက်ပွဲ ကြောင့် မိုင်းနန်း ကျေးရွာ ရှိ ဘုန်းကြီးကျောင်းတွင် နေထိုင်ကြပြီး၊ လက်ရှိမှာ ဝါတွင်း ကာလဖြစ်သဖြင့် ဘုန်းကြီးကျောင်းတွင် နေထိုင်ရန် အဆင်မပြေတော့ကြောင်း၊ ထို့ကြောင့် လဲချားမြို့ပေါ် ထပ်မံရှောင်လာရ ကြောင်း သိရသည်။
“ သူတို့ပြေးတာ အခုမှ ပြေးတာမဟုတ်ဘူး။ လွန်ခဲ့တဲ့ ၁ လ ၂ လ လောက်ကတည်းက ထွက်ပြေးကြတာ။ တစ်ချို့လည်း ခုချိန်ထိ အိမ်မပြန်နိုင်သေးဘူးပေါ့နော်။ ပြန်ရင်လည်း လုံခြုံမှု မရှိဘူးလို့ သူတို့ ထင်တယ်။ ဒါကြောင့် ဝမ်ထီမှာ နေဖို့ဆုံးဖြတ်လိုက်တယ်။ အခြေအနေကောင်းရင်တော့ ပြန်မယ်။ ” ဟု သွားရောက်ကူညီပေးနေသည့် အမျိုးသား တစ်ဦး ကပြောသည်။
လက်ရှိ ဝမ်ထီကျေးရွာ အတွင်း ရောက်ရှိနေသည့် စစ်ရှောင် (၆၀)ကျော် အတွက် ကျေးရွာ မှ နေထိုင်စရာပေးသွားမည်ဖြစ်ကြောင်း လက်ရှိမှာ စာသင်ကျောင်း အဟောင်းတွင်သာနေထိုင်ရပြီး အစားအသောက်၊ အနေအထိုင်း ခက်ခဲနေကြောင်း သိရသည်။
“သူတို့ခုနေထိုင်တာက စာသင်ကျောင်းအဟောင်းမှာနေတယ်။ အမိုးတွေလည်း မကောင်းတော့ဘူး။ တစ်ချို့ကလည်း ထော်လဂျီပေါ် အိပ်ကြတာ။ အနေအထိုင်တွေ အခက်ခဲဖြစ်နေတယ်” ဟု သွားရောက်ကူညီပေးနေသည့် အမျိုးသား တစ်ဦး ကပြောသည်။
လွန်ခဲ့သည့် ဇွန်လဆန်းပိုင်းတွင် သျှမ်းတပ် (၂)တပ် သည် လွိုင်ဟွန်းတောင်ကြောတလျောက် တိုက်ပွဲဖြစ်ပွားခဲ့ပြီး ထိုအနီးဝန်းကျင်နေထိုင်သည့် ပြည်သူများသည် ယနေ့ချိန်ထိ နေရပ်မပြန်ရဲကြကြောင်း သိရသည်။
လဲချားမြို့နယ် ဝမ်ထီကျေးရွာမှာ ရွာသစ်လာရောက်ထူထောင်သည့် (ဝမ်မိုင်တင်းလီ) ရွာသစ် နှင့် ယခု လက်ရှိ ထပ်မံရောက်ရှိလာသည့် စစ်ရှောင်များသည် ဝမ်ထီကျေးရွာ ဒေသခံ များနှင့် အတူ နေထိုင်သွားမည့် ရှိကြောင်းသိရှိရသည်။
လွိုင်ဟွမ်းတိုက်ပွဲကို အကြောင်းပြုပြီး သျှမ်းတပ် (၂) တပ်တိုက်ပွဲကြောင့် စစ်ဘေးရှောင်များ ထောင်ဂဏန်း ထွက်ပြေးတိမ်းရှောင်နေရပြီး လက်ရှိမှာ နေရပ်သို့ ပြန်သွားကြပြီဖြစ်ကြောင်း သိရသည်။
ယမန်နေ့ သြဂုတ် (၁၁) ရက်နေ့တွင်လည်း သီပေါမြို့နယ် နမ့်လမ်ဒေသအနီးရှိ ဝမ်ကောင်းနှင့် လွယ်လုံရွာကြားမှာ သျှမ်းတပ် (၂) တပ် တိုက်ပွဲဖြစ်ပွားခဲ့ပြီး ရက်သားကလေးအပါအဝင် ဒေသခံ (၃၀၀) ကျော် ထွက်ပြေးတိမ်းရှောင်နေရသည်။
