သျှမ်းပြည် တောင်ပိုင်း ပင်လောင်းမြို့တွင် သြဂုတ်လ ၁၁ ရက်နေ့ တစ်ရက်တည်းအတွင်း ကိုဗစ် – ၁၉ ပိုးတွေ့ လူနာများ အများဆုံး စံချိန်တင် စစ်ဆေးတွေ့ရှိခဲ့ကြောင်း သိရသည်။
ပင်လောင်းမြို့အတွင်းတွင် ကိုဗစ် – ၁၉ ရောဂါရှိ/မရှိ လာရောက်စစ်ဆေးသူ ၃၂၈ ဦး အနက် ၁၁၇ ဦးကို RDT ဖြင့် စစ်ဆေးပြီး ၂၁၁ ဦးကို PCR ဖြင့် စစ်ဆေးရာ ၁၂၅ ဦးတွင် ကိုဗစ် – ၁၉ ရောဂါပိုး စစ်ဆေး တွေ့ရှိရပြီး တစ်ရက်တည်း အတွင်း ပိုးတွေ့လူနာ အများဆုံး စံချိန်တင် စစ်ဆေးတွေ့ရှိရကြောင်း သိရသည်။
“ဟုတ်ပါတယ် ဒီနေ့ ပင်လောင်းမြို့ထဲမှာ ပိုးတွေ့သူ ၁၀၀ ကျော်ပါတယ်၊ ၁၂၅ ဦးလို့တော့ စာရင်းအရ သိရပါ တယ်၊ အဲ့ထဲမှာ KBZ ဘဏ်ဝန်ထမ်း ၁၃ ဦးပါတယ်၊ တီကျစ်လျှပ်စစ်ရုံးက လုပ်သား ၁၀ဦးနဲ့ တီကျစ်မှာလည်း တော်တော်များများတွေ့ရတယ်၊ ကျန်တာကတော့ ရွာထဲက နဲ့ ရပ်ကွက်ထဲ က သူတွေဆီမှာ လည်း ပိုးတွေ့ရှိ ရတယ်” ဟု ပင်လောင်းမြို့ ကျန်းမာရေး တာဝန်ရှိတစ်ဦးက ပြောသည်။
လက်ရှိတွင် ပင်လောင်းမြို့နယ် အတွင်း ကိုဗစ် – ၁၉ ရောဂါကူးစက်ပျံ့ပွားမှုများသည် ဒေသတွင်း ကူးစက်မှု များဖြစ်နေသဖြင့် ပြည်သူများ ကျန်းမာရေ အထူးဂရုစိုက်စေလိုကြောင်းနှင့် အရေးကြီးကိစ္စများ မရှိပါက အပြင်မထွက်စေလို ကြောင်းလည်း ပရဟိတ လုပ်ဆောင်နေသူ အသက် ၂၂ အရွယ် အမျိုးသား တစ်ဦးက သျှမ်းသံတော်ဆင့်ကို ပြောသည်။
“အခုဆို ပိုးတွေ့လူနာများက အရမ်းများပြားလာပါတယ်၊ ကျနော်တို့ ပရဟိတသမားတွေကလည်း တတ်နိုင် သလောက် ဝင်လုပ်တယ်၊ ကျန်းမာရေး ဖက်ကလည်း တတ်နိုင်သလောက်ကုသပေးနေကြတယ်၊ ပြည်သူ များကလည်း သတ်မှတ်ထားတဲ့ ကိုဗစ် စည်းကမ်းချက်တွေကို လိုက်နာ ဆောင်ရွက်ပေးမယ်ဆိုရင် ကျနော်တို့ ကျော်ဖြတ်နိုင်မှာပေါ့နော်” – ဟု ၎င်းက ပြောသည်။
လက်ရှိတွင် ပင်လောင်းမြို့နယ်တွင် ကိုဗစ် – ၁၉ တတိယလှိုင်းအတွင်း အတည်ပြုလူနာ စုစုပေါင်း ၅၈၂ ဦး ရှိနေပြီး ယနေ့ သြဂုတ်လ ၁၁ ရက်နေ့ အတွင်း ရောဂါသက်သာပျောက်ကင်းပြီး ဆေးရုံဆင်းခွင့်ရှိသူ ၇ ဦးရှိကြောင်းလည်း သိရသည်။
