သျှမ်းတောင် တောင်ကြီးခရိုင် ညောင်ရွှေမြို့နယ် အင်းလေးဒေသတွင် ကိုဗစ်ကူးစက်ခံရမှု မြင့်တက်နေပြီး သေဆုံးသူများလည်း နေ့စဉ်ရှိနေသေးကြောင်း စုံစမ်းသိရသည်။

ညောင်ရွှေမြို့နယ်အတွင်း ကိုဗစ်ကူးစက်လူနာ (၁၃၀၀)ကျော် ရှိနေပြီး အများစုမှာ ကျေးရွာတွင် နေထိုင်သူများနှင့် အင်းလေးဒေသမှဖြစ်ကြောင်း ဒေသခံများထံမှ သိရသည်။

“ကိုဗစ်ပိုး ကူးစက်ခံရတာက မြို့ပေါ်မှာထက် အင်းလေးထဲမှာဆို ပိုများတယ်၊ အခြားကျေးရွာတွေမှာလည်း နေ့တိုင်းကို ကူးစက်ခံနေရတာ၊ ကိုဗစ်ကြောင့် သေဆုံးသူတွေလည်း ရှိနေတယ်” ဟု ပရဟိတဆောင်ရွက်နေသည့် ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

အင်းလေးဒေသအပါအဝင် ကျေးရွာများတွင် အဝင်အထွက် ကန့်သတ်ထားသော်လည်း ကိုဗစ်ကူးစက်ခံရသူ မြင့်တက်နေဆဲဖြစ်ကြောင်း သိရသည်။

ထို့အပြင် ရောဂါလက္ခဏာမပြသော်လည်း ကိုဗစ်ရောဂါပိုး ကူးစက်ခံနေရသူများ ရှိနေသဖြင့် ဒေသခံများ ပိုပြီး သတိထားသင့်ကြောင်း အင်းလေးဒေသမှ ဆရာဝန်တစ်ဦးက တိုက်တွန်းထားသည်။

“အနံ့လည်းရတယ်၊ ကျန်းမာရေးလည်းကောင်းတယ် ဆိုပေမယ့် ပေါ့ပေါ့ဆဆနေလို့ မရဘူး၊ ကိုဗစ်ရောဂါလက္ခဏာမပြပဲ ကိုဗစ်ပိုး ရှိနေတဲ့သူတွေ မကြာခဏ တွေ့နေရတယ်၊ ပြီးတော့ ကျေးရွာမှာ နေတဲ့သူ ဖြစ်နေတာဆိုတော့ ပိုပြီး သတိထားသင့်တယ်” ဟု အဆိုပါ ဆရာဝန်က ပြောသည်။

ဖျားနာခြင်း၊ ချောင်းဆိုးခြင်း၊ အတည်ပြုလူနာနှင့် ထိတွေ့ခြင်း မရှိသည့်အပြင် Tast Kit ဖြင့် စစ်ဆေးမှုတွင် Negative ထွက်ထားသော်လည်း PCR စက်ဖြင့် ထပ်မံစစ်ဆေးရာတွင် Positive ထွက်နေသည့် လူနာလည်း ရှိနေကြောင်း သိရသည်။

Stay at home သတ်မှတ်ထားသည့် ညောင်ရွှေမြို့နယ်တွင် သြဂုတ်လ (၁၀)ရက် ယမန်နေ့အထိ အတည်ပြုလူနာ (၁၃၀၈)ဦး၊ သေဆုံးသူ (၅၁)ဦး ရှိပြီး ဆေးရုံဆင်းခွင့်ရသူ (၈၅၅)ဦးရှိကြောင်း သိရသည်။