သျှမ်းပြည် အရှေ့ပိုင်း တာချီလိတ်မြို့တွင် ယခုရက်ပိုင်း မိုးသည်းထန် ရွာသွန်းမှုကြောင့် ယနေ့( သြဂုတ် ၁၁ )မနက်ပိုင်းတွင် ရပ်ကွက် တချို့ ရေကြီးရေလျှံမှု ဖြစ်ပွားကာ နေအိမ်ထဲထိရေဝင်ကြောင်း စုံစမ်းသိရှိရသည်။
မိုးသည်းထန်ရွာသွန်းမှုကြောင့် တောင်ကျချောင်းရေးနှင့်အတူ တာချီလိတ်မြို့ ဝမ်ကောင်းရပ်ကွက်၊ မြို့တွင် မယ်ဆိုင်ချောင်းအနီး တာလော့ရပ်ကွက် တွင် ရေကြီးရေလျှံမှု ဖြစ်ပွားခဲ့ပြီး၊ ရွှံ့ရေများသည် နေအိမ်ထဲထိ ဝင်ရောက်ကာ ပစ္စည်းများပျက်ဆီး ဆုံးရှုံးကြောင်း တာချီလိတ်မြို့ ဒေသခံတဦး သျှမ်းသံတော်ဆင့်ကို ပြောသည်။
“ မိုးရွာပြီး ရွှံတွေပါလာတယ်။ တာလော့ရပ်ကွက်ဖက်ဆို ရွှံတွေဝင်နေတယ်လို့ပြောတယ်။ တချို့နေအိမ်နိမ့်တဲ့သူကိုတော့ ပျက်ဆီးတာတွေတော့ရှိတာပေါ့။ ခုချိန်ထိမိုးက မည်းနေသေးတယ်။ ထက်ရွာလာရင်တော့ ဒုက္ခဘဲ။” ဟု တာချီလိတ်မြို့ဒေသခံ ဦးသိန်းထွန်းက ပြောသည်။
တာချီလိတ်မြို့ မိုးရေကြီးမှုသည် နှစ်စဉ်ဖြစ်လေ့မရှိကြောင်း၊ ယခုလိုမိုးကြီးမှုသည် တောင်ကျရေနှင့်အတူ သစ်တောပြုန်းတီမှုနှင့်လည်း သက်ဆိုင်မှုရှိနေကြောင်း ဦးသိန်းထွန်းက ဆိုသည်။
“ ဒီမှ ၂ နှစ်တကြိမ်မိုးကြီးတယ်။ ဒီနှစ်ကတော့ ဒီနေ့ပထမဆုံးမိုးကြီးတာ။ တောင်ကျရေနဲ့ပေါ့ ပြီးတော့ ခုက သစ်တော ဖြုန်းတီးလာတယ်လေ။ ရာသီဥတုက ဖောက်ပြန်လာပြီ။” ဟု ဦးသိန်းထွန်းက ဆိုသည်။
ထိုအပြင် နမ့်ချောင်းဘေးရှိ မြို့နယ်အကောက်ခွန်ရုံးအတွင်းလည်း ရေကြီးရေလျှံမှုဖြစ်ပွားခဲ့ကြောင်း သိရသည်။
Leave a Comments