သျှမ်းပြည်မြောက်ပိုင်း လားရှိုးမြို့နယ်အတွင်းရှိ လားရှိုး-တန့်ယန်းလမ်းခွဲရှိ ကျေးလက်အိမ်ခြံ ၁၀ အိမ်အား တပ်ပိုင်မြေအဖြစ် လားရှိုးအခြေစိုက် ခလရ ၄၁ မှ သိမ်းယူလိုက်ကြောင်း ကြားသိရသည်။
၂၀၂၁ ခု သြဂုတ်လ ၁၀ ရက် ယနေ့ မွန်းတည့် ၁၂ နာရီအချိန်ခန့်က တစ်နာရီအတွင်း အိမ်ခြံအတွင်းရှိ ပစ္စည်းများ ဖယ်ရှားပေးရန် လားရှိုး – တန့်ယန်းလမ်းခွဲရှိ လွယ်လန်းကျေးရွာ ရွာသူရွာသားများအား လားရှိုးမြို့အဝင်လမ်းတွင် အခြေစိုက်သည့် အမှတ် ၄၁ ခြေလျင်တပ်ရင်းမှ ဘက်ဟိုးကား (မြေကော်ကား) နှင့်အတူ နေအိမ်များအား လာရောက်ဖျက်ဆီးခဲ့သည်။
“(၄၁) တပ်က လာသိမ်းတာပါ၊ နွားခြံစီမံကိန်းလုပ်ဖို့ ရှိတယ်ဆိုပြီးတော့ လာပြောတယ်၊ မြေကော်ကား တွေနဲ့ ရောက်လာပြီး တစ်နာရီအတွင်း ပစ္စည်းတွေ ပြောင်းရွှေ့ သယ်ထုတ်ပေးပါ၊ မဟုတ်ရင် အကုန်ရှင်းပစ်မယ် ဆိုပြီးတော့ လာပြောတာ” ဟု အဆိုပါ လွယ်လန်းကျေးရွာ ဒေသခံ တစ်ဉီးက ပြောသည်။
အဆိုပါ ပြည်သူ့အိမ်ရာ မြေနေရာများကို စစ်ကောင်စီ အာဏာပိုင်တို့၏ နွားခြံစီမံကိန်း အတွက် သိမ်းဆည်း ခြင်း ဖြစ်ပြီး ကြိုတင် သတိပေးပြောဆို ခြင်းများလည်း မရှိကြောင်း လုံခြုံရေး အရ အမည် မဖော်လိုသော အသိမ်းခံရသည့် အိမ်ရာပိုင်ရှင်တစ်ဉီးက သျှမ်းသံတော်ဆင့်ကို ပြောသည်။
“ကျနော်တို့ ဒီမြေနေရာမှာ ၁၉၉၀ ခုနှစ်ကတည်းက နေထိုင်လာတာ၊ ပြည်သူတွေ ဒုက္ခရောက်နေတဲ့ အချိန်မှာ အခုလို အတင်းပြောင်းရွှေ့တာမျိုး မလုပ်သင့်ဘူးလို့ မြင်မိပါတယ်၊ အတင်းပြောင်းရွှေ့ခိုင်းတော့ စိတ်မကောင်းဘူး၊ ဘာမှ ပြင်ဆင်ထားမှု မရှိဘူး၊ ဘယ်နေရာမှာ သွားနေရမလဲ၊ အထက်လူကြီးတွေ ဒီကိစ္စကို သိစေချင်တယ်” ဟု ၎င်းက ဆက်ပြောသည်။
အဆိုပါ မြေနေရာများသည် လွန်ခဲ့သည့် ၁၉၉၆ ခုနှစ်မှာလည်း စစ်ကောင်စီလက်အောက် (၄၁) တပ်မှ ရာဘာ စီမံကိန်း အတွက် တစ်ခါသိမ်းယူခဲ့ဖူးကြောင်းနှင့် အဆိုပါမြေနေရာများရှိ နေအိမ်များကို ဖယ်ရှားခိုင်းတာမျိုးမလုပ်ပဲ ဆိုင်ခန်းများပြင် ဆောက်ပေးကာ နေထိုင်စေခဲ့ကြောင်းလည်း ၎င်းက ပြောသည်။
