သျှမ်းမြောက် ကျောက်မဲခရိုင် မိုင်းငေါ့မြို့နယ်ခွဲ နမ့်မန်းဒေသခံ (၈၀)ကျော်သည် နှစ်ကျော့ပြန် စစ်ရှောင်ခဲ့ရပြီး ကျောက်မဲမြို့ပေါ်ရောက်ရှိလာသဖြင့် စားနပ်ရိက္ခာ ခက်ခဲနေကြောင်း စုံစမ်းသိရသည်။
ထိုနမ့်မန်ဒေသခံ(၈)ကျော်သည် လွန်ခဲ့သည့် မတ်လ အတွင်းတွင် နေအိမ်မီးရှို့ခံခဲ့ရပြီး ရွာနှင့် (၂)မိုင်ဝေးကွာသည့် နေရာသို့ ပြောင်းရွှေ့နေထိုင်ခဲ့ရာ အမည်မသိလက်နက်ကိုင် တပ်ဖွဲ့က အရပ်ဝတ်ဖြင့် လာရောက် ခြိမ်းခြောက်ပြောဆိုသဖြင့် လက်ရှိမှာ ကျောက်မဲမြို့ ရောက်ရှိ နေထိုင်နေကြောင်း သတင်းရရှိသည်။
“မီးရှို့ဖျက်ဆီးခံရလို့ နမ့်မန်းရွာနဲ့ (၂)မိုင်ဝေးတဲ့ လမ်းဘေးတစ်နေရာမှာ ပြောင်းပြီး လာနေတယ်၊ အဲ့ဒီနေရာမှာလည်း မနေရဘူး၊ တစ်ခြားနေရာပြောင်း ဆိုပြီး အရပ်ဝတ်နဲ့လူတစ်စုက ထပ်လာပြောလို့ အခု ကျောက်မဲမြို့ပေါ်ရောက်လာတယ် ”ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါဒေသခံ (၈၀)ကျော်သည် ပြီးခဲ့သည့် ဇူလိုင်လအတွင်း ကျောက်မဲမြို့ပေါ်သို့ ထပ်မံပြောင်းရွေ့နေထိုင်ခဲ့ရကြောင်း၊ သို့သော် မြို့ပေါ်တွင် ကိုဗစ်ကူးစက်မှုမြင့်တက်နေပြီး အလုပ်အကိုင်ရှားပါးသည့်အတွက် စားနပ်ရိက္ခာခက်ခဲမှုများ ရှိနေကြောင်း သိရသည်။
“မြို့ပေါ်မှာက ကိုဗစ်တွေ အရမ်းပျံ့နေတယ်၊ အရင်ကတည်းက မြို့ပေါ်မှာ နေတဲ့သူတွေတောင် စားနပ်ရိက္ခာအတွက် ခက်ခဲနေကြတာ၊ သူတို့လို အခြားနေရပ်ကနေ ပြောင်းရွှေ့လာခဲ့ရသူဆိုရင် ပိုပြီး ခက်ခဲတာပေါ့” ဟု အထက်ပါ ဒေသခံက ဆိုသည်။
နမ့်မန်းရွာသည် ကျောက်မဲမြို့ နှင့် (၁၃)မိုင်အကွာ မိုင်းငေါ့မြို့သို့သွားသည့် လမ်းမကြီးဘေးတွင်ရှိသည့် ကျေးရွာဖြစ်ပြီး၊ ပြီးခဲ့သည့် မတ်လ (၂၅)ရက်နေ့ ညပိုင်းက စားသောက်ဆိုင်နှင့် နေအိမ် (၈)အိမ်ခန့် မီးရှို့ဖျက်ဆီးခံခဲ့ရတာဖြစ်ကြောင်း သိရသည်။
ထိုဒေသတွင် တိုင်းရင်းသားလက်နက်ကိုင်များဖြစ်သည့် RCSS/SSA နှင့် TNLA တို့ စစ်ရေးတင်းမာနေသည့် ဒေသဖြစ်ပြီး မကြာခဏ တိုက်ပွဲဖြစ်ပွားသည့်နေရာဖြစ်သည်။
