သျှမ်းပြည်မြောက်ပိုင်း နမ့်ခမ်းမြို့တွင် ကိုဗစ်-၁၉ တတိယလှိုင်းဒဏ်ကြာဆေးဆိုင်များပါ ကိုဗစ်ထိလာသည့်အတွက် ပြည်သူများ ဆေးဝယ်ရန် ခက်ခဲမှုများစွာ ကြုံနေကြောင်း စုံစမ်းသိရသည်။
လက်ရှိ နမ့်ခမ်းမြို့ အတွင်းဖွင့်လှစ်ရောင်းချနေသည့် ဆေးဆိုင်ပိုင်ရှင်များသည် ကိုဗစ်-၁၉ ပိုးတွေ့မှုရှိလာသဖြင့် ဆေးဆိုင်ပိတ်ထားနေရကြောင်း၊ ထို့ကြောင့် လိုအပ်သည့်ဆေးကို ခက်ခက်ခဲခဲ ဝယ်ယူသုံးစွဲနေရကြောင်း နမ့်ခမ်း ဒေသခံ အသက် (၄၀) အရွယ်ရှိ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ ဆေးဆိုင်ရှင်တွေလည်းကိုဗစ် ကူးတယ်။ ပိတ်တဲ့ဆိုင်တွေပိတ်ကုန်တယ်။ ဖွင့်ရင်လည်း အချိန်နဲ့ဖွင့်တာ။ ကိုယ်သောက်တဲ့ဆေးတောင်ဝယ်မရတော့ဘူး” ဟု နမ့်ခမ်းမြို့ အသက် (၄၀)ကျော် အမျိုးသမီးတဦးက ပြောသည်။
နမ့်ခမ်းမြို့တွင် ကိုဗစ်-၁၉ ကူးစက်ခံရသူမြင့်တက်လာပြီး သေဆုံးသူများလည်း မြင့်လာသဖြင့် ရပ်ကွက်များ Lockdown (အဝင်၊ အထွက်)ပိတ်ထားရကြောင်း၊ အပြင်ထွက်ခွင့်ကိုလည်း မနက် (၇)မှ နေ့လည် (၁၂)နာရီ တအိမ်လျှင် တစ်ဦးသာ ထွက်ခွင့်ရှိကြောင်း သိရသည်။
ထိုနည်းတူ နမ့်ခမ်းမြို့ နှင့် ကပ်လျက်ရှိသည် မံစီမြို့နယ် မန့်ဝိန်းကြီးတွင်လည်း ကိုဗစ်ကြောင့် ဆေးဆိုင်များ ပိတ်လိုက်ရသဖြင့် ခြံဝန်းတံခါးမှ အော်ပြီး ဝယ်လိုက်ရကြောင်းလည်း မန့်ဝိန်းကြီး ဒေသခံ တစ်ဦးက ပြောသည်။
“ ကိုဗစ်ကြောင့် ဆိုင်ကိုတံခါးပိတ်ထားတယ်။ အပြင်ကနေပဲ လန့်အော်ပြီးဝယ်ရတာ။ အကိုက်အခဲပျောက်ဆေးတွေ၊ လိုအပ်တဲ့ဆေးတွေသွားဝယ်ထားရတယ်။ ခုတလော ဆေးတွေလည်း ဝယ်ရတာ ခက်ခဲလာတယ် ” ဟုမန့်ဝန်းကြီးဒေသခံ တဦး ကပြောသည်။
မံစီးမြို့နယ်၊ မန့်ဝိန်းကြီးကို သြဂုတ်လ ၁၀ ရက်နေ့မှ စတင်ပြီး လော့ဒေါင်းချသွားမည်ဖြစ်သောကြောင့် ပြည်သူများ လိုအပ်သည့်ဆေးဝါးများကို အလုယက်ဝယ်ယူခဲ့ကြောင်းလည်း မန့်ဝိန်းဒေသခံများက ပြောဆိုသည်။
“ ကျနော်တို့ မန့်ဝန်းကြီးမှာက ဆေးဆိုင် ၂ ဆိုင်ပဲ ရှိတယ်။ သူတိုက ပိတ်တော့ နမ့်ခမ်းမှာသွားဝယ်ရတယ်။ မနက်ကစပြီးတော့ မန့်ဝိန်းကြီးကို လော့ဒေါင်းချလိုက်တော့မယ်လို့သိရတယ်။ကချင်ပြည်နယ်ကနေလည်း ဝင်လို့ မရတော့ဘူး” ဟု မန့်ဝိန်းမြို့ဒေသခံအမျိုးသားတဦးက ပြောသည်။
မူဆယ်မြို့တွင်လည်း ဆေးဝါးများကို ဝယ်ယူရန်အတွက် လွန်စွာခက်ခဲ့သည့် အပြင် ကျန်းမားရေးဆိုင်ရာ ပစ္စည်းများလည်း ဈေးနှုန်းတက်လာကြောင်း မူဆယ်မြို့ ဂရုဏာလူမှုကူညီရေးအသင်းက ပြောသည်။
“ ဆေးဝါးဝယ်ယူရတာတော်တော်ခက်တယ်။ တချို့ကဆိုင်ပိတ်တယ်။ တစ်ချို့က ပစ္စည်းပျက်လို့ မရတာတွေလဲရှိတယ်။ ပြီးတော့ ခုတလောက ဒီကျန်းမာရေးပစ္စည်းတွေဆိုလဲ ဈေးတက်လာတယ်။ ဥပမာ နို့မုန့်တွေ၊ တခြားပစ္စည်းတွေပေါ့။” ဟု မူဆယ်မြို့ ဂရုဏာလူမှုကူညီးရေးအသင်းက ပြောသည်။
တဖက်တွင်လည်း စစ်တပ်အာဏာသိမ်းထားသောကြောင့် မြို့ပြတွင် ဆေးဝါးဝယ်ယူရန်အတွက်လည်း ခက်ခဲမှုရှိကြောင်း၊ နေ့စဉ်စားသောက်ကုန်များလည်း ဈေးတက်ကုန်ကြောင်း နမ့်ခမ်းမြို့ ဒေသခံအမျိုးသမီးက ဆိုသည်။
မြန်မာနိုင်ငံတွင် စစ်အာဏာသိမ်းယူပြီးနောက်ပိုင်း ပြည်သူများ စားဝတ်နေရေးအတွက် ခက်ခဲလာသည့်အပြင် ကိုဗစ် ၁၉ ကပ်ရောဂါကြောင့် ပြည်သူများ ပိုမိုခက်ခဲလာကြောင်း သိရသည်။
Leave a Comments