သျှမ်းပြည်မြောက်ပိုင်း မူဆယ်မြို့တွင် တရုတ်နိုင်ငံထုတ် ကိုဗစ် -၁၉ ကာကွယ်ဆေးကို ယုံကြည့်မှုမရှိသောကြောင့် ပြည်သူတစ်ချို့ ဆေးသွားထိုးသွင်းခြင်းမရှိကြောင်း စုံစမ်းသိရှိရသည်။
လက်ရှိ မူဆယ်မြို့တွင် စတင်ထိုးပေးနေသည့် တရုတ်နိုင်ငံထုတ် ကိုဗစ် ၁၉ ကာကွယ်ဆေးသည် ရောဂါမကူးစက်နိုင်ရန် ၅၀ ရာခိုင်းနှုန်သာကာကွယ်နိုင်ကြောင်း၊ ထိုးပေးသည့် ဆေးကို စိတ်ချမှု မရှိသဖြင့် သွားရောက်မထိုးကြောင်း မူဆယ်မြို့ အသက် (၃၅)နှစ် အရွယ်ရှိ ဒေသခံအမျိုးသား တဦးက သျှမ်းသံတော်ဆင့် ကို ပြောသည်။
“ ကျနော်တို့တော့ မထိုးတော့ဘူး။ ဘာလို့လဲဆိုတော့သူတို့ဆေးက (၅၀) (၅၀) ဘဲကာကွယ်ပေးတယ်ဆိုတော့ ကျနော်တို့အိမ်မှာနေလဲ အတူတူဘဲ။ ပြီးတော့ ထိုးပေးနေတဲ့သူကလည်း ကြက်ခြေနီကလူတွေများတယ်။ ဆရာဝန်တချို့ကလည်း CDM ဝင်တော့ ကျနော်တို့ စိတ်မချလို့မထိုးတော့တာ။” ဟု မူဆယ်မြို့ ဒေသခံအမျိုးသား တဦးက ပြောသည်။
အာဏာသိမ်းစစ်ကောင်စီက တရုတ်နိုင်ငံထုတ် (Sinopharm) ကိုဗစ် -၁၉ ကာကွယ်ဆေးကို ဝယ်ယူပြီး နိုင်ငံအနှံရှိပြည်သူများကို ထိုးပေးနေသော်လည်း တစ်ချို့ပြည်သူများက ထိုးရန်အတွက် စိတ်မသန့်သောကြောင့် သွားရောက် ထိုးခြင်းမရှိကြောင်းသိရသည်။
မူဆယ်မြို့တွင် ကိုဗစ် -၁၉ ကာကွယ်ဆေးကို သြဂုတ်လ ၇ ရက်နေ့မှ စတင်ဆေးထိုးပေးခဲ့ပြီး၊ တစ်ရပ်ကွက်လျှင် လူဦးရေ ၃၀၀ ထိုးပေးမည်ဟု ကြေညာထားသော်လည်း လက်ရှိမှာ တရပ်ကွက်လျှင် လူဦးရေ ၂၆၀သာ ထိုးခွင့်ရမည်ဟု ကြားသိရကြောင်း မူဆယ်မြို့ ဒေသခံအမျိုးသား တဦးကပြောသည်။
“ အရင်ကတစ်ရပ်ကွက်ကို လူဦးရေ ၃၀၀ ထိုးပေးတယ်။ အခုက ၂၆၀ ဘဲထိုးရတယ်။ ကျန်တဲ့ ၄၀ ပျောက်နေတယ်။ ဆေးက ဘယ်ပျောက်နေတာလဲတော့ ကျနော်တို့မသိဘူး။ ပြီးတော့ အခု ကိုဗစ်ဆေးက တစ်ပုလင်းကို ၂ယောက်စာဘဲထိုးလို့ရတော့တယ်” ဟု မူဆယ်မြို့ ဒေသခံအမျိုးသား တဦး ကပြောသည်။
မူဆယ်မြို့တွင် ကိုဗစ် ၁၉ ပိုးတွေ့လူနာ စုစုပေါင်း ၉၀၀ ကျော်ရှိကြောင်းသိရသည်။
