သျှမ်းပြည်တောင်ပိုင်း မိုင်းကိုင်မြို့တွင် မိသားစု တစ်စုတည်း ကိုဗစ်-၁၉ ကူးစက်သူ (၆) ဦးရှိကြောင်း စုံစမ်းသိရသည်။
အဆိုပါ မိသားစုသည် မိုင်းကိုင်မြို့ အမှတ် (၄) ဈေးပိုင်းရပ်တွင် နေထိုင်သော မိသားစုဖြစ်ပြီး ၎င်းမိသားစု၏ သားဖြစ်သူသည် လားရှိုး – မိုင်းကိုင် လိုင်းကားမောင်းသူဖြစ်ကြောင်းလည်း စုံစမ်းသိရှိရသည်။
“သူ့အမျိုးသားက ကားမောင်းသမားဖြစ်တယ်။ မိုင်းကိုင် – လားရှိုး လိုင်းကားမောင်းတယ်။ကုန်တွေလည်း သွားချတာရှိတယ်။ ကုန်စုံဆိုင် ဖွင့်ထားတော့ သူတို့အိမ်မှာ ငွေလာကောက်တဲ့သူ (၂) ယောက်လည်း ကူးတယ်လို့ ကြားတယ်” ဟု မိုင်းကိုင် ပရဟိတ သမားတစ်ဦး ကပြောသည်။
အဆိုပါ မိသားစုကို သြဂုတ် (၇) ရက်နေ့က သံသယ လူနာအဖြစ် စစ်ဆေးခဲ့ပြီး မိသားစု (၆) ဦးစလုံး ကိုဗစ်-၁၉ ပိုးတွေ့ရှိသဖြင့် မိုင်းကိုင်ပြည်သူ့ဆေးရုံသို့ လက်ရှိ ဆေးကုသမှု ခံယူနေကြောင်း သိရှိရသည်။
“ခုမိုင်းကိုင်မှာ ကိုဗစ်-၁၉ အတည်ပြု လူနာ များလာတော့ မြို့အဝင်အထွက်တွေ စစ်ဆေးတာတွေရှိတယ်။ လိုင်းကားတွေ မြို့ထဲ မရပ်ရတော့ဘူး။ ဒီနေ့ ကျနော့်အသိ လဲချားကနေလာတာ မြို့ထဲမဝင်ရဘူး။ လှည့်ပြန်သွားရတယ်။” ဟု မိုင်းကိုင်ဒေသခံ တစ်ဦး ကပြောသည်။
ထို ကူးစက်သည့် မိသားစု (၆) ဦးသည် အသက် (၆၇) နှစ် အမျိုးသမီး၊ အသက် (၄၁) နှစ် အမျိုးသား၊ အသက် (၃၅) နှစ် အမျိုးသမီး၊ အသက် (၆) နှစ်၊ အသက် (၇) နှစ် နှင့် အသက် (၁၂) နှစ်အရွယ် သား (၃) ဦး စုစုပေါင်း (၆) ဦးတို့ ဖြစ်ကြသည်။
လက်ရှိ မိုင်းကိုင် ပြည်သူ့ဆေးရုံမှာ ကိုဗစ်-၁၉ အတည်ပြု လူနာ စုစုပေါင်း (၂၃) ဦး ကျန်ရှိကြောင်း သိရှိရသည်။
Leave a Comments