သျှမ်းပြည်မြောက်ပိုင်း နမ့်ခမ်းမြို့နယ် အတွင်း စစ်ကောင်စီ နှင့် TNLA တို့ တိုက်ပွဲဖြစ်ပွားမှုကြောင့် စစ်ကောင်စီဘက်က တပ်သား တစ်ဦးကျဆုံးပြီး ဒေသခံ တစ်ဦး ထိခိုက် ဒဏ်ရာ ရရှိခဲ့ကြောင်း စုံစမ်းသိရှိရသည်။
ယနေ့ သြဂုတ် (၈) ရက် မနက် ၄ နာရီကျော်က နမ့်ခမ်းမြို့နယ် ဝမ့်နမ့်မ -ဝမ့်ဟိုပုံ နှင့် ဝမ်ဝိန်းကန်း အကြား တိုက်ပွဲဖြစ်ပွားပြီး လက်နက်ကြီး လက်နက်ငယ်ဖြင့် ပစ်ခတ်ခဲ့ကြောင်း စုံစမ်းသိရှိရသည်။
“စစ်ကောင်စီဘက်က တစ်ယောက် ကျဆုံးသွားတယ်။ သူ့အလောင်းကိုတောင် သူတို့ ပြန်မသယ်သွားဘူး။ ရွာထဲ မပေါက်ကွဲသေးတဲ့ လက်နက်ကြီး တစ်လုံး ရှိသေးတယ်” ဟု ဝမ့်နမ့်မ ဒေသခံ တစ်ဦး က သျှမ်းသံတော်ဆင့် ကိုပြောသည်။
နှစ်ဖက်တိုက်ပွဲဖြစ်ပွားပြီးနောက် ဝမ့်နမ့်မ – ဝမ့်ပုံ ရှိ အသက် (၇၀) ကျော် အမျိုးသား တစ်ဦးသည် နေအိမ် တံခါးဖွင့်ကြည့်ရာ စစ်ကောင်စီတပ်ဘက်မှ ထိုအမျိုးသားကို ပစ်ခတ်ခဲ့သဖြင့် အပေါ်နှုတ်ခမ်း ဒဏ်ရာ ရရှိခဲ့ကြောင်း ဒေသခံ တစ်ဦးက ပြောသည်။
“သွားလည်း ကျိုးသွားပြီး အပေါ်နှှုတ်ခမ်း ထိသွားတယ်။ ခုချိန်ထိ လက်နက်ကြီးသံ တစ်ချက် တစ်ချက် ကြားနေရသေးတယ်” ဟု နမ့်ခမ်းဒေသခံ တစ်ဦး ကပြောသည်။
အဆိုပါ တိုက်ပွဲဖြစ်ပွားသည့် နေရာသည် နမ့်ခမ်းမြို့နှင့် တစ်မိုင်ခန့်သာ ကွာဝေးပြီး မြို့ထဲတွင်လည်း လက်နက်ကြီးသံ တစ်ချက်တစ်ချက် ကြားနေရကြောင်း ဒေသခံများက ပြောဆိုကြသည်။
ယနေ့ ဖြစ်ပွားသည့် တိုက်ပွားအခြေအနေကို TNLA ပြောရေးဆိုခွင့်ကို ဆက်သွယ်သော်လည်းမရရှိသေးပေ။
