သျှမ်းတောင် တောင်ကြီးခရိုင်အတွင်းရှိ ပုံးအင်းဒေသတွင် ပြီးခဲ့သည့် သြဂုတ်လ (၄)ရက်နေ့က ကိုဗစ်ပိုးကူးစက်ခံရသူ (၁)ဦး ပထမဆုံး တွေ့ရှိခဲ့ကြောင်း သိရသည်။

“အရင်ရက်တွေကလည်း နေမကောင်းဖြစ်တယ်လို့တော့ ကြားတယ်၊ သူ့ကိုသူ သံသယဝင်နေလို့ ဘန်းယဉ်မှာ သွားစစ်ကြည့်တာ၊ ကိုဗစ်ပိုးတွေ့တာပဲ” ဟု ပုံးအင်းဒေသခံက သျှမ်းသံတော်ဆင့်ကို ပြောသည်။

အဆိုပါ လူနာသည် အသက် (၅၀)အရွယ် အမျိုးသားဖြစ်ပြီး ပုံးအင်းဒေသ ဝမ့်နောက်ကျေးရွာတွင် နေထိုင်သူဖြစ်ကြောင်း၊ ယခင်ရက်က အခြားရွာသို့ စပါးလိုက်ဝယ်ဖူးကြောင်း သိရသည်။

“သူက စပါးရောင်းဝယ်တဲ့သူဆိုတော့ အရင်ရက်တွေက တစ်ခြားရွာတွေမှာ စပါးတွေ လိုက်ဝယ်သေးတယ်” ဟု အဆိုပါ ဒေသခံက ဆက်ပြောသည်။

ပုံးအင်းဒေသတွင် ကိုဗစ်ပထမလှိုင်း၊ ဒုတိယလှိုင်းကာလအတွင်း ကိုဗစ်ကူးစက်ခံရသူ မရှိခဲ့ပဲ ယခု တတိယလှိုင်းအတွင်း ကိုဗစ်ကူးစက်ခံရသူ ပထမဆုံး တွေ့ရှိခဲ့တာဖြစ်ကြောင်း သိရသည်။

ယခုတွင် ကိုဗစ်ပိုးရှိသူကို နေအိမ်တွင်သာ ကန့်သတ်ထားပြီး ၎င်းရွာအဝင်အထွက်လမ်းများကိုလည်း ပိတ်ထားပြီဖြစ်ကြောင်း၊ ပုံးအင်းဒေသနှင့်ထိစပ်နေသည့် ဘန်းယဉ်၊ နောင်မွန်နှင့် ဆီဆိုင်မြို့တို့တွင် ကိုဗစ်ကူးစက်မှုများ မြင့်တက်နေကြောင်း သိရသည်။

ပုံးအင်းဒေသတွင် ကျေးရွာပေါင်း (၅၅)ရွာခန့်ရှိပြီး ကိုဗစ်ပိုး စတင်တွေ့ရှိရပြီဖြစ်သည့်အတွက် ကျေးရွာများတွင် ဧည့်သည်လက်ခံခြင်း မပြုလုပ်ကြရန်နှင့် တတ်နိုင်သမျှ နေအိမ်တွင်သာ နေထိုင်ကြရန် တာဝန်ရှိသူက အသိပေးထားကြောင်း သိရသည်။

ပုံးအင်းဒေသသည် တောင်ကြီး၊ ဟိုပုံး၊ ဆီဆိုင်၊ ကျောက်တလုံးမြို့နယ်ထဲတွင် တစ်စိတ်တစ်ဒေသစီ ပါဝင်နေပြီး ကုန်းလမ်း၊ ရေလမ်းဖြင့်သွားလာနိုင်သည့် ဒေသဖြစ်သည်။