၂၁ ရာစု ပင်လုံညီလာခံ တတိယအကြိမ် အတွက် သျှမ်းပြည် ညီညွှတ်ရေးကော်မတီ CSSU အဖွဲ့ဝင်ခေါင်းဆောင်များ နေပြည်တော်တွင် ယနေ့ တွေ့ဆုံဆွေးနွေးကြသည်ဟုသိရသည်။

ဇူလိုင် ၁၀ ရက်နေ့က နေပြည်တော် Royal Lotus ဟိုတယ်တွင် သျှမ်းပြည် ညီညွှတ်ရေးကော်မတီ CSSU အဖွဲ့ဝင်များ အလှည့်ကျ အဖွဲ့ခေါင်းဆောင်များတွေ့ဆုံဆွေးနွေးရာ – ၂၁ ရာစု ပင်လုံညီလာခံ တတိယအကြိမ် အတွက် ဆုံးဖြတ်ချက် ၄ ချက်ချမှတ်ခဲ့သည်ဟု သိရသည်။

အဆိုပါ အချက် ၄ ချက်မှာ – သျှမ်းအမျိုးသားများအနေဖြင့် အမျိုးသားအဆင့်နိုင်ငံရေးဆွေးနွေးပွဲ ကျင်းပနိုင်ခြင်းမရှိသေးသည့်အတွက် ၊ ဘုံသဘောတူညီချက် မရှိသေးသည့် အတွက်၊  တစုံတရာတင်ပြ ဆွေးနွေးမည်မဟုတ်ကြောင်း၊ ဖက်ဒရယ်ပြည်ထောင်စုအတွက်ဦးတည်စေသည့်အချက်များသာ ပါဝင်ဆွေးနွေးမည်ဖြစ်ကြောင်း၊ နောင်အစည်းအဝေးများအတွက် ခွဲထွက်ရေး/မခွဲထွက်ရေးဆိုင်ရာ၊ တပ်တခုတည်းဆိုင်ရာအချက်များ ဆွေးနွေးပြင်ဆင်ထားမည်ဖြစ်ကြောင်း၊ ၂၁ ရာစု ပင်လုံညီလာခံ တတိယအကြိမ် ထုတ်ပြန်မည့်ဆိုင်ရာ အချက်အလက်များ ပါဝင်သုံးသပ်ကာ အစည်းဝေးတင် ဆွေးနွေးမည်  – စသဖြင့် ဆွေးနွေးကြသည်ဟု ဆိုသည်။

“ဟုတ်ကဲ့ ကျနော်က ပြောရေးဆိုခွင့်မဟုတ်တော့ ပြောလို့မရဘူး။ နက်ဖြန်ပြုလုပ်မယ့်ညီလာ ခံဆိုင်ရာ ဆုံးဖြတ်ချက်တွေ၊ သျှမ်းပြည်ဖွဲ့စည်းပုံဆိုင်ရာ ဆွေးနွေးပွဲ ပြုလုပ်မယ့် ကိစ္စတွေ၊ CSSU နဲ့ဆိုင်တဲ့ ဖွဲ့စည်းပုံတွေ ဆွေးနွေးကြတယ်” – ဟု အမည်မဖေါ်လိုသည့် တက်ရောက်သူ ခေါင်းဆောင်ပိုင်း တဦးကပြောသည်။

အဆိုပါ အစည်းအဝေးတွင် ကျားဖြူပါတီဝင်မှ နှုတ်ထွက်ပြီး FUP ပါတီထူထောင်ခဲ့သည့် ပါတီဉက္ကဌ စောသန်းမြင့်၊ ဒုတိယ ဉက္ကဌ ဦးစဝ်သာဦးတို့ လည်း  တက်ရောက်သည်ဟု သိရသည်။

လက်ရှိ သျှမ်းပြည်ညီညွတ်ရေးကော်မတီ CSSU ၏ အလှည့်ကျ ဉက္ကဌ အဖြစ် ကျားဖြူပါတီ SNDP က တာဝန်ယူဆောင်ရွက်နေသည်ဟုဆိုသော်လည်း အတွင်းရေးမှူးများအဖွဲ့တွင် သျှမ်းပြည်ပြန်လည် ထူထောင်ရေးကောင်စီ RCSS ၊ သျှမ်းပြည်ပူပေါင်းဆောင်ရွက်ရေးကော်မတီ SSJAC အဖွဲ့ဝင်များဖြစ်ကြသည့် ကျားခေါင်းပါတီ အမည်ရ SNLD ၊ သျှမ်းပြည်တိုးတက်ရေးပါတီ SSPP/SSA တို့အပြင် ကျိုင်းတုံအခြေစိုက် မင်္ဂလာစည်တော်ပါတီ ESSDDP  နှင့် သျှမ်းလူမှုအသင်းအဖွဲ့များကိုယ်စားလှယ်များလည်း အဖွဲ့ ဝင်အဖြစ်ပါဝင်သည်။