သျှမ်းပြည်မြောက်ပိုင်း မူဆယ်မြို့တွင် ကိုဗစ်-၁၉ ကြောင့် စားဝတ်နေရေးခက်ခဲနေသောပြည်သူများက Lockdown ချထားသည့်လမ်းပြန်ဖွင့်ပေးရန်အတွက် လှုမှုစာမျက်နှာပေါ်တွင်တောင်းဆိုခဲ့ကြောင်း စုံစမ်းသိရှိရသည်။

မူဆယ်မြို့တွင် ကိုဗစ် ၁၉ ပိုးတွေ့လူနာမြင်တက်မှုကြောင့် ရပ်ကွက်များကို Lockdown ချထားရခြင်းဖြစ်ကြောင်း၊ မလိုအပ်ဘဲအပြင်မထွက်ရန်ဖြစ်ကြောင်း မူဆယ်မြို့ ဒေသခံ အမျိုးသား တဦးကပြောသည်။

“ တချို့လူတွေက သိပ်နားမလည်ကြတာ။ Lockdownချထားတယ်ဆိုတာက တစ်အိမ်နဲ့တစ်အိမ် မလည်ဖို့၊ တစ်ခြားရပ်ကွက်ကနေ ကိုယ်တွေရပ်ကွက်ထဲမလာဖို့ပြောတာ။ မနက်ပိုင်းမှာ ဈေးသွားရောင်းလို့ရတယ်။ တစ်အိမ်ကို တယောက်ပဲထွက်ပေါ့။” ဟု မူဆယ်မြို့ ဒေသခံအမျိုးသား တဦးက ပြောသည်။

အဆိုပါ စားဝတ်နေရေးခက်ခဲမှုတွင် လူတိုင်းဖြစ်နေကြောင်း၊ တဖက်တွင်လည်း နိုင်ငံရေးမကောင်းသောကြောင့် ပိုမိုခက်ခဲလာကြောင်း မူဆယ်မြို့ ပရဟိတ အဖွဲ့ဝင်တဦး ကပြောသည်။

“ သူတို့တောင်းဆိုတာတော့တွေ့ပါတယ်။ ဒါမဲ့ လူနည်းစုပါပဲ။ ခုချိန်က ကိုဗစ်ကို‌ကြောက်လို့ Lockdown ချထားတာလေ။ စားဝတ်နေရေးအတွက်ကတော့ လူတိုင်းနီးပါး ခက်ခဲနေတာပဲ။ တဖက်က နိုင်ငံရေးလဲမကောင်းလို့ အလုပ်ကိုင်အခွင့်လမ်းတွေမရှိတော့တာပေါ့နော်။”ဟု မူဆယ်မြို့ ပရဟိတ အဖွဲ့ဝင်က ပြောသည်။

မြန်မာနိုင်ငံတွင် ကိုဗစ် ၁၉ ကပ်ရောဂါအပြင် စစ်အာဏသိမ်းမှုကြောင့် ပြည်သူများ စားဝတ်နေရေးက ယခင်ထက်ပိုမိုခက်ခဲလာခဲ့ကြောင်းသိရသည်။

ယခင် NLD အစိုးရလက်ထက်တွင် ကိုဗစ်-၁၉ ကြောင့် စားဝတ်နေရေးကို ခက်ခဲသော်လည်း ရှာဖွေစားသောက်ရာတွင် လွယ်ကူးမှုရှိနေသေးကြောင်း မူဆယ်မြို့ ဒေသခံအမျိုးသမီးတဦးက ပြောသည်။

“ အရင်ကတော့လည်း ရှာစားရတာလွယ်သေးတယ်။ ကိုဗစ်လည်း ခုလောက်ထိပြန့်နေတာမဟုတ်ဘူးလေ။ ခုက စစ်အာဏာလာသိမ်းပြီးတော့ ကိုဗစ် ကို ကောင်းစွာမထိန်းချုပ်နိုင်လို့ ဒီလိုဖြစ်လာတာ။”ဟု မူဆယ်မြို့ အမျိုးသမီးတဦးက ပြောသည်။

မူဆယ်မြို့တွင် ကျန်းမားရေးဌာနမှထုတ်ပြန်ချက်အရ ကိုဗစ် ၁၉ ပိုးတွေ့လူနာ ၇၀၀ ကျော်ရှိပြီး သေဆုံးသူ ၇၀ ကျော်ရှိကြောင်းသိရသည်။