သျှမ်းပြည်မြောက်ပိုင်း မိုင်းငေါ့မြို့တွင် သတင်းပေးသူဟု ယူဆရသည့် သူကို လက်နက်ကိုင် တပ်ဖွဲ့တစ်ခုက အရပ်ဝတ်ဖြင့် လာရောက်ရှာဖွေမှုရှိကြောင်းသိရသည်။
လွန်ခဲ့သည့် သြဂုတ်လ ၂ ရက်နေ့တွင် သျှမ်းသံတော်ဆင့် အနေဖြင့် မိုင်းငေါ့ဒေသခံ (၂) ဦး TNLA ဖမ်းဆီးရိုက်နှက်မှုသတင်း၊ ကျောက်မဲမြို့တွင် နေအိမ် (၂) လုံးကို TNLA မှ မီးရှို့ခဲ့သည့် သတင်းကို ထုတ်ဝေခဲ့ပြီးနောက် ညနေအချိန်တွင် အရပ်ဝတ်ဖြင့် စစ်ရှောင်စခန်းအတွင်းသို့ လာပြီး သတင်းပေးသူကို လာရောက်မေးမြန်းရှာဖွေခဲ့ကြောင်း သတင်းရရှိသည်။
“သူတို့ စစ်ရှောင်စခန်းမှ မျက်နှာစိမ်းနဲလူ လာတာရှိလာဆိုပြီးလာမေးတယ်။ သူတို့က အရပ်ဝတ်နဲ့ပဲလာတာ။ လက်နက်ကိုင်တပ်ဖွဲ့လို့တော့ပြောတယ်။ ဘယ်တပ်ဖွဲ့လဲတော့မသိဘူး” ဟု မိုင်းငေါ့မြို့ ဒေသခံ အမျိုးသားတဦး ကပြောသည်။
အလားတူ ယမန့်နေ့ သြဂုတ်လ ၃ ရက်နေ့တွင်လည်း အရပ်ဝတ်ဖြင့် မိုင်းငေါ့မြို့တွင်း ရှိ ရပ်ကွက်တစ်ချို့တွင် မျက်နှာစိမ်းနှင့်လူ ရှိ၊မရှိကြောင်းကို လာရောက်စစ်ဆေးမေးမြန်ခဲ့ခြင်း ရှိကြောင်းသိရသည်။
“ ဟုတ်တယ်။ ကျမတို့လည်းကြားတယ်။ အရပ်ဝတ်နဲ့တဲ့ မျက်နှာစိမ်းနဲ့လူလာတာရှိလား လို့ လိုက်မေးနေတယ်။ ဈေးနဲ့ ရပ်ကွက်ကြားတွေမှာလို့ပြောတယ်။ ကျမတို့ဘက်တော့ မရောက်လာဘူး” ဟု မိုင်းငေါ့မြိုနေ အမျိုးသမီးတဦးက ပြောသည်။
ဆက်လက်ပြီး မိုင်းငေါ့မြို့ အမျိုးသားတဦး က “ သတင်းထွက်ပြီးတဲ့နောက်မှပဲလိုက်ရှာတာ။ ဘာကြောင့်လာရှာလဲတော့မသိဘူး” ဟု ပြောသည်။
ထို့ကဲ့သို့ ပြုလုပ်နေခြင်းသည် ဒေသခံပြည်သူများ သတင်းပေးမှုကို မပြုလုပ်ရန် လှည့်ပြီး ခြိမ်းခြောက်နေခြင်းဖြစ်ကြောင်း လည်း မိုင်းငေါ့ဒေသခံများက ပြောသည်။
သျှမ်းမြောက် မိုင်းငေါ့မြို့အပါအဝင် ကျောက်မဲမြို့နယ်တွင် စစ်ဘေးရှောင် (၅၀၀)ကျော်ရှိသည့်နေရာဖြစ်ပြီး၊ မိုင်းငေါ့မြို့ အနီးတဝှိက်တွင် တိုင်းရင်းသားလက်နက်ကိုင်တပ်ဖွဲ့များ မကြာခဏ တိုက်ပွဲဖြစ်ပွားသည့်နေရာဖြစ်သည်။
