သျှမ်းပြည် အရှေ့ပိုင်း ကျိုင်းတုံမြို့မ ရဲစခန်း အချုပ်ခန်းမှ အချုပ်သား(၂)ဦး နှင့် ရဲစခန်းဝင်းအတွင်းကိုဗစ် ပိုးတွေ့ရှိသူ ၅ ဦးထံတွင် ကိုဗစ်ပိုးတွေ့ရှိသဖြင့် ပြည်သူများ စိုးရိမ်ထိတ်လန့်နေကြောင်း သိရသည်။

ယမန်နေ့က ဩဂုတ်လ (၃)ရက်‌နေ့ ကျိုင်းတုံမြို့မရဲစခန်းမှ အချုပ်သား(၂)ဦး အပါအဝင်၊ ခရီးသွားခြင်း ရာဇဝင် မရှိသည့် ခရိုင်ရဲရုံးမှ တပ်ဖွဲ့ဝင်တစ်ဦးနှင့် ရဲစခန်းဝင် အတွင်း နေထိုင်သူ ၅ ဦးတို့တွင် ကိုဗစ် -၁၉ ပိုးစစ်ဆေးတွေ့ရှိရကြောင်း သိရသည်။

“မနေ့က စုစုပေါင်း ၂၉ ဦးကို ကိုဗစ်ပိုးစစ်ဆေးတွေ့ရှိပါတယ်၊ အဲ့ထဲမှာ ရဲစခန်းက အချုပ်သား ၂ ဦးနဲ့ အပါအဝင် ရဲစခန်းဝင်းအတွင်း စုစုပေါင်း ၅ ဦးမှာ ပိုးတွေ့တယ်၊ သူတို့က ခရီးသွားရာဇဝင်လည်း မရှိကြဘူး၊ ဒေသတွင်းကူးစက်မှုလို့ ပြောရတာပေါ့” ဟု ကျိုင်းတုံမြို့မှ ပြည်သူတစ်ဦးက သျှမ်းသံတော်ဆင့်ကို ပြောသည်။

ကျိုင်းတုံမြို့၏ ကိုဗစ် – ၁၉ တတိယလှိုင်းအတွင်း ဇွန်လ ၂၉ ရက်နေ့မှ ဩဂုတ်လ ၃ ရက်နေ့အထိ ကိုဗစ် – ၁၉ ကူးစက်ခံထားရသူ စုစုပေါင်း ၂၅၂ ဦး အထိရှိနေပြီး သေဆုံးသူ (၂)ဦးရှိနေသည့်အပြင် အချုပ်သားများလည်း ကူးစက်ခံရမှုရှိလာသည့်အတွက် ဒေသခံများ စိုးရိမ်ပူပန်နေရကြောင်းလည်း ၎င်းက ပြောသည်။

“သူတို့က အပြင်ထွက်ခွင့်မရှိ၊ အပြင်လူနဲ့လည်း ထိတွေ့မှုမရှိကြဘဲ ဘယ်လိုဖြစ်ပြီး ကိုဗစ်ကူးစက်ခံရ လည်းဆိုတာ စဉ်းစာစရာပဲ၊ ပြီးတော့ ပြောရရင် အချုပ်သားတွေဆိုတာ ထောင်ပိုင်တွေ ရဲတွေနဲ့ပဲ ထိတွေ့ခွင့် ရှိတဲ့သူတွေလေ၊ ဆိုတော့ အချုပ်ထဲ ရောက်နေတဲ့ ပြည်သူတွေကိုလည်း သက်ဆိုင်ရာတာဝန်ရှိသူတွေက ကျန်းမာရေးဆိုင်ရာ တာဝန်ယူမှု တာဝန်ခံမှု ရှိသင့်ပါတယ်” လို့ ကျိုင်းတုံ ဒေသခံ တစ်ဦးကပြောသည်။

ယမန်နေ့ သြဂုတ်လ ၃ ရက်နေ့အထိ ကျိုင်းတုံမြို့တွင် ကိုဗစ် တတိယလှိုင်း ပိုးကူးစက်ခံနေရသူ စုစုပေါင်း ၂၅၂ ဦး ရှိသည့် အနက် အချုပ်သားများလည်း ကူးစက်ခံရမှုများ ရှိနေခြင်းပေါ် သက်ဆိုင်ရာ တာဝန်ရှိသူများ အနေဖြင့် ရောဂါ အခြေအနေများ ပိုပြီးဆိုးရွာလာမှု မဖြစ်ပေါ်လာစေရန် ကြပ်မတ် လုပ်ဆောင်သင့်ကြောင်း လည် ဒေသခံများက ပြောကြားသည်။