သျှမ်းပြည်တောင်ပိုင်း လင်းခေးမြို့ရှိ နမ့်တိန်းချောင်းအတွင်း ဒေသခံများ အုပ်စုဖွဲ့ ရေဆင်း ချိုးခြင်း မပြုလုပ်ကြရန် ကျန်းမာရေးအဖွဲ့က တားမြစ်ညွှန်ကြားကြောင်း သိရသည်။
ကိုဗစ် – ၁၉ ရောဂါ ကူးစက်ပြန့်ပွားမှုကို ထိန်းချုပ်နိုင်ရန် ရည်ရွယ်ပြီး လင်းခေးမြို့နေ ပြည်သူများအနေဖြင့် နမ့်တိန်းချောင်းအတွင်းသို့ လူအများ တစ်စုတစ်ဝေးတည်း ရေးဆင်းချိုးခြင်းမပြုရန် မြို့ နယ် ကိုဗစ် – ၁၉ ရောဂါ ကာကွယ်ထိန်းချုပ်ရေးနှင့် အရေးပေါ်တုံ့ပြန်ရေးကော်မတီက ဩဂုတ်လ ၁ ရက်နေ့မှာ အစည်းအဝေး ပြုလုပ်ညှိနှိုင်းပြီး ယင်းကဲ့သို့ တားမြစ်ခဲ့ခြင်းဖြစ်ကြောင်းသိရသည်။
“ရေဆိပ်ကို မသွားဖို့ လုံးလုံးကြီးတားမြစ်လိုက်တာတော့ မဟုတ်ဘူး၊ တချို့က သွားရင်လည်း တစ်အုပ်စုကို ၁၀ ယောက်လောက်ရှိတယ်၊ အဲ့ကို ကျန်းမာရေးဖက်က မဖြစ်စေချင်ဘူး၊ မဖြစ်သင့်ဘူးပေါ့၊ အဲ့ကြောင့် သွား ရင် လူစုလူဝေးနဲ့ မသွားဖို့ သူတို့က တားမြစ်ထားတာပါ” ဟု လင်းခေးမြို့နေ စိုင်းဆေဟန်က သျှမ်းသံတော်ဆင့်ကို ပြောသည်။
ထို့အပြင် ထုတ်ပြန်ထားမြစ်ချက်များကို လိုက်နာလုပ်ဆောင်ခြင်းမရှိဘဲ ချိုးဖောက်မှုများပြုလုပ်ပါက သဘာဝဘေးအန္တရာယ် စီမံခန့်ခွဲမှုရေးဥပဒေအရ အရေးယူခြင်းခံရမည်ဖြစ်ကြောင်းလည်း သိရသည်။
“အဓိကတော့ ကိုဗစ်ရောဂါကို ကာကွယ်ထိန်းချုပ်တဲ့ အနေနဲ့ တားမြစ်ထားတာပါ၊ ရေသွားချိုးတဲ့ တချို့ သူတွေဆိုလည်း နမ့်တိန်းချောင်းဘေးမှာ ဘီယာဝိုင်းပြီး သောက်တာလည်းရှိနေသေးတယ်၊ အဲ့လိုတွေမြင်ရတော့ ကျန်းမာရေးဖက်က လူစုလူဝေးမပြုဖို့ကို လိုက်နာမှု မရှိရင် အရေးယူခံရမယ်ဆိုပြီး ထုတ်ပြန်ထား တယ်” ဟု အထက်ပါပုဂ္ဂိုလ်က ပြောသည်။
လင်းခေးမြို့နယ်တွင် ဇူလိုင်လ ၁၉ ရက်မှ ယမန်နေ့ ဩဂုတ်လ ၂ ရက်အထိ COVID-19 အတည်ပြုလူနာ ၁၃၀ ဦး တွေ့ရှိခဲ့ပြီး ယင်းတို့အနက် ၄၃ ဦးက ရောဂါသက်သာပျောက်ကင်းကာ လက်ရှိတွင် ဆေးရုံ၌တက်ရောက် ကုသဆဲလူနာ ၈၇ ဦး ကျန်ရှိနေကြောင်း သိရသည်။
Leave a Comments