သျှမ်းပြည် တောင်ပိုင်း ကလောမြို့နယ်အတွင်း ကိုဗစ် လူနာများနှင့် ထိတွေ့မှု ရှိခဲ့သည့် ဌာနဆိုင်ရာ အချို့မှ ဝန်ထမ်းများသည် ကွာရန်တင်းဝင်ရန် အတွက် အထက်အရာရှိများနှင့် အလုပ်ရှင် သူဌေးများက ခွင့်ရက်များ မပေးသဖြင့် အခက်အခဲ ကြုံတွေ့နေရကြောင်း စုံစမ်းသိရသည်။

ကလောမြို့ရှိ OK $ ရုံးတွင် အလုပ်လုပ်ဆောင်ကြသော အတူနေ ဝန်ထမ်များအနက်မှ ၄ ဦးထက်မနည်းတွင် ကိုဗစ် – ၁၉ ကူးစက်ခံနေရသော်လည်း ရုံးတွင်း ပိုးသတ်ဆေးဖြန်းမပြုလုပ်သည့် အပြင် ပိုးတွေ့ဝန်ထမ်းများ နှင့် အတူနေထိုင်သည့် ဝန်ထမ်းများအား ကွာရန်တင်း ပြုလုပ်ထားရှိစေခြင်းများလည်း မရှိကြောင်း အဆိုပါ ရုံးမှ ဝန်ထမ်းတစ်ဦးနှင့် ဆွေမျိုးတော်စပ်သူ ကလောမြို့ဒေသခံ တစ်ဦးက သျှမ်းသံတော်ဆင့်ကို ပြောသည်။

“မနေ့က သြဂုတ် ၁ ရက်မှာ အဲ့ရုံးက ပိုးတွေ့လူနာ တစ်ယောက်ထပ်တိုးတယ်၊ အခုဆို အဲ့ရုံးမှာက ပိုးတွေ့ လူနာ ၄ ဦးထက်မနည်းရှိနေပြီ၊ သူတို့ အလုပ်ရှင်နဲ့ သူတို့အထက်အရာရှိတွေက ဝန်ထမ်းတွေရဲ့ ကျန်းမာရေး အတွက် လုပ်ဆောင်မှုဘာမှမရှိဘူး၊ ရုံးမှာဆေးဖြန်းတာတောင်မရှိဘူး၊ ဝန်ထမ်းတွေကိုလည်း ကွာရန်တင်း မလုပ်ခိုင်းတဲ့ အပြင် ခွင့်ရက်တောင် မပေးဘူး” ဟု ကလောဒေသခံတစ်ဦး ဆိုသည်။

လက်ရှိမှာ အဆိုပါရုံးကို ဆက်လက်ဖွင့်လှစ်နေသည့်အတွက် ရုံးဝန်ထမ်းများမှတစ်ဆင့် မြို့တွင်းသို့ ရောဂါပိုး ပျံ့နှံ့ကူးစက်မှာလည်း ဒေသခံများ စိုးရိမ်နေကြောင့် သိရသည်။

“ရုံးဝန်ထမ်းများမှာ ကလောမြို့နဲ့ အောင်ပန်းမြို့ ဒေသခံများဖြစ်ကြတယ်၊ သူတို့ကနေ တစ်ဆင့်မြို့တွင်း ကူး စက်မှုတွေကလည်း များလာနိုင်တယ် အဲ့ကြောင့် ဝန်ထမ်းတချို့က ခွင့်တာင်းကြတယ်၊ မရတော့ တချို့ က အလုပ်ထွက်ချင်ကြတယ်၊ ထွက်ရင်လည်း ပြီးခဲ့တဲ့ ၇ လပိုင်းက သူတို့ရဲ့ လုပ်အားခ မရမှာလည်း စိုးရိမ် နေကြတယ်” ဟု ၎င်းက ဆိုသည်။

ကလောမြို့ရှိ OK $ ရုံးသည် wave money ကဲ့သို့သော mobile money ဝန်ဆောင်မှု လုပ်ငန်းတစ်ခု ဖြစ်ပြီး ကလောမြို့နှင့် အောင်ပန်းမြို့တွင်း အလုပ်အကိုင်ရှားပါးမှုအပေါ် အခွင့်ကောင်းရယူကာ ဝန်ထမ်းများ၏ ရပိုင်ခွင့်များအား ချိုးဖောက်လျက်ရှိကြောင်းလည်း ကလောဒေသခံ အသက် ၃၅နှစအရွယ် အမျိုးသမီး တစ်ဦးကပြောသည်။

“ကလောက အလုပ်ရှားတယ် တခြားအလုပ်တွေသိပ်မရှိဘူး အဓိက က ဟိုတယ်နဲ့ စားသောက်ဆိုင်ပဲရှိတယ်၊ အောင်ပန်းကဆိုလည်း ကုန်စိမ်းပွဲရုံတွေနဲ့ ဆိုင်မှာပဲ အလုပ်ရနိုင်တယ်လေ၊ Lonkdown လို့သာ ဆိုတယ် အောင်ပန်းကကုန်စိမ်းဈေးမှာ စည်ကားနေတာပဲ” ဟု ၎င်း အမျိုးသမီးကဆိုသည်။

လုပ်ငန်းရှင်များအနေဖြင့် မိမိတို့အကျိုးအမြတ်သာမကြည့်ဘဲ တာဝန်ယူမှု တာဝန်ခံမှုရှိသော စီးပွားရေးလုပ်ငန်းများကို လုပ်ဆောင်ကြပါရန် တောင်းဆိုလိုကြောင်း ဒေသခံများက ပြောသည်။