စစ်ကောင်စီက တရုတ်ထုတ် ကိုဗစ်-၁၉ ကာကွယ်ဆေးကို အသက် (၆၅) နှစ်အထက်၊ ပရဟိတများ၊ ဝန်ထမ်းများ၊ ဈေးသည်များကို စတင်ထိုးပေးသွားမည်ဖြစ်ကြောင်း စုံစမ်းသိရှိရသည်။

သျှမ်းပြည် အတွင်းရှိ တချို့မြို့နယ်များတွင် ဇူလိုင် (၃၀) ရက်နေ့က စတင်ပြီး ကာကွယ်ဆေး စတင်ထိုးပေးနေကြောင်း သိရသည်။

“ကျနော်ထိုးပြီးပြီ ဘာလက္ခဏာမှတော့မပြဘူး။ ဘာကြောင့်ထိုးလဲဆိုတော့ ကျနော်တို့က ပရဟိတတွေ လုပ်တော့ ကိုယ်က ရောဂါသယ်ဆောင်တဲ့သူ မဖြစ်ချင်ဘူး။ တစ်ချို့လည်း ယုံတဲ့သူရှိသလို မယုံတဲ့သူလည်း ရှိတယ်” ဟု မိုင်းကိုင်မြို့ရှိ နာရေးကူညီမှုအသင်း တစ်ဦးက သျှမ်းသံတော်ဆင့်ကိုပြောသည်။

ယနေ့ သြဂုတ် (၂) ရက်နေ့သည် မြို့နယ်တစ်ချို့မှာ ကာကွယ်ဆေး လာရောက်ထိုးနှံသူများပြားကြောင်း စုံစမ်းသိရှိရသည်။

“ကျနော်တို့ ဒီနေ့ သွားထိုးမလို့ လုပ်တာ လူတအားများလို့ မထိုးလိုက်ရဘူး။ ဘာကြောင့် ထိုးချင်လဲဆိုတော့ ကိုယ့်ဒေသက ဆရာဝန်တွေလည်း ထိုးကြတယ်။ ကိုယ်ကိုယ်တိုင်လည်း သူတို့ထိုးပေးတဲ့ ဆေးကို လေ့လာထားတယ်။အဲ့ကြောင့် ထိုးချင်တာပါ” ဟု ပင်လုံဒေသခံ လူမှုရေးလှုပ်ရှားသူ တစ်ဦး က သျှမ်းသံတော်ဆင့် ကိုပြောသည်။

သျှမ်းပြည်တွင်းရှိ မြို့နယ်တစ်ချို့သည် ဒေသခံ ဆရာဝန်များ၊ သူနာပြုများကို ယုံကြည်သည့်အတွက် ထိုးနှံခြင်းဖြစ်ကြောင်း ပြောဆိုကြသည်။

လက်ရှိ သျှမ်းပြည်နယ်တွင် ကိုဗစ်-၁၉ တတိယလှိုင်းသည် ကူးစက်မှု မြင့်မားပြီး သေဆုံးသူ များပြားလာသည့်အတွက် ကာကွယ်ဆေးကို ထိုးချင်ကြကြောင်းလည်း စုံစမ်းသိရှိရသည်။

တစ်ချို့ဒေသသည် လာရောက်ထိုးနှံသူ များပြားသည့်အတွက် ဆေးပြတ်သွားကြောင်းလည်း သိရှိရသည်။