သျှမ်းပြည်အရှေ့ပိုင်း တာချီလိတ်မြို့တွင် ကိုဗစ် – ၁၉ ပိုးတွေ့လူနာ ထွက်ပြေးလွတ်မြောက် သွားသဖြင့် ဒေသခံများစိုးရိမ်ကြောက်လန့်နေကြောင်း စုံစမ်းသိရသည်။

ယမန်နေ့ (ဇူလိုင် ၂၉) ရက်တွင် သျှမ်းပြည် အရှေ့ပိုင်း တာချီလိတ်မြို့ရှိ ဆေးရုံဟောင်းအတွင်း၌ ကိုဗစ် – ၁၉ ရှိ/မရှိ လာရောက်စစ်ဆေးရာမှ ပိုးတွေ့ရှိရသည်ကို သိရှိသွားပြီးနောက် ၎င်းအမျိုးသားတစ်ဦးသည် ထွက်ပြေး လွှတ်မြောက်သွားကြောင်း သိရသည်။

“အစကတော့ သူက ပိုးတွေ့သူနဲ့ဆက်စပ်မှု ရှိထားလို့ ကွာရန်တင်း နေအိမ် ကွာရန်တင်းဝင်ထားရတယ်လည်း ကြားပါတယ်၊ မနေ့က ဆေးရုံဟောင်းဝင်းအတွင်းမှာ လာစစ်ကြတော့ သူ့မှာလည်း ပိုးတွေ့သွားတယ်၊ ဘယ် လိုစိတ် ကူးပေါက်သွားလဲမသိဘူး၊ သူ့မှာပိုးတွေ့တယ်လို့ ကြားတာနဲ့ လူနာတင်ကားလာခေါ်ဖို့ စောင့်နေတဲ့ ချိန်မှာ ထွက်ပြေးသွားတာပဲ” ဟု တာချီလိတ်မြို့ခံ ပြည်သူတစ်ဦး က သျှမ်းသံတော်ဆင့်ကို ပြောသည်။

ထွက်ပြေးသွားသည့် အမျိုးသားသည် တာချီလိတ်မြို့ ပုန်းထွန်ရပ်ကွက်တွင် နေထိုင်သူဖြစ်ပြီး ဆေးရုံ ဟောင်းမှာ ကိုဗစ် ရှိ/မရှိ လာရောက်စစ်ဆေးစဉ် ပိုးတွေ့ကြောင်း သိရပြီးနောက် လူနာတင်ယာဉ်လာ ခေါ်သည်ကို မစောင့်တော့ဘဲ ထွက်ပြေးသွားကြောင်းနှင့် ယခု ဖြစ်စဉ်မှာ ဒုတိယမြောက်ဖြစ်ကြောင်း သိရသည်။

“အရင်ကလည်း ဒီလိုထွက်ပြေးတဲ့ တစ်ယောက်ရှိဖူးပါတယ်၊ သူကလည်း အမျိုးသားပဲ၊ အခုချိန်ထိ သူ့ကို ရှာလို့မတွေ့သေးဘူး၊ ဆိုတော့ကျနော်တို့ တိတိကျကျ သိရတဲ့ ပိုးတွေ့ရင်း ကုသမှု မခံယူဘဲ အပြင်ရောက်နေ သူက နှစ်ယောက်ရှိနေပြီ၊ ပြောရရင် သူတို့က ပိုးသွားဖြန့်တယ်လို့ပဲ မြင်မိတယ်၊ အဲ့ကြောင့် ပြည်သူတွေက လည်းလန့်နေပြီ၊ ဒီကိစ္စတွေကိုလည်း ကောင်စီက လူတွေက ဘာမှ လုပ်နိုင်ပုံ မပေါ်ဘူး” ဟု အထက်ပါ ပုဂ္ဂိုလ် ကပြောသည်။

တာချီလိတ်မြို့တွင်း ထိန်းချုပ်ရခက်နေသည့် ကိုဗစ် -၁၉ တတိယလှိုင်းတွင် ယခုကဲ့သို့ ထွက်ပြေးလွှတ် မြောက်နေသည့် ပိုးတွေ့လူနာများရှိနေသည့်အပြင် သက်ဆိုင်ရာ ဝာာဝန်ရှိသူများကလည်း ကိုဗစ် – ၁၉ ရောဂါ ထိန်းချုပ်နိုင်ရေးအတွက် စနစ်တကျ လုပ်ဆောင်နိုင်ခြင်း မရှိကြောင်း ၎င်းကပြောသည်။

တာချီလိတ်မြို့တွင်းတွင် ကိုဗစ် – ၁၉ တတိယလှိုင်းအတွင်း ရောဂါပိုး ကူးစက်ခံရသူ အတည်ပြုလူနာ စုစုပေါင်း ၅၀၀၀ နီးပါးရှိနေသော်လည်း သက်ဆိုင်ရာတာဝန်ရှိသူများနှင့် စစ်ကောင်စီ လက်အောက်ခံ တို့၏ ညွှန်ကြားချက်များသည် ထိရောက်မှု မရှိသည့်အတွက် ဒေသခံများက စိုးရိမ်ပူပန်များ ရှိနေကြောင်း လည်း သိရသည်။