သျှမ်းပြည်မြောက်ပိုင်း ကွတ်ခိုင်မြို့နယ် တာမိုးညဲမြို့ နမ့်မောကျေးရွာအုပ်စု နမ့်ဆာကျေးရွာတွင် ကျွဲကျောင်းသား (၂) ဦး လက်နက်ကြီးထိမိကာ တဦးသေဆုံးပြီး၊ တဦး ဒဏ်ရာအပြင်ထန်းရရှိကြောင်း စုံစမ်းသိရှိရသည်။
ဖြစ်စဉ်မှာ ဇူလိုင် ၂၇ မနက် ၁၀ နာရီခန့်တွင် အသက် (၂၀) အငိုနှင့် (၁၄) နှစ်အရွယ် အယိုင်တို့သည် ကျွဲသွားကျောင်းရင် မပေါက်ကွဲသေးသည့် လက်နက်ကြီး ထိမိသောကြောင့် ထိုနေရာတွင် အငို ဆိုသူက သေဆုံးသွားပြီး အယိုင်က ဒဏ်ရာပြင်ထန်းစွာရရှိခဲ့ကြောင်းသိရသည်။
“ အကြီးကောင်က ပွဲချင်းပြီးသေသွားတာ။ အငယ်တယောက်တော့ ဗုံးစမှန်းလို့ မျက်နှာတွေထိတယ်။ ခြေထောက်တွေကောထိတယ်။ ကျွဲကျောင်းသွားရင်ဖြစ်တာ။ အဲနေရာက အရင်က ရွာဟောင်းဖြစ်တယ်” ဟု နမ့်ဆာရွာခံ အမျိုးသမီးတဦးက သျှမ်းသံတော်ဆင့်ကို ပြောသည်။
ဒဏ်ရာပြင်ထန်းစွာရရှိသည့် အယိုင်သည် တာမိုးညဲဆေးရုံးတွင် လက်ရှိဆေးကုသမှုခံယူနေရကြောင်း သိရသည်။
“ သူကတော့ ကျန်းမားရေးတော့ သိပ်စိတ်မပူရဘူး။ မျက်နှာတွေထိထားတော့ ရောင်နေတယ်။ ခြေထောက်တွေ နာနေတာ။ လမ်းလျှောက်လို့မရသေးဘူး” ဟု အထက်ပါ အမျိုးသမီးက ပြောသည်။
ထိုနေရာတွင် ဒေသခံများ တောင်ယာ၊ လယ်ယာသွားသည့်လမ်းဖြစ်သည့်အပြင် ကျွဲ၊နွားများကို လွတ်ထားသည့် နေရာဖြစ်ကြောင်းသိရသည်။
ထိုသို့ဖြစ်ပွားမှုကြောင့် ပြည်သူများကြောက်နေရပြီး တောင်ယာများကို သွားရန်အတွက် စိုးရိမ်နေရကြောင်း၊ သက်ဆိုင်ရာများက လာရောက်ဖြေရှင်းစေလိုကြောင်း အထက်ပါ နမ့်ဆာရွာခံ အမျိုးသမီးက ဆိုသည်။
“ ကျမတို့ တောင်ယာသွားတဲ့လမ်းလည်းဟုတ်တယ်။ ကျမတို့ကြောက်တာပေါ့။ ခုဆိုတောင်ယာတွေသွားဖို့တောင် မသွားရဲတော့ဘူး။ ဗုံးတွေကျန်နေသေးတယ်လို့ကြားတယ်။ သက်ဆိုင်ရာသူတွေကို လာရှင်းပေးစေချင်တယ်” ဟု နမ့်ဆာရွာခံ အမျိုးသမီးက ပြောသည်။
ပေါက်ကွဲမှုမဖြစ်ခင်က ဇူလိုင် ၁၉ တွင် နမ့်ဆာရွာအနီးပတ်ဝန်းကျင်တွင် တိုင်းရင်းသားလက်နက်ကိုင်များနှင့် စစ်ကောင်စီတပ်တို့အကြားတိုက်ပွဲဖြစ်ပွားခဲ့ကြောင်း ဒေသခံများပြောပြချက်အရသိရသည်။
Leave a Comments