သျှမ်းမြောက် ကျောက်မဲမြို့နယ် ဟူးဆွန်ကျေးရွာတွင် လသားအရွယ်ကလေးငယ်အပါအဝင် စစ်ဘေးရှောင် ပြည်သူ (၈၀)ကျော် ရောက်ရှိနေပြီး အစားအသောက်နှင့် နေထိုင်ရန် အခက်ခဲဖြစ်နေကြောင်း သိရသည်။
“ပြီးခဲ့တဲ့ ဇူလိုင် ၂၆ ရက်နေ့ ညနေပိုင်း ကတည်းက ကိန်ကိုင်ရွာမှာနေတဲ့ စစ်ရှောင်တွေ စပြီး ရောက်လာတာ၊ ဒီနေ့ထိဆိုရင် (၈၁) ယောက်ရှိတယ်၊ လသားအရွယ် ကလေးငယ်လည်းပါတယ်။ သက်ကြီးရွယ်အိုတွေလည်းပါတယ်” ဟု ဟူးဆွန်ကျေးရွာ ဒေသခံတစ်ဦးက သျှမ်းသံတော်ဆင့်ကို ပြောသည်။
အဆိုပါ ကျေးရွာအနီးတွင် တိုင်းရင်းသား လက်နက်ကိုင်များ စစ်ရေးတင်မာနေမှုရှိပြီး တိုက်ပွဲဖြစ်လာလျင် ထိခိုက်မှုများ ရှိနိုင်သည့်အတွက် စိုးရိမ်ကာ ထွက်ပြေးလာခြင်းဖြစ်ကြောင်း ၎င်းက ပြောသည်။
“အားလုံးက ကိန်ကိုင်ဒေသခံတွေပဲ၊ အဲဒီရွာအနီးနားမှာရှိတဲ့ ဟိန်းဝိုး၊ ပန်တောင်းကျေးရွာဘက်မှာ RCSS နဲ့ SSPP/SSA ၊ TNLA တို့ မကြာခဏ ပစ်ခတ်မှုဖြစ်နေတယ်၊ တိုက်ပွဲတွေ ပိုမိုပြင်းထန်လာမှာကြောက်လို့၊ ရွာနဲ့လည်း အရမ်းနီးနေတော့ ကလေးနဲ့ လူကြီးတွေကို ထိခိုက်မှာစိုးရိမ်လို့ ထွက်ပြေးလာကြတာ” ဟု ဆိုသည်။
ယရက်ပိုင်း ပစ်ခတ်မှုများ ငြိမ်နေသည့်အတွက် ရွာမှ ရှောင်ထွက်လာခဲ့တာဖြစ်ကြောင်း၊ စစ်ဘေးရှောင်များထဲတွင် အမျိုးသား (၂၂)ဦးနှင့် အမျိုးသမီး (၅၉)ဦးရှိနေပြီး ကျောက်မဲမြို့ပေါ်ရှိ ဆွေမျိုးများထံ သွားရောက်ခိုလှုံနေသူများလည်း (၃၀)ခန့်ရှိကြောင်း သိရသည်။
“ကျောက်မဲမြို့ပေါ်မှာက ကိုဗစ်လူနာတွေ အရမ်းများနေတော့ ရောဂါကိုလည်း ကြောက်တယ်၊ တချို့က မြို့ထဲမှာရှိတဲ့ ဆွေမျိုးတွေဆီ ဆင်းသွားတာရှိတယ်၊ အများစုကတော့ ဒီရွာမှာပဲ လာနေနေရတာ၊ အစားအသောက်နဲ့ နေထိုင်ဖို့ ခက်ခဲနေတယ်၊ တစ်ချို့ဆို ဘာမှကို မယူလာရဘူး” ဟု ဒေသခံတစ်ဦးက ပြောသည်။
အဆိုပါ စစ်ဘေးရှောင်များအပါအဝင် မိုင်းငေါ့မြို့တွင် စစ်ဘေးရှောင် (၆၀၀)ခန့်ရှိနေကြောင်း သိရသည်။
ယခုချိန်တွင် လက်ဖက်ခူးဆွတ်ရသည့်ရာသီဖြစ်သော်လည်း တိုင်းရင်းသားလက်နက်ကိုင်များ မကြာခဏတိုက်ပွဲဖြစ်ပွားနေမှုကြောင့် ကျေးရွာဒေသခံများ အလုပ်လက်မဲ့ဖြစ်ကာ စစ်ဘေးရှောင်နေရကြောင်း သိရသည်။
