သျှမ်းပြည် တောင်ကြီးမြို့တွင် ပြည်သူများ၏ ကျန်းမာရေး စောင့်ရှောက်မှုကို နည်းမျိုးစုံ ပေးနေသည့် လုပ်ဆောင်ပေးနေသည့် CDM ကျန်းမာရေးဝန်ထမ်းများကို စစ်ကောင်စီ လိုက်လံရှာဖွေနေကြောင်း စုံစမ်းသိရသည်။
လက်ရှိ ကိုဗစ် -၁၉ တတိယလှိုင်းတွင် ပြည်သူအများအပြားကူးစက်ခံနေရပြီး၊ သေဆုံးမှုနှုန်းမြင့်တက်လာသည့် အလျောက် CDMကျန်းမာရေးဝန်ထမ်းများသည် မိမိသက်နိုင်သည့်ဘက်မှ ပြည်သူ့ကျန်းမာရေး ကို စောင့်ရှောက်မှုပြုလုပ်နေသော်လည်း စစ်ကောင်စီ အုပ်စုက CDM ကျန်းမာရေးဝန်ထမ်းများကို လိုက်လံဖမ်းဆီးမှု များ၊တားဆီးပိတ်ပင်မှုများပြုလုပ်နေကြောင်း သိရသည်။
“သူတို့လက်အောက်မှာမလုပ်ချင်တာကို အပစ်တဲ့၊ မလုပ်ချင်လို့ မလုပ်တာလေ၊ အခု CDM ကျန်းမာရေး ဝန်ထမ်းတွေက ကိုယ်တတ်နိုင်တဲ့ဖက်ကနေ ပြည်သူတွေရဲ့ ကျန်းမာရေးကို စောင့်ရှောင်ပေးနေတာကို လည်း ရာဇဝတ်သားတွေလို လိုက်ဖမ်းပြီးတော့ လိုက်တားဆီးပိတ်ပင်နေတာ” ဟု တောင်ကြီး CDM လုပ်နေသည့် သူနာပြုတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီ လက်ထက်တွင် မြန်မာတဝှမ်းလုံး နည်းတူ သျှမ်းပြည်တွင်လည်း ကိုဗစ်-၁၉ ကူးစက်ခံရသူနေ့စဉ်မြင့်တက်လာပြီး ဆေးရုံတွင် ကျန်းမာရေးစောင့်ရှောက်မှု အားနည်းလာကာ ကိုဗစ်-၁၉ လူနာများ မိမိနေအိမ်တွင်သာ ဆေးကုသခံယူနေရကြောင်းသိရသည်။
ထို့ပြင် စစ်ကောင်စီ ဘက်မှလည်း အောက်စီဂျင်လိုအပ်သည့် ကိုဗစ်-၁၉ များ အောက်စီဂျင်မရရှိနိုင်အောင် နည်းမျိုးစုံ ပိတ်ပင် တားဆီးမှုပြုလုပ်နေသည်။
သို့သော် CDM ပြုလုပ်သည့် ကျန်းမာရေး ဝန်ထမ်းများ က ကိုဗစ်-၁၉ ကူးစက်ခံရသည့် လူနာများကို ဖုန်းဖြင့်သော်လည်း အွန်လိုင်းဖြင့်သော်လည်း လိုအပ်ပါက နေအိမ်ထိ လိုက်လံ ကြည့်ရှုမှုပြုလုပ်ပေးနေကြောင်း လည်း သျှမ်းပြည်တောင်ပိုင်း တောင်ကြီးမြို့ ဒေသခံများကပြောသည်။
“ ကျမတို့ အခုCDM လုပ်နေပေမယ့် လူနာတွေကို ဒီတိုင်းမထားပါဘူး။ လိုအပ်ရင် လိုအပ်သလို ကျနော်တို့ ကြည့်ပေးနေပါတယ်။ ဒါပေမယ့် စစ်ကောင်စီကတော့ ကျမတို့ကို လိုက်နှောက်ယှက်နေတယ်။ ဆေးကုလို့မရအောင်လုပ်တယ်” ဟု CDM ပြုလုပ်နေသည့် ကျန်းမာရေးဝန်ထမ်း အမျိုးသမီး တစ်ဦးက ဆိုသည်။
စစ်အာဏာရှင် စနစ်ကို မလိုလားသည့်အတွက် စစ်တပ်လက်အောက်တွင် အလုပ်မလုပ်လိုကြောင်း၊ သို့သော် စစ်ကောင်စီ အုပ်စု တားဆီးပိတ်ပင်မှုကြား ပြည်သူ့ကျန်းမာရေးကို နည်းမျိုးစုံ စောင့်ရှောက်သွားမည် ဟု သူမက ပြောသည်။
စစ်ကောင်စီ အုပ်စု မှ CDM ပြုလုပ်သည့် ကျန်းမာရေး ဝန်ထမ်းများကို ဆေးရုံသို့ ပြန်လည်အလုပ်လာလုပ်ရန် နည်းမျိုးစုံ ပြောဆိုခဲ့သော်လည်း CDM ဝန်ထမ်းများက စစ်ကောင်စီ အနေဖြင့် စစ်တန်းလျားတွင် ပြန်ကြပြီး၊ စစ်တပ်တာဝန်ထမ်းဆောင်ပြီး၊ ပြည်သူ့အာဏာကို ပြည်သူ့ထံပြန်ပေးပါက ကိုယ်တာဝန်ကျသည့် ဆေးရုံသို့ ချက်ချင်းပြန်မည်ဟုလည်း ဆရာဝန်များက ပြောဆိုလိုက်သည်။
“ ကျန်းမာရေးဝန်ထမ်းတွေ ကျန်းမာရေး ဌာနကို ပြန်လာစေချင်ရင် စစ်ကောင်စီလည်း စစ်တပ်၊စစ်တန်းလျား အရင်ပြန်စေချင်တယ်။ စစ်တပ်က ချက်ချင်းအာဏာလွှဲရင်ကျမတို့လည်း ချက်ချင်း အလုပ်ပြန်ဝင်မယ်” ဟု သျှမ်းမြောက် မှ သူနာပြု ဆရာမတစ်ဦးက ဆိုသည်။
စစ်တပ်မှ နိုင်ငံတော် အာဏာသိမ်းယူပြီးနောက် တစ်နိုင်ငံလုံးရှိ ပြည့်သူ့ဝန်ထမ်းတချို့သည် သက်ဆိုင်ရာ ကိုယ့်ဌာနအလိုက် CDM လုပ်ဆောင်သည့်ဝန်ထမ်းဌာနများအနက် ကျန်းမာရေးဝန်ထမ်းဌာနသည် CDM လုပ်ဆောင်မှုတွင် ပါဝင်မှုအများဆုံး ဖြစ်ပါသည်။
