သျှမ်းပြည်မြောက်ပိုင်း သိန္နီမြို့နယ် ကျေးရွာတချို့တွင် SSPP မှ ကိုဗစ်-၁၉ ကာကွယ်ဆေးထိုးရမည့်ဟု သတင်းထွက်ပေါ်လာ သောကြောင့် ပြည်သူများကြောက်လန့်ပြီးထွက်ပြေးနေလျက်ရှိကြောင်း စုံစမ်းသိရှိရသည်။
သိန္နီမြို့နယ်တွင် ကိုဗစ် -၁၉ ကာကွယ်ဆေးကို သျှမ်းပြည်တိုးတက်ရေးပါတီSSPP/SSA လာရောက်ထိုးပေးမည်ဟု သတင်းထွက်ပေါ်လာသောကြောင့် ပြည်သူများက ထွက်ပြေးတိမ်းရှောင်နေကြသည်။
“ တချို့တွေကကြောက်ပြီး မြို့ထဲလာနေတာရှိတယ်။ တချို့ လယ်ထဲသွားနေကြတယ်။ ခုက ရောဂါနဲ့ အိမ်မှာတံခါးပိတ်နေရင် အကြောက်တရားလွန်းပြီးတော့ ရောဂါရနေကြမယ်။ သတင်းက ကောလဟာလသတင်းပါ။ တကယ်မဟုတ်ပါဘူး” ဟု သိန္နီမြို့တွင်နေထိုင်သည့် စိုင်းဝမ်းလှိုင်းခမ်းက ပြောသည်။
သိန္နီမြို့နယ်တွင် သတင်းတုများထွက်ပေါ်လာသောကြောင့် ပြည်သူများအနေဖြင့် မှန်ကန်သည့် သတင်းကို ယုံကြည်သင့်ကြောင်း စိုင်းဝမ်းလှိုင်းခမ်းက ဆိုသည်။
“ သိန္နီမြို့မှာ ခဏခဏ သတင်းတုတွေထွက်ပေါ်နေတယ်။ အရင်ကလည်း လူဖမ်းမယ်ဆိုတဲ့ သတင်းနဲ့ သူတို့ထွက်ပြေးဖူးသေးတယ်။ ပြည်သူတွေအနေနဲ့ အိမ်မှာနေပြီး မှန်ကန်တဲ့သတင်းတွေနားထောင်သင့်တယ်။ တစ်ခြားနေရာဘာတွေဖြစ်နေလဲဆိုတာ လေ့လာသင့်တယ်” ဟု စိုင်းဝမ်းလှိုင်းခမ်းက ထပ်လောင်းပြောသည်။
ထိုသို့ သိန္နီမြို့နယ်တွင် ကိုဗစ် -၁၉ ကာကွယ်ဆေးထိုးပေးနေသည့် သတင်းသည် သတင်းမှားကြောင့် ပြည်သူများစိုးရိမ်ထိတ်လန့်နေကြပြီး၊ ထိုကာကွယ်ဆေးသည် တရုတ်ဘက်မှ လာသည့် ကာကွယ်ဆေးဟုလည်း မဟုတ်မမှန်ပြောဆိုနေကြကြောင်း သိန္နီဒေသခံ တစ်ဦး ကပြောသည်။
ကိုဗစ် ၁၉ ကာကွယ်ဆေးကိုထိုးပေးနေသည့် ကိစ္စနှင့် ပတ်သက်ပြီး SSPP/SSA ပြောခွင့်ရ ဗိုလ်မှူးကြီး စိုင်းဖုန်းဟန်က “ ဒီသတင်းက ကောလဟလသတင်းပါ။ ကျနော်တို့အခု ပစ္စည်းတောင်း အကုန်မရသေးဘူး။ ကျနော်တို့ ဌာနချုပ် ဝမ်းဟိုင်းမှာအလုပ်လုပ်တဲ့သူတွေကိုပဲ အရင်ဆုံးထိုးပေးနေတာပါ။ ပြည်သူတွေကို ထိုးပေးတာမရှိဘူး” ဟု ပြောသည်။
လွန်ခဲ့သည်ရက်ပိုင်း ဇူလိုင်၂၄ ရက် ကျောက်မဲမြို့၊ သီပေါမြို့တို့တွင် ကိုဗစ်-၁၉ ကာကွယ်ဆေးထိုးရန် အတွက် သေနတ်ထောက်ပြီးထိုးခိုင်းသည့် သတင်းထွက်ပေါ်ခဲ့ကြောင်း သိရသည်။
Leave a Comments