သျှမ်းတောင် ညောင်ရွှေမြို့နယ်ရှိ အင်းလေးဒေသတွင် ကိုဗစ်ကူးစက်ခံရသည့် လူနာ မြင့်တက်နေပြီး သေဆုံးသူ(၃၀)နီးပါးရှိနေကြောင်း၊ ကိုဗစ်ကာကွယ်ရေးသုံးပစ္စည်းများလည်း ခက်ခဲနေကြောင်း စုံစမ်း သိရသည်။
ကိုဗစ်လူနာများလာသည့်အတွက် သယ်ယူပို့ဆောင်ရာမှာ ခက်ခဲ့သည့်အပြင် ကာကွယ်ရေးသုံးပစ္စည်းများလည်း နည်းပါးနေကြောင်း အင်းလေးဒေသ လူမှုရေး အသင်းဝင်များက ပြောသည်။
“ငွေအား လူအားတွေ အားနည်းတာပေါ့၊ ခုဆို ကိုဗစ်ကာကွယ်ရေးသုံး ပစ္စည်းတွေလည်း ပြတ်လုနီးပါးပဲ၊ အခက်ခဲကြားကနေ ဒီတိုင်း ရှေ့ဆက်ပြီး သွားနေရတာပါ” ဟု အင်း နယ်စည်းမခြားအဖွဲ့မှ တာဝန်ရှိသူတစ်ဦးက သျှမ်းသံတော်ဆင့်ကို ပြောသည်။
လတ်တလောတွင် အလှူရှင်များရဲ့ လှူဒါန်းမှုဖြင့်သာ လုပ်ဆောင်နေကြရတာဖြစ်ကြောင်း၊ PPE ဝတ်စုံများကိုလည်း လူနာအခြေအနေပေါ်မူတည်ပြီး တစ်ရက်လျှင် အစုံ(၄၀၊ ၅၀)ခန့်ထိ အသုံးပြုနေရတာဖြစ်ကြောင်း သိရသည်။
အင်းလေးဒေသတွင် ရပ်ကွက် (၁၃)ခု၊ လူဦးရေ (၄၀၀၀)ခန့်ရှိသည့် အင်းလေးဒေသ ဟဲယာရွာမတိုက်နယ်တွင် ကိုဗစ်လူနာများအား ကုသပေးနေမှု အားနည်းကြောင်း၊ ကူးစက်မှု ထပ်မံမြင့်တက်လာပါက ကုသရန် ပိုမိုခက်ခဲနိုင်ပြီး လူနာထားရှိရန်နေရာလည်း ခက်ခဲမှုများရှိလာနိုင်ကြောင်း ၎င်းက ဆက်ပြောသည်။
“တိုက်နယ်ဆေးရုံမှာက ကျန်းမာရေးဝန်ထမ်းအင်အားနည်းတော့ ဆေးကုသပေးဖို့က ခက်ခဲတယ်၊ အဲ့တော့ ရွာမှာ ရှိတဲ့အင်အားလေးနဲ့ပဲ ကိုဗစ်ကုသရေးစင်တာ ကြိုးစားပြီး ဖွင့်ထားတာပါ၊ ပြည့်စုံတဲ့ ကုသရေးစင်တာတော့မဟုတ်ဘူးပေါ့၊ လူနာတွေ ထပ်တိုးလာရင် ထားဖို့နေရာတွေ ခက်ခဲလာနိုင်တယ်” ဟု ဆိုသည်။
အင်းလေးဒေသ ဟဲယာရွာမတိုက်နယ်တွင် ကုသရေးစင်တာ (၄)ခု ဖွင့်လှစ်ထားပြီး လူနာ (၁၀၀)ကျော် ရှိနေကြောင်း သိရသည်။
ထို့အပြင် အင်းလေးဒေသတွင် နေ့စဉ်နှင့်အမျှ ကိုဗစ်လူနာသေဆုံးမှုများရှိနေပြီး အောက်ဆီဂျင်ခက်ခဲမှုများလည်းရှိနေကြောင်း အင်းလေးဒေသခံ ဆရာဝန်တစ်ဦးက ပြောသည်။
“သေဆုံးတာတွေလည်းရှိတယ်၊ လူနာတွေက နေ့တိုင်းတိုးနေတော့ အောက်ဆီဂျင်က ပိုပြီးခက်ခဲလာတယ်၊ အောက်ဆီဂျင်ရဖို့ ဆက်ပြီးခက်ခဲနေမယ်ဆိုရင် သေဆုံးလူနာတွေလည်း ပိုများလာနိုင်တယ်” ဟု အထက်ပါ ဆရာဝန်က ပြောသည်။
အင်းလေးဒေသတွင် ကိုဗစ်ကူးစက်မှုနှုန်း မြင့်မားလာသည့်အတွက် WHO မှ Public Health နဲ့ပတ်သက်ပြီး ဆရာဝန်တစ်ဦးကို အကူညီတောင်းထားကြောင်း၊ ဒေသခံပြည်သူများအား ကာကွယ်ရေး၊ ကုသရေးတို့ကို ပညာပေးဆောင်ရွက်သွားမည်ဖြစ်ကြောင်း လှူမှုရေးအသင်းဝင်တစ်ဦးထံမှ သိရသည်။
အင်းလေးဒေသပါဝင်သည့် ညောင်ရွှေမြို့နယ်ကို ပြီးခဲ့သည့် ဇူလိုင် (၂၅)နေ့က Stay at home မြို့နယ်အဖြစ် စစ်ကောင်းစီလက်အောက်ခံ ကျန်းမာရေးနှင့်အားကစားဝန်ကြီးဌာနမှ ထုတ်ပြန်ထားသည်။
ညောင်ရွှေမြို့နယ်တွင် ယမန်နေ့အထိ ကိုဗစ်−၁၉ ရောဂါပိုး ကူးစက်ခံရသည့်လူနာ (၇၆၅)ဦး ရှိခဲ့ပြီး ယနေ့သေဆုံးသူ (၃)ဦးအပါအဝင် သေဆုံးလူနာ (၂၉)ဦးရှိကြောင်း၊ ဆေးရုံဆင်းခွင့်ရသည့် လူနာ (၃၂၉)ဦး ရှိနေကြောင်း သိရသည်။
Leave a Comments