ကိုဗစ် တတိယလှိုင်း ပျံ့နှံကူးစက်မှု မြင့်မားမှုကြောင့် တစ်လကျော် ပိတ်ထားသည့် လားရှိုးမြို့တွင်းမှ စျေးများကို အကန့်အသတ်ဖြင့် ပြန်လည်ဖွင့်လွတ်မည် ဖြစ်ကြောင်း သိရသည်။

ပြီးခဲ့သည့် ဇွန်လ ၂၃ လ တွင် ပိတ်ခဲ့ရသည့် လားရှိုးမြို့တွင်း စျေးများအနက် ဆန်ဆိုင်၊ ဆီဆိုင်၊ သား/ငါး ဆိုင်များ နှင့် ဆေးဝါးပစ္စည်းများကို ကျန်းမာရေး စည်းကမ်းချက်များနှင့် အညီ ပြန်လည်ဖွင့်လှစ်သွား မည်ဖြစ်ကြောင်း လားရှိုးမြို့နယ် မြို့နယ်စည်ပင် သာယာရေးကော်မတီမှ ဒုတိယညွှန်ကြားရေးမှူး ဦးကျော်ဇင်က သျှမ်းသံတော်ဆင့် ကိုပြောသည်။

“ပိတ်ထားတာလည်း ကြာပြီဆိုတော့ ပြန်ဖွင့်တာပါ၊ ပြီးတော့ နိုင်ငံတော် ကျန်းမာရေးနဲ့ အားကစားဝန် ကြီးဌာနက ထုတ်ပြန်ထားတဲ့ အတိုင်းပြန်ဖွင့်မှာ ဖြစ်ပါတယ်၊ သြဂုတ်လ ၁ ရက်နေ့ကနေစပြီး နံနက်ပိုင်း ကနေ နေ့လည် ၁၂ ထိ ဖွင့်လှစ် ရောင်းချသွားမှာဖြစ်ပါတယ်” ဟု ဦးကျော်ဇင် ကပြောသည်။

လက်ရှိ ပြန်လည် ဖွင့်လှစ်မည့် စျေးဆိုင်များတွင် ဆန်ဆိုင်၊ ဆီဆိုင်၊ သား/ငါး ဆိုင်များ နှင့် ဆေးဝါး ပစ္စည်းရောင်းချ ဆိုင်များမှ လွဲပြီး ကျန်သည့် စျေးဆိုင်များကို မူလအတိုင်း ယာယီပိတ်သိမ်းသွားမည် ဖြစ်ကြောင်းလည်း ၎င်းကပြောသည်။

“ပြည်သူတွေ အတွက် အဓိကလိုအပ်နေတဲ့ ဆိုင်တွေပဲ အရင်တွေ ပြန်ဖွင့်ပေးပါတယ်၊ ကုန်စိမ်းစျေးတွေ ကိုတော့ မဖွင့်ခိုင်းသေးဘူး၊ အခုဖွင့်တဲ့ စျေးသည်တွေကိုလည်း စျေးရောင်းကဒ်နဲ့ လာဝယ်တဲ့သူတွေကို လည်း စျေးဝယ်ကဒ်ပေးထားတယ်” ဟု ဦးကျော်ဇင်က ပြောသည်။

လားရှိုးမြို့အတွင်း ကိုဗစ် – ၁၉ တတိယလှိုင်းတွင် ရောဂါပိုးတွေ့လူနာများ များပြားလာသဖြင့် ဈေးများ အား ဇွန်လ ၂၃ ရက်မှ စတင်ကာ ယာယီပိတ်သိမ်းထားခဲ့ခြင်းဖြစ်ပြီး ဇွန်လ ၂၇ ရက်တွင် လားရှိုးမြို့အား Stay at Home သတ်မှတ်ထားခဲ့ခြင်း ဖြစ်သည်။