သျှမ်းပြည်တွင် ယခုနှစ် အတွင်း ရေကြီးရေလျှံမှုပိုပြီး ခံရပြီး နေအိမ်ထဲထိ ရေဝင်ရောက်မှုရှိလာသဖြင့် ပြည်သူများ အခက်အခဲများစွာ ကြုံနေရကြောင်း စုံစမ်းသိရသည်။

လက်ရှိ ကာလမှာ တဖက်တွင်လည်း ကိုဗစ်- ၁၉ ကပ်ရောဂါနှင့် ကြုံတွေ့နေရပြီး ၊ တဖက်တွင်လည်း မိုးရေကြီးမှုကြောင့် ပြည်သူများ စားဝတ်နေရေးအတွက် ပိုမိုခက်ခဲလာကြောင်း သတင်းရရှိသည်။

ယမန့်နေ့ ဇူလိုင် (၂၆) သျှမ်းတောင်လင်းခေးမြို့တွင် နမ့်တိမ်ချောင်းရေကြီးမှုကြောင့် ချောင်းဘေးရှိ ဈေးဆိုင်များအားလုံး ရေထဲပါသွားကြောင်း လင်းခေးမြို့ဒေသခံ စိုင်းဆေဟန်က သျှမ်းသံတော်ဆင့်ကို ပြောသည်။

“ နမ့်တိမ်ချောင်းကရေတက်လာတာ။ ချောင်းဘေးမှာဆိုင်ဖွင့်ထားတဲ့ ဆိုင်တွေကတော့ ရေထဲပါသွားတယ်။ ပစ္စည်းတွေမသယ်ထုတ်လိုက်ရဘူး။ ညအချိန်မှရေကြီးလာတော့ အဲနားရှိတဲ့ အကင်ဆိုင်လည်း ရေထဲပါသွားတယ်။” ဟု လင်းခေးမြို့ ဒေသခံ စိုင်းဆေဟန်က ပြောသည်။

သျှမ်းရှေ့ မိုင်းလင်းကျေးရွာအုပ်စု နားဟိုင်းလုံကျေးရွာတွင်လည်း ယမန့်နေ့ ဇူလိုင်း ၂၆ ရက်နေ့က မိုးရေတွေနဲ့အတူ သဲများပါလာ‌သောကြောင့် ပြည်သူများနေအိမ်တွင်‌ နေထိုင်လို့မရဘဲ နီးစပ်ရာ ဘုန်းကြီးကျောင်းတွင် သွားနေထိုင်ကြရကြောင်းသိရဿည်။

“ မနေ့က မိုးတွေရွာလာတာကြောင့် သဲတွေပါလာတယ်။ သဲတွေက နေအိမ်ထဲထိဝင်တယ်လေ။ တချို့သူတွေကတော့ နေအိမ်မှာအိပ်လို့မရလို့ ဘုန်းကြီးကျောင်းမှာသွားနေတာရှိတယ်” ဟု နားဟိုင်းလုံကျေးရွာတွင်နေထိုင်သည့် အမျိုးသားကပြောသည်။

နားဟိုင်းလုံကျေးရွာ အတွင်း ရွှေတူးဖော်မှုအလွန်အကျွံ ပြုလုပ်ကာ တောင်များပျက်စီးခြင်း ကြောင်း နှစ်စဉ် ရေကြီးမှုများဖြစ်ပွား လာခဲ့ပြီး နေအိမ်များကိုစွန်ခွာခဲ့ရသူများလည်းရှိကြောင်းသိရသည်။

ထို့ပြင် သျှမ်းပြည်အရှေ့ပိုင်း မိုးရေကြီးမှုကြောင့် လမ်း၊တံတားတွေ ပျက်ဆီးသွားရသည့်အပြင် တောင်ကျရေများ ကြောင့်လည်း ပြည်သူတွေ သေဆုံးမှုရှိခဲ့သည်။

သျှမ်းရှေ့မိုင်းယောင်းမြို့တွင်းလည်း ဇူလိုင်း ၂၀ ရက်နေ့တွင် မိုးရေကြီးပြီး တောင်းကျရေတွေကြောင့် ကျေးရွာအတွင်း အဓိက ဆက်သွယ်ထားသည့် တံတားတစ်စင်း ပျက်ကျသွားခဲ့ပြီး ၊ ယနေ့ချိန်ထိ မိုးရွာသွန်းနေသဖြင့် ရေကျသွားခြင်းမရှိသေးကြောင်း သိရသည်။

“ ရေကတော့တက်နေသေးတယ်။ မကျသေးဘူး။ တံတားကတော့ ကျနော်တို့ ယာယီအနေနဲ့ ပြန်လုပ်ထားတယ်။ ခုက ကိုဗစ်လည်းဖြစ်ရေလည်း ကြီးလာတော့ တစ်ပူပေါ်တစ်ပူဆင့်နေ သလိုဖြစ်နေတာပေါ့။ အခြေခံလူတန်းစာဆိုရင် ပိုပြီးကျပ်တည်းလာတာပေါ့။” ဟု မိုင်းယောင်းမြို့နယ် လူမှုကူညီပေးနေသည့် အမျိုးသားတဦးက ပြောသည်။

ထိုမိုးရေကြီးမှုသည် အဓိက တောင်ကျချောင်းရေနှင့်အတူ တောတောင်းများ ဖြုန်းတီးမှုကြောင့် ရေကြီးရသည်ဟု အထက်ပါ လူမှုကူညီပေးနေသည့် အမျိုးသားကဆိုသည်။

၂၀၂၁ မိုးရာသီကာလတွင် သျှမ်းပြည်နယ်တွင် လင်းခေးမြို့၊ မိုးနဲမြို့၊ မိုင်းပျဉ်းမြို့၊ မိုင်းယောင်းမြိုနယ်၊ ကျိုင်းတုံမြို့နယ်၊ မိုင်းရယ်မြို့ စသည့်နေရာဒေသများတွင် ရေကြီးမှုများဖြစ်ပွားခဲ့ပြီး မိုင်းပျဉ်ဒမြို့တွင် မိုးရေကြီးပြီးတောင်ကျချောင်းရေ နှင့်အတူ မြေတိုက်စားမှုကြောင့် လမ်းလုပ်သား ပြည်သူ ၈ ဦးသေဆုံးခဲ့ရကြောင်းသိရသည်။