သျှမ်းပြည်အရှေ့ပိုင်း တာချီလိတ်မြို့ ရပ်ကွက်တွင်းများထိ အရပ်ဝတ် ရဲများသည် ယမန်နေ့ (ဇူလိုင် ၂၆)ရက် ည ၁၀နာရီတွင် သေနတ်ပစ်ဖောက်ပြီး လူငယ်များကို လိုက်လံဖမ်းဆီးနေကြောင်း သတင်းသိရသည်။
မြန်မာ – ထိုင်း နယ်စပ်ဒေသ တာချီလိတ်မြို့ ရန်အောင်မြေ ရပ်ကွက်အတွင်းတွင် အရပ်ဝတ်ရဲများနှင့် ယူနီဖောင်းဝတ်ဆင်ထားသော ရဲတစ်ယောက်တို့က သေနတ်များပစ်ဖောက် ခြောက်လန့်ပြီး လူငယ်နှစ်ဦး ကို လိုက်လံဖမ်းဆီးကြောင်း ဒေသခံ ပြည်သူ တစ်ဦးက သျှမ်းသံတော်ဆင့်ကို ပြောသည်။
“သူတို့က ကားနဲ့ ဝင်လာကြတယ်ဗျ၊ အသေပစ် အသေပစ် လို့အော်အော်ပြီး ပစ်တာ၊ သေနတ်သံတွေက ၁၀ ချက်လောက်ရှိတယ်၊ ရပ်ကွက်အတွင်းပိုင်းက ကားနဲ့ဝင်ရခက်တဲ့ နေရာတွေဆိုသူတို့လူကဆိုင်ကယ် နဲ့ ဝင်ရှာတယ်၊ အဲ့လူငယ်လေး (၂)ယောက်ကတော့ ပြေးလွှတ်သွားပါတယ်” ဟုဒေသခံ ပြည်သူတစ်ဦး က သျှမ်းသံတော်ဆင့်ကို ပြောသည်။
အဆိုပါ လူငယ်နှစ်ဦးသည် အရှုပ်အရှင်းကင်းသည့် ရပ်ကွက်နေပြည်သူများ ဖြစ်ကြပြီး နိုင်ငံရေးလှုပ် ရှားမှု အနေဖြင့်လည်း တော်လှန်ရေး အစောပိုင်း ဆန္ဒပြမှုများတွင် ပါဝင်လှုပ်ရှားမှုများသာ ရှိသဖြင့် အဘယ်ကြောင့် လာရောက်ဖမ်းဆီးသည်ကို မသိရကြောင်းလည်း ၎င်းကပြောသည်။
“ဒီလူငယ်လေးတွေက ဆန္ဒပြဖူးတာပဲရှိတယ်၊ ဒါကလည်း လူတိုင်းနီးပါး ပါဝင်ကြဖူးတာပဲလေ ဒီနောက် ပိုင်း အာဏာပိုင်တွေကလည်းဖမ်းဆီးနှိပ်စက်မှုတွေကလည်း များလာတော့ PDF တွေကပဲ လှုပ်ရှားတာ၊ ဒီလူငယ်တွကတော့ PDF မဟုတ်တာတော့ သေချာပါတယ်၊ သူတို့ကို သေနတ်နဲ့ ပစ်ပြီးလိုက်ဖမ်းရ အောင် လည်းသူတို့က ရာဇဝတ်သားတွေ မဟုတ်ပါဘူး” ဟု ၎င်းကပြောသည်။
ယမန်နေ့ည (၁၁) နာရီအချိန်ဝန်းကျင်မှာလည်း ပါလျှံ (၃) အတွင်းတွင် Vigo ကားအဖြူရောင် နှင့် Honda Fit ကား တစ်စီး၊ PCX ဆိုင်ကယ် တစ်စီးတို့ဖြင့် လှည့်လည်မှုများပြုလုပ်နေကြောင်း သိရသည်။
Leave a Comments