သျှမ်းမြောက် ကျောက်မဲမြို့ရှိ သက်ကြီးစောင့်ရှောက်ရေးစင်တာတွင်ရှိသော ဘိုးဘွားများ ပြီးခဲ့သည့်ရက်ပိုင်းက ကိုဗစ် − ၁၉ ရောဂါပိုး ကူးစက်ခံရပြီး စိုးရိမ်နေရကြောင်း သိရသည်။
“ပြီးခဲ့တဲ့ ဇူလိုင် ၂၁ ရက်က ပထမအသုတ် ဘိုးဘွား(၃)ယောက်ကို စစ်ကြည့်တာ ကိုဗစ်ပိုးစတွေ့တာပေါ့၊ နောက်တစ်ရက်ခြားမှာ ကျန်တဲ့ ဘိုးဘွားတွေကို ထပ်စစ်တော့လည်း ရောဂါပိုးရှိနေတာကို တွေ့ခဲ့တာပါ ”ဟု အဆင့်မြင့် သက်ကြီးစောင့်ရှောက်ရေးစင်တာမှ တာဝန်ရှိသူတစ်ဦးက သျှမ်းသံတော်ဆင့်ကို အတည်ပြု ပြောသည်။
ထို အဆင့်မြင့် သက်ကြီးစောင့်ရှောက်ရေး စင်တာ တွင် စုစုပေါင်း (၁၅)ဦးရှိရာ (၁၄)ဦး ကိုဗစ်-၁၉ ကူးစက်ခံနေရကြောင်း၊ အုပ်ချုပ်နေသည့်သူတစ်ဦးလည်း ပါကြောင်း အထက်ပါ တာဝန်ရှိသူ က ပြောသည်။
အဆိုပါ စင်တာတွင်ရှိသော ဘိုးဘွားအားလုံးနီးပါး ကိုဗစ် ကူးစက်ခံထားရတာဖြစ်ပြီး အောက်ဆီဂျင် ပေးထားရသည့် ဘိုးဘွားလည်းရှိနေကြောင်း၊ ဘိုးဘွားများအား ကျန်းမာရေးပြုစုစောင့်လျှောက်ပေးနေသူများက ကိုဗစ်ကူးစက်ခံရခြင်း မရှိသေးကြောင်း ၎င်းက ဆက်ပြောသည်။
“အောက်ဆီဂျင်ပေးထားရတဲ့ ဘိုးဘွား (၃)ဦးရှိတယ်၊ နောက်ထပ် အောက်ဆီဂျင် အရေးပေါ်လိုအပ်လာရင်လည်း အသုံးပြုနိုင်ဖို့ ပြင်ဆင်ထားတယ်။ ကျန်းမာရေးဌာနနဲ့လည်း ချိတ်ဆက်ထားတယ်၊ ကျန်တဲ့ဘိုးဘွားတွေကတော့ ခုထိ ကျန်းမာရေးအခြေနေ ကောင်းနေကြသေးတယ်၊ ဒါပေမယ့် သက်ကြီးဘိုးဘွားတွေ၊ ရောဂါအခံရှိတဲ့ ဘိုးဘွားတွေဆိုတော့ စိုးရိမ်ရတာပေါ့” ဟု တာဝန်ရှိသူ က ဆိုသည်။
အဆိုပါ စင်တာတွင်ရှိသော ဘိုးဘွားများသည် အသက် (၆၂)နှစ်မှ အသက်အကြီးဆုံး (၉၂)နှစ်အရွယ်ထိရှိကြောင်း၊ ဘိုးဘွားများအား ကျန်းမာရေးပြုစုစောင့်ရှောက်ပေးနေသူ (၂)ဦးနှင့် အထွေထွေလုပ်သား (၃)ဦးရှိပြီး ၎င်းတို့တွင် ကိုဗစ်ကူးစက်ခံရမှု မရှိသေးကြောင်း သိရသည်။
ကျောက်မဲမြို့နယ်တွင် ကိုဗစ်ကူးစက်ခံရသူ (၄၀၀)ဝန်းကျင်နှင့် သေဆုံးသူ (၁၅)ဦးခန့် ရှိနေကြောင်း သိရသည်။
Leave a Comments