ကျောက်မဲမြို့ နယ် မိုင်းငေါ့မြို့ သို့ ရောက်ရှိနေသည့် စစ်ရှောင် (၈၀)ကျော်အတွက် စားနပ်ရိက္ခာ လိုအပ်နေကြောင်း စုံစမ်းသိရသည်။

အဆိုပါ စစ်ရှောင်(၈၀)သည့် စစ်ရှောင်ကော်မတီ အဖွဲ့ဝင်မှ ကောက်ယူထားသည့် စားရင်းထဲတွင်မပါဝင်သည့် သူများဖြစ်ကြောင်းသိရသည်။

ဇူလိုင်လ အစောပိုင်းက ကျောက်မဲမြို့နယ် တော့ဆန်ကျေးရွာအုပ်စုတွင်း တိုင်းရင်းသား လက်နက်ကိုင်များ တိုက်ပွဲဖြစ်ပွားခဲ့သည့်အတွက် ဒေသခံထောင်ချီ ထွက်ပြေးတိမ်းရှောင်ခဲ့ရပြီး ကျောက်မဲမြို့၊ မိုင်းငေါ့မြို့ပေါ်နှင့် မြို့အနီး ကျေးရွာများ၊ ဆွေမျိုးနေအိမ်များသို့ လာရောက်ခိုလှုံနေကြရကြောင်း သိရသည်။

မိုင်းငေါ့မြို့ပေါ်နှင့် ကျေးရွာတချို့တွင် ရောက်ရှိလာသည့် စစ်ဘေးရှောင်များ (၁၀၀၀)ခန့် ရှိနေကြောင်း လတ်တလော စာရင်းအရ သိရှိရပြီး ၎င်းစာရင်းတွင် မပါဝင်သည့် စစ်ရှောင်ပြည်သူများလည်း ရှိနေသေးကြောင်း စစ်ဘေးရှောင်များအား ကူညီပေးနေသူ တစ်ဦးက ပြောသည်။

“မိုင်းငေါ့မြို့အနီး မန်ဟွေရွာမှာလည်း စစ်ဘေးရှောင်တွေရှိနေတယ်၊ အဲ့မှာရောက်နေတာ မိသားစု (၂၀)ခန့်၊ လူဦးရေ (၈၀) ခန့်ရှိမယ်၊ သူတို့က အရင်ကောက်ယူထားတဲ့ စာရင်းထဲမှာ မပါဘူး၊ အဲ့ရွာမှာ ရောက်နေတယ်ဆိုတာ ဒီရက်ပိုင်းမှ သိရတာ၊ အရင်ရက်တွေ ထောက်ပံ့ကူညီတာတွေက သူတို့အတွက် မပါဘူး၊ ခုက အကူညီလိုနေတယ် ဆိုပြီး ပြောလာတယ်” ဟု ကျောက်မဲ သျှမ်းစာပေနှင့်ယဉ်ကျေးမှုအသင်း ဥက္ကဌ စိုင်းလျန်းဟန်က သျှမ်းသံတော်ဆင့်ကို ပြောသည်။

အဆိုပါ စစ်ဘေးရှောင်များသည် တော့ဆန်ကျေးရွာအုပ်စု ဟိန်းဝိုးကျေးရွာဒေသခံများဖြစ်ပြီး ကျန်းမာရေးမကောင်းသည့် ဟိန်းဝိုးကျောင်းတိုက် ဆရာတော်လည်း ပါဝင်ကြောင်း၊ စောင်နှင့် အစားအသောက်များလိုအပ်နေကြောင်း ၎င်းပြောပြချက်အရ သိရသည်။

မိုင်းငေါ့ သျှမ်းစာပေနှင့်ယဉ်ကျေးမှုခန်းမတွင် ရောက်ရှိနေသည့် စစ်ဘေးရှောင်ပြည်သူ (၁၀၀)ကျော်ရှိနေပြီး နှစ်ခန်းတွဲအိမ်သာ တစ်ခုသာရှိသည့်အတွက် အိမ်သာအသစ် ထပ်မံဆောက်လုပ်နေရကြောင်း၊ ထို့အပြင် မီးမရရှိသည့် နေရာများအတွက် မီးစက်လိုအပ်နေကြောင်းစိုင်းလျှန်းဟန်က ဆက်ပြောသည်။

ယခုရက်ပိုင်းအတွင်း မိုင်းငေါ့မြို့တွင် လာရောက်ခိုလှုံနေသည့် စစ်ဘေးရှောင်ပြည်သူတချို့ အခြားနေရာသို့ ပြောင်းရွှေ့သွားပြီး စစ်ဘေးရှောင် (၅၀၀)ခန့်သာ ကျန်ရှိတော့ကြောင်း သိရသည်။
“ကားတွေ၊ ထော်လာဂျီတွေနဲ့ အုပ်စုလိုက် ထွက်သွားတာတွေ့တယ်။ တချို့ကကျောက်မဲဘက်ကို ထွက်သွားကြတာ၊ တချို့က သူတို့ ရွာဘက်ကို ပြန်သွားတာ၊ ရွာဘက် အခြေနေ သွားကြည့်ကြတာလားတော့ မသိဘူး။ ခုရက်ပိုင်း ပစ်ခတ်သံတွေက မကြာမကြာ ကြားနေရသေးတော့ သူတို့တွေ ရွာပြန်နေဦးမှာတော့ မဟုတ်ဘူး” ဟု မိုင်းငေါ့မြို့နေ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

စစ်ရှောင်များရောက်ရှိနေသည့် မိုင်းငေါ့မြို့တွင် ကိုဗစ်အတည်ပြုလူနာ (၂)ဦးရှိပြီး ၎င်းနှင့် အနီးဆုံးဖြစ်သည့် ကျောက်မဲမြို့တွင်လည်း ကိုဗစ်ကူးစက်လူနာ မြင့်တက်နေသည့်အတွက် စစ်ရှောင်စခန်းများသို့ ကိုဗစ်ကူးစက်ပျံ့နှံ့မှာကိုလည်း စိုးရိမ်နေကြသည်။

ကျောက်မဲမြို့နယ် တော့ဆန်ဒေသတွင် ပြီးခဲ့သည့် ဇူလိုင်လအစောပိုင်းက တိုင်းရင်းသားလက်နက်ကိုင်များ တိုက်ပွဲဖြစ်ပွားခဲ့သည့်အတွက် ဒေသခံထောင်ချီ ထွက်ပြေးတိမ်းရှောင်ခဲ့ရသည်။ ယခု လဝက်ကျော်ပြီဖြစ်သော်လည်း သေနတ်သံနှင့် ဗုံးသံများ မကြာခဏ ကြားနေရကြောင်း သိရှိရသည်။