ကျောက်မဲ ရဲတပ်ဖွဲ့ဝင် ၁၆ ဦး ကိုဗစ်ကူးစက်ခံရ

0

သျှမ်းမြောက် ကျောက်မဲမြို့နယ်တွင် ဇူလိုင် (၁၉)ရက်နေ့က ကိုဗစ် − ၁၉ ကူးစက်ခံရသူ ၃၂ ဦးရှိကာ ထိုထဲတွင် ရဲဝန်ထမ်း ၁၆ ဦးပါဝင်ပြီး၊ သေဆုံးသူ (၄)ဦးထိ ရှိခဲ့ကြောင်း သိရသည်။

အဆိုပါနေ့ မနက်ပိုင်းတွင် နောင်ပိန်ရဲစခန်းမှ (ရခိုင်ပြန်) ရဲဝန်ထမ်း (၄)ဦး ကိုဗစ်ပိုး တွေ့ရှိခဲ့ပြီး မွန်းလွဲပိုင်းတွင် မြို့တော်ခန်းမမှာ အသွားအလာကန့်သတ်ထားသည့် ရဲဝန်ထမ်း (၁၂)ဦးတွင်လည်း ကိုဗစ်ရောဂါပိုး ထပ်မံတွေ့ရှိခဲ့ကြောင်း သိရသည်။

“ကားကြီးတွေနဲ့ လူအုပ်ကြီးရောက်လာတော့ လန့်သွားတာပေါ့၊ ဘယ်ကလည်း မသိ၊ ခုလို ကိုဗစ်ကာလကြီးမှာ ရောက်လာတာဆိုတော့ ပိုပြီး စိုးရိမ်ရတယ်လေ၊ ရောက်တဲ့နေ့ကဆိုရင် Mask တွေလည်း မတပ်ကြဘူး။ ခန်းမရှေ့နားမှာ သွားလာနေကြတာ” ဟု မြို့တော်ခန်းမအနီး နေထိုင်သူ ဒေသခံတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့်အပတ်က ရခိုင်ပြည်နယ်နှင့် အခြားဒေသမှ ပြောင်းရွှေ့လာသော ရဲတပ်ဖွဲ့ဝင်များသည် သျှမ်းမြောက် ကျောက်မဲမြို့ရှိ မြို့တော်ခန်းမ၊ မိုးလုံလေလုံခန်းမ၊ မြို့မရဲစခန်းနှင့် နောင်ပိန်ရဲစခန်းတို့တွင် အသွားအလာ ကန့်သတ်ထားကြောင်း၊ ရဲတပ်ဖွဲ့အင်အား (၁၃၀)ခန့်ရှိကြောင်း ကျောက်မဲဒေသခံ အမျိုးသားတစ်ဦးက ပြောသည်။

“ပိုပြီးတော့ စိုးရိမ်ရတာက တချို့ဈေးသည်တွေပါ၊ ခုရက်ပိုင်း ဈေးတွေပိတ်ထားတော့ ဈေးရောင်းပါးတယ်၊ အဲ့တော့ အသွားအလာကန့်သတ်ထားတဲ့နေရာ၊ လူအများကြီးရှိတဲ့ ခန်းမအနီးနားမှာ ဈေးသွားရောင်းကြတာတွေ တွေ့နေရတယ်” ဟု ရပ်ကွက် (၁)တွင် နေထိုင်သည့် ဒေသခံတစ်ဦးက ပြောသည်။

ကျောက်မဲမြို့နယ်အတွင်း ကိုဗစ်ကူးစက်လူနာများထဲတွင် ဈေးသည်များလည်း ပါဝင်နေသည့်အတွက် ကိုဗစ်ရောဂါပိုး ပိုမိုပျံနှံ့မှာကို ဒေသခံများက စိုးရိမ်နေကြသည်။

ကျောက်မဲမြို့တွင် ဇူလိုင် (၁၉)ရက်နေ့ ညပိုင်းအထိ ကိုဗစ် ကူးစက်ခံရသူ (၃၀၀)ခန့်ရှိနေပြီး သေဆုံးသူ (၁၂)ဦးခန့်ရှိနေကြောင်း သိရသည်။

Leave a Comments