သျှမ်းပြည်တောင်ပိုင်း ကျေးသီးမြို့နယ်အတွင်းတိုက်ပွဲငြိမ်ပြီး နေရပ်ပြန်သွားသည့် စစ်ရှောင် (၂၀၀) ကျော်သည် လက်နက်သံပြန်ကြားရသဖြင့် ထပ်မံ စစ်ရှောင်လာရကြောင်း သတင်းရရှိသည်။
ဇူလိုင်လဆန်းပိုင်းတွင် သျှမ်းတပ်(၂)တပ် တိုက်ပွဲငြိမ်သက်သွားသဖြင့် ကျေးသီးမြို့နယ် အတွင်းရောက်ရှိသည့် စစ်ရှောင်များ နေရပ်ပြန်သွားခဲ့ပြီး ဇူလိုင် (၁၇)ရက်တွင် နောင်ဝိုးဘက် လက်နက်သံပြန်ကြားသဖြင့် ဒေသခံ (၂၀၀)ကျော် ထပ်မံစစ်ရှောင်လာရကြောင်း ကျေးသီးမြို့ စစ်ရှောင်ကူညီပေးနေသည့် အမျိုးသား တစ်ဦး က သျှမ်းသံတော်ဆင့်ကို ပြောသည်။
“ တိုက်ပွဲငြိမ်တော့ စစ်ရှောင်တွေ နေရပြန်သွားတယ်။ ဒါပေမယ့် ဇူလိုင် ၁၇ရက်မှာ နောင်ဝိုးဘက်က သူတို့ပြန်ပြီး လက်နက်သံကြားတော့(၂၀၀) ကျော် ပြန်ရောက်လာတယ်” ဟု ကျေးသီးစစ်ရှောင်များကို ကူညီပေးနေသည့် သူ တစ်ဦးကပြောသည်။
လက်ရှိကျေးသီးမြို့နယ် အတွင်း နောင်ဝိုးဘုန်းကြီးကျောင်းမှာ (၂၀၀) ဦး နှင့် လွယ်ဆိုင်ကျေးရွာ (၅၀) ကျော် နှင့် ဝမ်ပန့် ဘုန်းကြီးကျောင်းမှာ (၇၀) ကျော် ဆက်လက်ထွက်ပြေးတိမ်းရှောင်နေရကြောင်း သတင်းရရှိသည်။
လက်ရှိ မှာ တိုက်ပွဲငြိမ်သက်နေပြီ ဟု SSPP တပ်ဖွဲ့မှ ကျေးသီးမြို့နယ် နောင်ဆွမ်းကျေးရွာ ဘက်ရှိ စစ်ရှောင် (၇၀၀)ကျော်ကို ပြောဆိုကာ နေရပ်သို့ ပြန်ခိုင်းကြောင်း စုံစမ်းသိရသည်။
“နောင်ဆွမ်းဘက်က စစ်ရှောင် (၇၀၀) ကျော်လည်း SSPP တွေ ပြန်ခိုင်းလို့ အကုန်ပြန်သွားကြပြီ။ ပြန်သွားပေမယ့် သူတို့တော့ မြေမြှပ်မှိုင်းတွေကိုတော့ စိုးရိမ်ကြတယ်လို့တော့ ပြောတယ်” ဟု စစ်ဘေးရှောင် ကော်မတီဝင် တစ်ဦးကပြောသည်။
သျှမ်းပြည်တောင်ပိုင်း ကျေးသီးမြို့နယ် လွယ်ဟွန်းတောင်ကြောတွင် တစ်လကျော်ဖြစ်ပွားသည့် သျှမ်းတပ်(၂) တပ် တိုက်ပွဲကြောင့် အရပ်သား ပြည်သူ (၂) ဦး ကျည်ထိမှန်ခြင်း၊ ဒေသခံ ပြည်သူများ နေရပ်သို့ ထောင်ဂဏန်း ထွက်ပြေးတိမ်းရှောင်ခဲ့ရသည်။
