သျှမ်းပြည်တောင်ပိုင်း လင်းခေးခရိုင် ဟိုမိန်းမြို့မျက်နှာခြင်းဆိုင် – ထိုင်းနိုင်ငံ မြောက်ပိုင်း မယ့်ဟောင့်ဆောင် ခရိုင် တွင် ထိုင်းစစ်တပ်၏ ကင်းလှည့်လေယာဉ်တစီး ပျက်ကျရာ စစ်သည် ၃ ဦးသေဆုံးပြီး ၁ ဦးအပြင်းအထန် ဒဏ် ရာရရှိကြောင်းသိရသည်။

ဇူလိုင်လ ၅ ရက်နေ့ ညနေပိုင်းက ထိုင်းဘုရင့်တပ်မတော် လေယာဉ်တစီးသည် မယ့်ဆောင်ဆောင်ခရိုင် မယ်ဟောင်ဆောင်မြို့နယ်၊ ပန်မဖာ့မြို့နယ်၊ ပိုင်းမြို့နယ်အတွင်းရေဒါမျက်နှာပြင်မှ ပျောက်ဆုံးသွားသဖြင့် တာဝန်ရှိ နယ်စပ်လုံခြုံရေးစစ်တပ်က သွားရောက်ရှာဖွေရာ ပန်မတ်ဖာ့ မြို့နယ် ဟွေ့ဖင့်ရွာနှင့် ၂ ကီလိုမီတာအကွာတွင် အဆိုပါလေယာဉ်ပျက်ကျနေသည်ကိုတွေ့ရကြောင်း ထိုင်းနိုင်ငံ ရုပ်သံသတင်းဌာနတွင် ဖော်ပြသည်။

အဆိုပါ စစ်လေယာဉ်တစင်းလုံး မီးလောင်ပျက်စီးပြီး လေယာဉ်မှူး နှစ်ဦး နှင့် လိုက်ပါသူ တဦး တို့၏ အလောင်းများအား ရှာဖွေတွေ့ရကြောင်း၊ ကျန်ရှိစစ်သည်တဦးမှာမူ နံရိုးကျိုး၊ ထိခိုက်ပွန်းပဲ့ဒဏ်ရာနှင့် မီးလောင်ခံရသောဒဏ်ရာရရှိထားသဖြင့် မယ့်ဟောင့်ဆောင်ခရိုင်ဆေး ရုံကြီးသို့ပို့ဆောင်ဆေးကုသထားရကြောင်း ထိုင်းသတင်းများထုတ်ပြန်ချက်အရသိရသည်။