မြန်မာ-ထိုင်းနယ်စပ်တလျှောက်ရှိ ‘ဝ’တပ်ဖွဲ့ UWSA တောင်ပိုင်း (၁၇၁) စစ်ဒေသ လက်အောက်ခံ တပ်စခန်းများနှင့် ထိုင်းစစ်တပ်တို့အကြား စစ်ရေးတင်းမာမှု အခြေအနေမှာ ကောလာဟလ ဖြစ်ကြောင်း ‘ဝ’တပ်ဖွဲ့ UWSA က ပြောဆိုလိုက်သည်။
‘ဝ’တပ်ဖွဲ့ UWSA သည် ထိုင်းစစ်တပ်နှင့် ရန်သူ မဟုတ်သလို စစ်ဖြစ်မည်ဟု မီဒီယာအချို့က ချဲ့ကားပြောဆိုခြင်းနှင့် ပတ်သက်၍ စစ်ပွဲဖြစ်ရန် ရန်စပေးသည့် ကောလာဟလ များဖြစ်ပြီး ပြင်းပြင်းထန်ထန် ဆန့်ကျင်ရှုံ့ချကြောင်း ယမန်နေ့ (ဒီဇင်ဘာလ ၈ ရက်) ထုတ်ပြန်ချက်တွင် ရေးသားထားသည်။
ပြီးခဲ့သည့် နိုဝင်ဘာလ (၁၈) ရက်တွင် ထိုင်းနိုင်ငံ ချင်းမိုင်မြို့၌ ထိုင်းစစ်တပ်နှင့် UWSA တောင်ပိုင်း (၁၇၁)စစ်ဒေသမှ (၆) ဦးပါဝင်သည့် ကိုယ်စားလှယ်အဖွဲ့ တွေ့ဆုံခဲ့စဉ် ထိုင်းနိုင်ငံ မယ်ဟောင်ဆောင်ခရိုင်ဘက် ထိစပ်နေသည့် နယ်နိမိတ်မျဉ်းပေါ်ရှိ UWSA တပ်စခန်း (၉) နေရာကို တစ်လအတွင်း တပ်ဆုတ်ခွာပေးရန် ထိုင်းစစ်တပ်မှ ပြောဆိုခဲ့ကြောင်း ထိုင်းနှင့် မြန်မာ မီဒီယာများတွင် ဖော်ပြခဲ့ကြသည်။
၎င်းကိစ္စနှင့် ပတ်သက်ပြီး မြန်မာ-ထိုင်းနယ်စပ်ရှိ နယ်နိမိတ်ပြဿနာများမှာ နိုင်ငံတော်အချင်းချင်း ဆွေးနွေးရမည့် ကိစ္စဖြစ်ပြီး နိုင်ငံတော်ခေါင်းဆောင်များကို သတင်းပို့ထားကြောင်း ‘ဝ’ပြင်ပဆက်ဆံရေး တာဝန်ခံ ဦးညီရမ်းက ‘ဝ’လူငယ့်အသံကွန်ရက် မီဒီယာသို့ နိုဝင်ဘာလ (၂၅) ရက်တွင် ဖြေကြားထားသည်။
ထိုင်းစစ်တပ်မှ မယ်ဟောင်ဆောင်ခရိုင် ထိုင်း-မြန်မာ နယ်စပ်တကြောရှိ UWSA တပ်စခန်း (၉) နေရာကို ဒီဇင်ဘာလ (၁၈) ရက် နောက်ဆုံးထား၍ တစ်လအတွင်း တပ်ဆုတ်ပေးရန် ပြောဆိုခဲ့ခြင်းကြောင့် နှစ်ဘက်တပ်များမှ အသင့်အနေအထား စစ်ပြင်ဆင်နေကြောင်း ဒေသခံများအကြား ပျံ့နှံ့သွားသည်ဟု ဆိုသည်။
လတ်တလော ထိုင်း-မြန်မာနယ်စပ်တွင် အခြေအနေ ထူးခြားမှုမရှိဘဲ မီဒီယာများတွင် ဖော်ပြသကဲ့သို့ နှစ်ဘက်တပ်များမှ စစ်ရေးပြင်ဆင်ခြင်း မရှိဘဲ ‘ဝ’တပ်ဖွဲ့ဘက်မှ တပ်မဆုတ်ရန် တင်းခံထားခြင်းမျိုး မရှိကြောင်း ဝါရင့်တော်လှန်ရေးရဲဘော်တစ်ဦးကလည်း သျှမ်းသံတော်ဆင့်ကို ပြောဆိုသည်။
အခြားတဘက်တွင် တင်းမာမှုများ ဖြစ်ပေါ်နေသည့် ထိုင်း-မြန်မာနယ်စပ်တလျှောက် ‘ဝ’တပ်ဖွဲ့ UWSA တောင်ပိုင်း (၁၇၁) စစ်ဒေသမှ ပထမဆုံးအကြိမ် စစ်သင်တန်းဖွင့်ပွဲကို နိုဝင်ဘာလ နောက်ဆုံးပတ်တွင် ဖွင့်လှစ်ခဲ့သည်။
ထို့အပြင် UWSA တောင်ပိုင်းတပ် (၁၇၁) စစ်ဒေသအတွင်း နေထိုင်ပြီး ပြည်ပသို့ အလုပ်သွားရောက် လုပ်ကိုင်နေသူများကိုလည်း မိမိနေရပ်ဆီ ပြန်လာပြီး စစ်မှုထမ်းရန် ဩဂုတ်လ (၃၀) ရက်နေ့က ထုတ်ပြန်ခဲ့ပြီး တပ်သားသစ် (၄၀၀၀) အထိ စုဆောင်းသွားမည်ဟုလည်း ဒေသခံများက ပြောသည်။
Leave a Comments