သျှမ်းပြည်တောင်ပိုင်း ပင်လုံမြို့တွင် ကိုဗစ်-၁၉ ပိုးတွေ့လူနာ ပိုမိုများပြာလာပါက မိမိနေအိမ်တွင် ကိုယ်တိုင်ဆေးကုသ ရမည်ဖြစ်ကြောင်း ပင်လုံမြို့ ကိုဗစ် ၁၉ ကော်မတီထံမှ စုံစမ်းသိရှိရသည်။
“ ကျနော်တို့မြို့ကသေးတယ်။ လူတွေက စကားနာမထောင်ဘူး။ အပြင်မထွက်နဲ့ဆိုတော့လည်း ထွက်တယ်။ ဈေးဆိုင်ဆိုရင်လည်းဆေးဆိုင်နဲ့ ကုန်စုံဆိုင်ပဲဖွင့်ပါလို့ပြောတယ်။ တချို့က နားမထောင်းဘူး။” ဟု ကိုဗစ် ၁၉ ကော်မတီက သျှမ်းသံတော်ဆင့်ကိုပြောသည်။
ယနေ့ ဇူလိုင် ၁၉ တွင် ပင်လုံမြို့ မြို့မဈေးထဲတွင် ကိုဗစ်- ၁၉ ကော်မတီမှ ကိုဗစ်ပိုးကူးစက်ခံရပါက ကုသရန်နေရာ မရှိတော့သဖြင့် ပည်သူများ ဆင်ခြေနေထိုင်သွားရန်အတွက် သတိပေးခဲ့သည်။
ပင်လုံမြို့ရှိ မြို့မဈေးထဲတွင် ယမန့်နေ့ ဇူလိုင် ၁၈ ရက်နေ့က ကိုဗစ် ၁၉ ပိုးတွေ့လူနာ တဦးမြို့ထဲ ပတ်လည်သွား ခဲ့ကြောင်းသိရသည်။
“ မြို့မဈေးထဲကို positive လူနာတယောက် ဈေးထဲကို ပတ်လည်သွားသေးတယ်။ အဲကြောင့် ကျနော်တို့ ဒီနေ့မနက်မှာ ဈေးထဲသွားပြီးသတိပေးထားတာပေါ့နော်။ ပိုးတွေ့များလာရင် ကုသဖို့က နေရာမရှိသေးဘူး။” ဟု ကိုဗစ် ၁၉ ကော်မတီက ပြောသည်။
အလားတူ ပင်လုံမြို့ဒေသခံအမျိုးသမီးက “ သူတို့ ကိုဗစ် မကုပေးတော့ဘူးလို့ပြောတာကောင်းတယ်။ အဲဒါမှ လူတွေကကြောက်ကြမှာ။ မဟုတ်ရင်မကြောက်ကြဘူး။ ပင်လုံမြို့ကလူတွေတအားပေါ့ကြတယ်။ တချို့ဆို mask မတပ်ဘဲ ဈေးသွားနေတာရှိတယ်” ဟု ပြောသည်။
လက်ရှိ ကိုဗစ် ၁၉ ရောဂါပိုးပြန့်ပွားနေချိန်တွင် ပြည်သူများအနေဖြင့် အပြင်မထွက်ရန်၊ သွားလာမှုများကို ဆင်ခြင်နေထိုင်ပေးရန်အတွက် ပင်လုံကိုဗစ် ၁၉ ကော်မတီက တောင်းဆိုလိုက်သည်။
ပင်လုံမြို့တွင် ယမန့်နေ့ ဇူလိုင် ၁၈ ရက်နေ့ထိ ကိုဗစ် ၁၉ ပိုးတွေ့လူနာစုစုပေါင်း ၁၆ ဦးထိရှိပြီး သေဆုံးလူနာ ၁ ဦးရှိကြောင်းသိရသည်။
