သျှမ်းပြည်တောင်ပိုင်း မိုင်းကိုင်မြို့တွင် တိုက်ပွဲငြိမ်သွားသဖြင့် စစ်ရှောင်ထဲတွင်နေရာထိုင်ခင်း ခက်ခဲမှုများစွာရှိသဖြင့် စစ်ရှောင် (၂၀၀)ကျော ်နေရပ်ပြန်သွားကြောင်း စုံစမ်းသိရသည်။
မိုင်းကိုင်မြို့နယ် မိုင်ခွန်ကျေးရွာအုပ်စုတွင် သျှမ်းတပ် ၂ တပ်တိုက်ပွဲကြောင့် ပြည်သူများ ထောင်ချီထွက်ပြေးတိမ်းရှောင် ခဲ့ရပြီး စစ်ရှောင်များသည် ထော်လဂျီပေါ် သို့မဟုတ် ယာယီတဲဆောက်ပြီး မိုးကာဖြင့် ကာရံကာ နေထိုင်ရန်အတွက် အခက်ခဲများစွာရှိသောကြောင့် တစ်ချို့က နေရပ်ကိုပြန်သွားခဲ့ကြောင်း စစ်ရှောင်ကူညီပေးနေသူများက ပြောသည်။
“ ဒီမှာနေရတာတော့ နေအိမ်နဲ့မတူဘူးလေ။ယာယီတဲ သာမှမဟုတ် ထော်လဂျီပေါ် မိုးကာနဲ့ကာရံပြီး နေကြတယ်လေ။ လွိုင်ဟွန်တောင်နဲ့ဝေးတဲ့သူတွေက ပြန်သွားတာ။ ကျန်တဲ့သူတွေကတော့ ၈၀၀ကျော်လည်းကျန်တယ်” ဟု မိုင်းကိုင်စစ်ဘေးရှောင် ကူညီးပေးနေသည့် အမျိုးသားတဦးက သျှမ်းသံတော်ဆင့်ကို ပြောသည်။
လက်ရှိတွင် မိုင်းကိုင်မြို့နယ်တွင် တိုက်ပွဲ ၃ ရက်ငြိမ်သွားသော်လည်း စစ်ရှောင် (၈၀၀)ကျော်သည် တိုက်ပွဲထပ်မံဖြစ်ပွားမည်ကို စိုးရိမ်သဖြင့် နေရပ်မပြန်ကြပြီး၊ တချို့ စစ်ရှောင်များသည် မိုင်းကိုင်ဘက် နေထိုင်ခက်ခဲသဖြင့် လဲချားမြို့နယ် စစ်ဘေးရှောင်သွားခဲ့ကြောင်း သတင်းရရှိသည်။
“ တိုက်ပွဲက မဖြစ်တာ ၃ ရက်လောက်တော့ရှိပြီး။ တချို့တော့လဲ စိတ်မလုံခြုံလို့ မပြန်ရဲကြသေးဘူး။ တစ်ချို့တော့လည်း လဲချားမြို့နယ်ထဲ သွားတာရှိတယ်။ မိုင်းကိုယ်မြို့နယ်ထဲမှာတော့ စစ်ရှောင်တွေ ၈၀၀ ကျော်ကျန်နေသေးတယ်။” ဟု စစ်ဘေးရှောင် ကူညီပေးနေသည့် အမျိုးသားတစ်ဦး က ဆိုသည်။
မိုင်းကိုင်မြို့နယ် အတွင်း စစ်ဘေးရှောင် ၈၀၀ ကျော်ကျန်ရှိနေပြီး ၎င်းတို့သည် နောင်လီကျောင်း ၂၆၆ဦး၊ စာသင်ကျောင်း ၁၀၃ဦး၊ နောင်လိုင်းကျောင်း ၂၀၀ဦး၊ နန်းကူးပင်တွင် ၁၀၂ ဦး ကျန်ရှိနေသေးကြောင်းသိရသည်။
လက်ရှိတွင် မိုင်းကိုင်မြို့နယ်တွင် ကိုဗစ် -၁၉ ပိုးတွေ့လူနာများကို တွေ့ရှိလာသောကြောင့် စစ်ဘေးရှောင်များအတွက် စိတ်ပူနေရကြောင်း စစ်ဘေးရှောင်ကူညီးပေးနေသည့်သူကဆိုသည်။
ထိုအပြင် စစ်ဘေးရှောင်များအတွက် ကိုဗစ် – ၁၉ ကပ်ရောဂါကို ကာကွယ်ရန်အတွက် ပညာပေးဆရာဝန်များမရှိကြောင်း၊ ဆေးပစ္စည်းများ အပြည့်စုံမရှိထားကြောင်းသိရသည်။
“ ဟုတ်ပါတယ်။ ကျနော်တို့ စစ်ဘေးရှောင်အတွက်ပိုပြီးစိတ်ပူပေးနေရတယ်။ ကိုဗစ် ပညာပေးမဲ့ ဆရာဝန်တွေ ကလည်းမရှိဘူး။ အခုက mask (နှာခေါင်းစည်း) လက်ဆေးဆပ်ပြာ တော့ရှိတယ်။။ ဖြစ်နိုင်ရင် ကျနော်တို့ သူတို့ကို ပညာပြပေးနိုင်တဲ့ သူကို လိုချင်တယ်။” ဟု ၎င်း ကပြောသည်။
လက်ရှိတွင် ပြည်သူများက တိုက်ပွဲကို အမြန်ဆုံးရပ်စေချင်ပြီး နေရပ်ကို ပြန်ချင်နေပြီးဖြစ်ကြောင်း ပြောဆိုခဲ့သည်။
သျှမ်းတပ် (၂) တပ်တိုက်ပွဲရပ်တန့်ရေးအတွက် သံဃာတော်များ၊ ပြည်သူများက အကြိမ်ကြိမ် တောင်းဆိုခဲ့ သော်လည်း သျှမ်းတပ် (၂) တပ်မှ နားထောင်ခဲ့ခြင်း မရှိခဲ့ပေ။
Leave a Comments