သျှမ်းပြည်မြောက်ပိုင်း သီပေါမြို့ရှိ ပြည်သူ့ဆေးရုံတွင် ကိုဗစ် -၁၉ ရောဂါပိုးတွေ့ လူနာများကို တာဝန်ကျသည့် ကျန်းမာရေးဝန်ထမ်းများက စောင့်ရှောက် ဆေးကုသမှုများ မရှိသည့်အပြင် တံခါးသော့ပိတ်ပြီး အမှောင်ခန်းတွင်ထားထားကြောင်း စုံစမ်းသိရှိရသည်။
သီပေါမြို့နယ် အတွင်းရှိ ကိုဗစ် -၁၉ ပိုးတွေ့အတည်ပြုလူနာများကို ပရဟိတများအသင်းမှ သယ်ဆောင်ပြီး ဆေးရုံသို့ ပို့ဆောင်ပြီးသည့် နောက်ပိုင်းတွင် ဆေးရုံရှိ ကျန်းမာရေးဝန်ထမ်းများက လူနာများအား လေဝင် လေထွက် နှင့် အလင်းရောင် မရှိရသည့် အခန်းဆောင်ထဲတွင် နေရာပေးကာ အပြင်မှ သော့ခတ်လိုက် ကြောင်း သိရသည်။
“ကျမတို့ဆေးရုံကိုရောက်တော့ ဆရာမလေးတွေက ကျမတို့ကို ဒီအခန်းထဲနေရမယ်ဆိုပြီး လိုက်ပြပေးတယ်၊ အခုကျမတို့နေနေရတဲ့ အခန်းက လေဝင်လေထွက်လည်းမရှိဘူး၊ အလင်းရောင်လည်း မီးအလင်းရောင်ပဲ ရှိတယ်၊” ဟု ကိုယ်တိုင်ကြုံတေ့နေရသည့် ကိုဗစ်လူနာ အမျိုးသမီးတစ်ဦးက သျှမ်းသံတော်ဆင့်ကိုပြောသည်။
ကိုဗစ်-၁၉ လူနာများကို လေဝင်လေထွက်မရှိသည့်အခန်းတွင် ပိုးတွေ့လူနာ အယေက် (၂၀) စုပြုံနေထိုင်ခဲ့ရပြီး အိမ်သာများကိုအတူူပေါင်းသုံးနေရသည် ဟု ကိုဗစ်လူနာအမျိုးသမီးက ပြောပြသည်။
ကိုဗစ် – ၁၉ ပိုးတွေ့ရှိသည့် လူနာများကို ကျန်းမာရေးအရ နေပူစာထွက်လုံခြင်း၊ လေဝင်လေထွက်ကောင်း သည့် သန့်ရှင်းသည့်နေရာများတွင်နေရာပေးခြင်းများ မရှိသည့် အပြင် ကိုယ်လက်လှုပ်ရှားမှုအတွက် လမ်းလျှောက်ခွင့်လည်း ပိတ်ပင်ထားကြောင်းသိရသည်။
“ကျမတို့ဆေးရုံကို ၁၃ ရက်နေ့က ရောက်လာတယ်၊ အဲ့နေ့ကတည်း ဒီအခန်းထဲကလွှဲပြီး ဘယ်ကိုမှမသွားရ ဘူး၊ သူတို့ပြောတဲ့ ကျန်းမာရေးအတွက်ဆိုတာနဲ့ ညီညွတ်တဲ့အချက်ဆိုတာလည်း ဘာမှမလုပ်ပေးဘူး၊ သောက်ဆေးလည်း မပေးဘူး၊ ဆေးထိုးပေးတာတွေလည်းမရှိပါဘူး၊ ကျမတို့ထဲအတူရှိနေတဲ့ အုပ်စုက ပိုးတွေ့ပေမယ့် မစိုးရိမ်ဘူးလို့တော့ သူတို့ပြောတယ်” ဟု ၎င်းအမျိုးသမီးက ထပ်လောင်းပြောသည်။
ထို့အပြင် ကိုဗစ်-၁၉ လူနာများနေရသည့် အခန်းကို အပြင်ဘက် မှ သော့ခတ်တံခါးပိတ်သည့် အပြင် ပြတင်းပေါက်ငယ်များကိုလည်း အပြင်မှ သစ်သားပြားနှင့် အသေပိတ်ထားကြောင်း သိရသည်။
“ကျမတို့ စားသောက်ရေးအတွက် ကွာရန်တင်း မဝင်ရတဲ့ အမျိုးတွေက တာဝန်ယူပြီး ပို့ဆောင်ပေးနေလို့ အဲ့ဘက်ပိုင်းတော့ သိပ်မပူရပါဘူး၊ ပြီးတော့ အပြင်ကနေ ပစ္စည်းတစ်ခုခု လိုအပ်ပြီဆိုရင်လည်း နယ်စည်း မခြားပရဟိတက ကူညီပေးလို့ သူတို့ကိုလည်းကျေးဇူးတင်ပါတယ်၊ အခုတော့ ဆရာ/ဆရာမတွေကို ကျမတို့ကို စောင့်ရှောက်ကုသမှုပေးဖို့ တောင်းဆို လိုပါတယ်” ဟူ၍လည်း အဆိုပါ အမျိုးသမီးကပြောသည်။
အဆိုပါ ကိစ္စနှင့် ပက်သက်ပြီး သီပေါမြို့တွင်းကူညီဆောင်ရွက်ပေးနေတဲ့ ပရဟိတအဖွဲ့မှ အသင်းဝင် တစ်ဦးက ကျန်းမာရေးဝန်ထမ်း အင်အား မလုံလောက်မှုကြောင့် ဖြစ်ရကြောင်း သျှမ်းသံတော်ဆင့် ကိုပြောသည်။
“ကျနော်တို့မှာ စေတနာ့ဝန်ထမ်းအားနဲ့ ရှိတဲ့ဆရာဝန်လေး တစ်ယောက်နှစ်ယောက်နဲ့ ကြိုးစားပြီးလုပ်တယ်၊ ဆရာဝန်တွေကလည်း OPT လုပ်နေရင် လူနာတွေဘက်မလှည့်နိုင်တော့ဘူး၊ ပြီးတော့ ရှိတဲ့ နပ့်စ်လေးတွေက လည်း အင်အားမလုံလောက်လို့ပါ၊ ရှင်းရှင်းပြောရရင် ပြည်သူတွေကတော့ နွေးထွေးမှုနဲ့ ဂရုစိုက်မှု အပြည့်အဝ လိုချင်တာပေါ့၊ ဒါပေမယ့် ကျနော်တို့ဘက်ကလည်း မတတ်နိုင်လို့ စိတ်မကောင်းပါဘူး” ဟုသီပေါမြို့မှ ပရဟိတအသင်းဝင်တစ်ဦးက သျှမ်းသံတော်ဆင့်ကို ပြောသည်။
လက်ရှိတွင် သီပေါမြို့နယ် အတွင်း ကိုဗစ် – ၁၉ ကူးစက်ရောဂါပိုး ပျံနှံ့မှု တတိယလှိုင်းမှ အတည်ပြု ပိုးတွေ့ လူနာ စုစုပေါင်း ၃၀၀ ကျော်ရှိနေပြီး၊ ဆေးဆိုင် မှ အပ တခြားဆိုင်းများ ပိတ်ထားရကြောင်း သိရသည်။
Leave a Comments