သျှမ်းတောင် မိုင်းကိုင်မြို့နယ် အတွင်း ရောက်ရှိနေသည့် စစ်ရှောင် (၃၀၀၀)ကျော် အတွက် နေရာထိုင်ခင်း အခက်အခဲများရှိနေသည် ဟု စုံစမ်းသိရသည်။
သျှမ်းတပ်(၂)တပ် လက်နက်ကြီး ပစ်ခတ်မှုကြောင့် ပြည်သူ(၃၀၀၀) ကျော်သည် မိုင်းကိုင်မြို့ သို့ စစ်ဘေးရှောင်လာကြပြီး၊ မိုးကာဖြင် ဘေးပတ်လည် ကာရံကာ နေထိုင်နေရသဖြင့် မိုးရွာသွန်းပါက အခက်အခဲများစွာဖြစ်နိုင်ကြောင်း စစ်ရှောင်များကို ကူညီပေးနေသည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“ သူတို့က မိုးကားနဲ့ပဲနေကြတာ။ တစ်ချို့ ထော်လာဂျီပေါ် မိုးကားနဲ့ ပတ်လည်ပိတ်ပြီးတော့ အိပ်ကြတာ။ မိုးရွာရင် အခက်ခဲရှိတာပေါ့။ သူတို့အတွက် မိုးကာတွေ လုံလောက်မှုမရှိဘူး။ အဲ့ဒါတော့ အခက်ခဲဖြစ်နေတယ်” ဟု မိုင်ကိုင်မြို့နယ် စစ်ရှောင်များကူညီပေးနေသည့် အမျိုးသားက ပြောသည်။
ထိုအပြင် စစ်ရှောင်များအထဲတွင် ကျန်းမားရေးမကောင်းသူများ၊ သက်ကြီးရွယ်အိုများ၊ ကလေးသူငယ်များ ပါရှိသောအတွက်ကြောင့် မိုးရွာပါက ကျန်းမားရေးများကို ထိခိုက်လာနိုင်ကြောင်း စစ်ရှောင်ကူညီသူများက ပြောသည်။
“ ခုတလောမိုးမရွာတာကံကောင်းတယ်။ စစ်ရှောင်ထဲမှာ လေဖြတ်တဲ့သူတွေလဲပါတယ်။ အသက်ကြီးတဲ့သူကော၊ ခလေးတွေကောပါနေတယ်။ ပြီးတော့ အခုက ကိုဗစ် ကာလလဲဖြစ်တယ်ဆိုတော့ တစ်ခုခုဖြစ်ရင် စိုးရိမ်းရတယ်လေ။” ဟု အထက်ပါ ပုဂ္ဂိုလ်က ပြောသည်။
သျှမ်းတပ် ၂ တပ်တိုက်ပွဲကြောင့် မိုင်းကိုင်မြို့နယ် မိုင်းခွန်ကျေးရွာအုပ်စု တစ်ခုလုံး ထွက်ပြေးတိမ်းရှောင်ခဲ့ရကြောင်း သိရသည်။
မိုင်းကိုင်မြို့နယ် စစ်ဘေးရှောင်များကို ဝမ်ဟွေ့လုံကျေးရွာအုပ်စုအတွင်း ဝမ်လျန့်ဘုန်းကြီးကျောင်း၊ ဝမ်ဟွေ့ဘုန်းကြီးကျောင်း ၊ နောင်လီဘုန်းကြီးကျောင်း ၊ ကုန်နမ့်မော်၊ ဝမ်းမုန်မုန့် နှင့် စာသင်ကျောင်းတွင် ထားရှိကြောင်း သိရသည်။
ကျေးသီးမြို့နယ် လွိုင်ဟွန့်တောင်ကြော တိုက်ပွဲများ ရပ်တန့်သွားသော်လည်း လက်ရှိတွင် မိုင်းကိုင်မြို့နယ် ဝမ်းဖွီဖက်တွင် တိုက်ပွဲဆက်ဖြစ်ပွားနေလျက်ရှိကြောင်းသိရသည်။
ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း သျှမ်းပြည်နယ်တွင် တိုင်းရင်းသားလက်နက်ကိုင် အချင်းချင်း မကြာခဏ တိုက်ပွဲဖြစ်ပွားလျက်ရှိခဲ့သည်။
ထိုအပြင် သျှမ်းတပ် ၂ တပ် ဖြစ်သည့် RCSS/SSA နှင့် SSPP/SSA တို့သည် (၄) နေရာတိုက်ပွဲဖြစ်ပွားခဲ့ပြီး ၎င်းတိုမှာ သီပေါမြို့နယ်၊ ကျောက်မဲမြို့နယ်၊ ကျေးသီးမြို့နယ် နှင့် မိုင်းကိုင်မြို့နယ် တွင် တိုက်ပွဲများဖြစ်ပွားခဲ့သည်။
Leave a Comments