သျှမ်းပြည်မြောက်ပိုင်း လားရှိုးမြို့တွင် Stay At Home ကာလအတွင်း ခရီးသွားများမည်သည့် ထောက်ခံစာဖြင့် ဝင၊်ထွက် သွားလာခွင့်မပြုကြောင်း စုံစမ်းသိရသည်။

သျှမ်းပြည်နယ်တွင် ကိုဗစ်-၁၉ ကူးစက်မှုနှုန်းမြင့်တက်နေသည့် (၆)မြို့နယ် ကို Stay at Home အဖြစ်ကြေညာခဲ့ပြီး ထိုထဲတွင် လားရှိုးမြို့ အပါအဝင်ဖြစ်ပြီး၊ Stay at Home ကာလအတွင်းမည်သည့် ထောက်ခံစာဖြင့် ဝင်၊ထွက် သွားလာခွင့်မပြုကြောင်း သတင်းရရှိသည်။

“လားရှိုးမြို့ကို Stay At Home မှာ အကျုံးဝင်တယ်လို့ ကြေညာချက်ထုတ်ထားလို့ အခုဆို လားရှိုးမြို့တွင်း ကနေ မြို့ပြင်ကိုထွက်သွားပြီးရင် ဘယ်ထောက်ခံစာတွေပဲ ပါပါ ပြန်ဝင်လာဖို့ လက်မခံတော့ဘူး၊ လားရှိုးမြို့ ပြင်က လူတွေကိုလည်း မြို့ထဲဝင်ဖို့ ဘယ်လိုထောက်ခံစာနဲ့မှ လက်မခံတော့ပါဘူး” ဟုလားရှိုးမြို့နေ ဦးသောင်းလွင် က သျှမ်းသံတော်ဆင့်ကို ပြောသည်။

ယနေ့ ဇူလိုင်လ ၁၄ ရက်နေ့မှ စတင်ပြီး ကုန်တင်ယာဉ်မောင်းများနှင့် ယာဉ်နောက်လိုက်များ အားလုံးသည် လားရှိုးမြို့သို့ လာရောက်မည်ဆိုပါက ကိုဗစ် – ၁၉ ကူးစက်ကာကွယ်ဆေး နှစ်ကြိမ်ထောက်ခံစာ ( သို့မဟုတ်) နောင်ချို့မြို့နယ် ခြေမြစ်ပင် စစ်ဆေးရေးဂိတ်မှ RDT စစ်ဆေးပြီး ကိုဗစ် – ၁၉ ကင်းစင်ကြောင်း ထောက်ခံ ချက် စာရွက်ပါမှသာ ဝင်ရောက်ခွင့်ပြုနိုင်မည် ဖြစ်ကြောင်း သိရသည်။

“ကုန်စည်တင်ပို့တဲ့ ယာဉ်တွေကိုတော့ လားရှိုးမြို့တွင်း နေထိုင်ကြောင်း နဲ့ ကျန်းမာရေးကောင်းမွန်ကြောင်း သက်ဆိုင်ရာရပ်ကွက်က ထုတ်ပေးတဲ့ ထောက်ခံချက်ရှိတဲ့ ယာဉ်မောင်းတွေနဲ့ အချိန်းအပြောင်းလုပ်ပြီး ဝင်ထွက်မောင်းနှင်ဖို့ ခွင့်ပြုထားတယ် လို့သိရပါတယ်၊ အဓိက ခရီးသွားတွေတော့မရဘူး” ဟု ဦးသောင်းလွင်က ပြောသည်။

လက်ရှိတွင် လားရှိုးမြို့တွင်း၌ ကိုဗစ် – ၁၉ ရောဂါ ကူးစက်ခံရသူ အတည်ပြု လူနာ ၈၀၀ နီးပါးရှိနေခဲ့ပြီး ကိုဗစ်တတိယလှိုင်းအတွင်း ကိုဗစ်ကူးစက်မှုများပြားသည့် လားရှိုးမြို့ကဲ့သို့သော လောက်ကိုင်မြို့နယ် နှင့် နောင်ချိုမြို့နယ်၊ မူဆယ်မြို့နယ်၊ သီပေါမြို့နယ်တို့ အပါအဝင် Stay at home သတ်မှတ်ခံရသည့် မြို့နယ်များ သျှမ်းပြည် တွင် (၆) မြို့နယ်အထိရှိလာကြောင်းသိရသည်။