သျှမ်းပြည် တောင်ပိုင်း တောင်ကြီးမြို့၊ မင်္ဂလာဦးရပ်ကွက်တွင် အိမ်စီးကားတစ်စီးကို စစ်ကောင်စီတပ်သားများက လိုက်လံပစ်ခတ်ပြီး ကားပေါ်ပါ ပြည်သူ ၃ ကို ယူဆောင်သွားကြောင်း တောင်ကြီးမြို့ဒေသခံများထံ သိရှိရသည်။
ယနေ့ (ဇူလိုင် ၁၄) ရက် နေ့လည် ၂ နာရီခန့်တွင် မင်္ဂလာဦးရပ်ကွက်မှ ရန်ကြီးအောင်လမ်းအတိုင်း မောင်းနှင်လာသော ကား ၁ စီးကို စစ်ကောင်စီတပ်များက လိုက်လံပစ်ခတ်ခဲ့ပြီး ကားသည် လမ်းဘေးသို ထိုးကျသွးပြီး ကားပေါ်ပါသည့်အရပ်သား(၃)ဦးကို ဖမ်းဆီးခေါ်ဆောင်သွားကြောင်းသိရသည်။
” စစ်ကောင်စီတွေက နောက်ကနေ သေနတ်နဲ့ ထရပ်စပ် လိုက်ပစ်နေတယ်ဆိုတော့ ကားက လမ်းဘေးထိုးကျသွားတယ်၊ ၃ယောက်လုံး သေ သွားပြီလို့လည်း ပြောနေကြတယ်၊ အားလုံးကို စစ်ကောင်စီက ယူသွားပါပြီ” ဟု ကိုယ်တိုင် မြင်တွေ့ ရသူ တောင်ကြီးမြို့ဒေသခံတစ်ဦးက သျှမ်းသံတော်ဆင့်ကိုပြောသည်။
စစ်ကောင်စီတို့ပစ်ခတ်မှုကြောင့် လမ်းဘေးသို့ ကားထိုးကျသွားစဉ်တွင် စစ်ကောင်စီတပ် သားများက အင်အားအများအပြားက ရောက်ရှိလာပြီ အဆိုပါလမ်းကို ပိတ်လိုက်ကြောင်း ၎င်းကပြောသည်။
လက်ရှိတွင် ကားပေါ်ပါ ရှိသည့် ပြည်သူ ၃ ယောက်လုံးကို စစ်ကောင်စီတပ်များက ယူဆောင်သွားကြောင်း နှင့်မည်သည့်အတွက်ကြောင့်ပစ်ခတ်ဖမ်းဆီးရသည်ကို မသိရှိရသေးကြောင်း သိရသည်။
