သျှမ်းပြည်တောင်ပိုင်း သျှမ်းတပ်(၂)တပ် တိုက်ပွဲကြောင့် ထွက်ပြေးလာသည့် စစ်ရှောင်(၃၀၀၀)ကျော်သည့် ယနေ့ချိန်ထိ နေရပ်သို့ မပြန်ရသေးကြောင်း စုံစမ်းသိရသည်။
ဇွန် (၁)ရက်မှ စတင်ကာ သျှမ်းတောင် ကျေးသီးမြို့နယ် အတွင်းရှိ လွယ်ဟွန်းတောင် ကြောတလျောက်တွင် မြေအငြင်းပွားမှုကြောင့် သျှမ်းတပ် (၂)တပ်ဖြစ်သည့် RCSS/SSAနှင့် SSPP/SSA တို့ တိုက်ပွဲဖြစ်ပွားခဲ့သည်။
လက်ရှိ လွယ်ဟွန်းတောင်ကို SSPP/SSA တပ်မှ ပြန်လည် သိမ်းပိုက်နိုင်ခဲ့ပြီး၊ စစ်ဘေးရှောင်များ မိမိနေရပ်ကို ပြန်နိုင်ကြောင်း လည်း SSPP/SSA ပြောခွင့်ရ ဗိုလ်မှူး စိုင်းဖုန်းဟန်က သျှမ်းသံတော်ဆင့်ကို ယမန်နေ့ (ဇူလိုင် ၁၂)ရက်တွင်ဖြေကြားခဲ့သည်။
“ လွယ်ဟွန်းတောင်ကို ကျနော်တို့ ရလိုက်ပါပြီ။ တိုက်ပွဲက ပြီးသွားပြီ၊ စစ်ဘေးရှောင်တဲ့ပြည်သူတွေ နေရပ်ပြန်လိုပါကပြန်နိုင်ပါပြီ။ RCSS ဘက်ကသာ ပြန်လာမတိုက်ရင်တော့ တိုက်ပွဲ့ ကျနော်တို့ဘက် အောင်မြင်စွာ ပြီးဆုံးသွားပါပြီ” ဟု ဗိုလ်မှူး စိုင်းဖုန်းဟန် က ပြောဆိုခဲ့သည်။
သို့သော် ယမန်နေ့ ည အချိန်ထိ လက်နက်ကြီးသံ၊ သေနတ်သံများ ဆက်တိုက် ကြားနေရသဖြင့် စစ်ဘေးရှောင်များ နေရပ်ပြန်ရန် ကြောက်နေကြောင်း၊ ထို့ကြောင့် စစ်ရှောင်များ ယနေ့ချိန်ထိ မပြန်ရဲသေး ကြောင်း ကျေးသီရောက်စစ်ဘေးရှောင် အမျိုးသားတစ်ဦးက သျှမ်းသံတော်ဆင့် ကို ပြောသည်။
“မနေ့က လက်နက်သံတော့ ကြားနေရသေးတယ်လို့ပြောတယ်။ စစ်ရှောင်တွေကတော့ ကြောက်လို့ မပြန်ရဲကြသေးဘူး” ဟု စစ်ရှောင်အမျိုးသား က ဆိုသည်။
ယခုလပိုင်း ကျေးသီးမြို့တွင် ကိုဗစ်-၁၉ ကူးစက်မှုရှိလာသဖြင့် စစ်ရှောင်တချို့ ရောဂါကြောက်ကာ နေရပ်ပြန်သွားသည့် သူများရှိကြောင်းသိရသည်။
ထိုနည်းတူ မိုင်းကိုင်မြို့နယ် ဝမ်ဟွေ့လုံကျေးရွာအုပ်စုအတွင်းရောက်ရှိနေသည့် စစ်ရှောင်(၇၀၀)ကျော်လည်း လက်နက်ကြီးသံ ကြားနေရသဖြင့် နေရပ်သို့ မပြန်နိုင်သေးကြောင်း သတင်းရရှိသည်။
“လက်ရှိ စစ်ရှောင်စာရင်းက မတိုးမလျော့သေးပါ။ လွယ်ဟွန်းနဲ့ နီးတဲ့ ရွာတွေက ဇူလိုင် (၁၁) ရက်နေ့ညက လက်နက်ကြီးသံ တညလုံးကြားရတယ်။ အခုထိ မပြန်ရဲသေးဘူးဧ ဟု စစ်ရှောင်များကို သွားရောက် ကူညီပေးနေသူ တစ်ဦး က သျှမ်းသံတော်ဆင့် ကိုပြောသည်။
လွယ်ဟွန်းတောင်ကို အကြောင်းပြပြီး တလကျော်ကြာတိုက်ပွဲဖြစ်ပွားခဲ့သည့် သျှမ်းတပ် (၂)တပ်ကြောင့် အရပ်သား (၂)ဦး ကျည်ထိမှန်ခဲ့ပြီး၊ စစ်ဘေးရှောင် (၃၇၀၀)ကျော် ထွက်ပြေးတိမ်းရှောင်ခဲ့ရသည်။
သျှမ်းတပ်(၂)တပ် တိုက်ပွဲရပ်တန့်ရေးအတွက် သံဃာတော်များ၊ ပြည်သူများက အကြိမ်ကြိမ်တောင်းဆို ခဲ့သော်လည်း သျှမ်းတပ်(၂)တပ်မှ နားထောင်ခဲ့ခြင်းမရှိခဲ့ပေ။
