သျှမ်းပြည် တောင်ပိုင်း ပင်လုံမြို့ကိုဗစ်-၁၉ ကူးစက်မှု (၁၅) ဦးထိရှိနေသော်လည်း လောင်းကစားနှင့် KTVဆိုင်များ ဆက်လက်ဖွင့်လှစ်နေဆဲ ဟု ဒေသခံများ ပြောပြချက် အရသိရသည်။
ပင်လုံမြို့တွင် စစ်အာဏာသိမ်းပြီးနောက်ပိုင်း လောင်းကစားရုံနှင့် KTV များပြန်ဖွင့်လာခဲ့ပြီး ကိုဗစ် ၁၉ တတိယလှိုင်းတွင် ည်း ဆိုင်များကိုပိတ်သိမ်းထားခြင်းမရှိကြောင်းသိရသည်။
“ ပင်လုံမှာ ကိုဗစ် ကူးများလာတာက လောင်းကစားတို့ ကနေ ကူးလာတာများတယ်။ KTVတွေကနေကောပဲ။ ညညဆိုဖွင့်ထားတယ်။ မပိတ်ဘူး။ အဲကနေလည်းပြန့်နိုင်တယ်” ဟု ပင်လုံမြို့ ဒေသခံအမျိုးသားတစ်ဦးက သျှမ်းသံတော်ဆင့် ကို ပြောသည်။
ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း လောင်းကစားများ နှင့် KTV တို့ကို ပြန်လည်ဖွင့်လှစ်လာခဲ့ပြီး ပြည်သူများ ပိတ်ရန်တောင်းဆိုသော်လည်း မပိတ်ခဲ့ပေ။
ဆက်လက်ပြီး ယခုချိန်သည် ကိုဗစ် ၁၉ ရောဂါပြန့်ပွားမှုများလာသောကြောင့် ပြည်သူများအနေဖြင့် တစ်မြို့လုံးကူးမှာကို စိုးရိမ်နေရကြောင်း ပင်လုံမြို့ ဒေသခံများက ဆိုသည်။
“ ကျနော်မြို့ကသေးတယ်။ တစ်မြို့လုံးကူးမှာကို စိုးရိမ်ရတယ်။ အရင်က အရပ်သားအစိုးရလက်ထက်ဆိုရင် ပေးမဖွင့်လို့ ကျနော်တို့မြို့မှာ ကိုဗစ် မရှိဘူး။ အခုကသွားပြောလို့လည်း မရဘူး။ သူတို့က စစ်ကောင်စီနဲ့လုပ်စားနေကြတယ်” ဟု အထက်ပါ အမျိုးသားက ပြောသည်။
ပင်လုံမြို့တွင် ယမန့်နေ့ ဇူလိုင် ၁၂ ရက်နေ့ထိ ကိုဗစ် ၁၉ ပိုးတွေ့လူနာ စုစုပေါင်း (၁၅) ဦးရှိပြီး ထို(၁၅) သည် လောင်းကစားမှ အများဆုံးကူးလာသည့် သူများဖြစ်ကြောင်း သိရသည်။
