သျှမ်းပြည် မြောက်ပိုင်း ကျောက်မဲမြို့နယ်၊ လွယ်အန်တင်း ကျေးရွာ အုပ်စု ကောင်းခါးကျေးရွာအနီး တောင်ယာလုပ်နေသည့် အမျိုးသမီး နှစ်ဦး မိုင်းနင်းမိကာ တစ်ဦး သေဆုံးပြီး တစ်ဦးက ပြင်းထန်စွာ ဒဏ်ရာများ ရရှိခဲ့ကြောင်း စုံစမ်းသိရသည်။
ဖြစ်စဉ်မှာ ဇူလိုင်လ (၇) ရက်နေ့ နေ့လည် ၁၂ ဝန်းကျင်တွင် ကောင်းခါးကျေးရွာအနီးတွင် တောင်ယာ လုပ်ပြီး နေ့လည်ထမင်းစားရန် အိမ်ပြန် လာသည့် အမျိုးသမီး (၂) ဦးသည် မြေမြုပ်မိုင်းနင်းမိကာ အသက် (၄၀)ကျော် အရွယ်ရှိ ဒေါ်အေးပိန် သေဆုံးခဲ့ပြီး၊ အသက် (၅၀)အရွယ်ရှိ ဒေါ်အေးမိန်သည် ဒဏ်ရာပြင်းထန်စွာရရှိကြောင်း ကျောက်မဲမြို့နယ် အဖြူရောင် ကမ်းလက်များ ပရဟိတ အသင်းက သျှမ်းသံတော်ဆင့်ကို ပြောသည်။
“ တောင်ယာသွားခဲ့ပြီး နေ့လည်စာ ထမင်းစားအပြန် ရွာအနောက်ဖက်က တောင်ကုန်းမှာ မြုပ်ထားတဲ့ မိုင်းနင်းမိပြီး ပေါက်ကွဲမှု ဖြစ်တယ်၊ တစ်ဦးကတော့ ဒဏ်ရာတွေ ပြင်းထန်လွန်းလို့ အိမ်အရောက်မှာ အသက်ဆုံးသွားတယ်၊ နောက်တယောက် ကတော့ ကျောက်မဲ ပြည်သူ့ဆေးရုံမှာ ဆေးကုသမှု ခံယူနေ ပါတယ်” ဟု ကျောက်မဲမြို့ အဖြူရောင်ကမ်းလက်များ လူမှုကူညီရေးအသင်းမှ အဖွဲ့ဝင် တစ်ဦးက သျှမ်းသံတော်ဆင့်ကို ပြောသည်။
အဆိုပါ မိုင်းပေါက်ကွဲမှုကြောင့် ဒေါ်အေးပိန်သည် ဒဏ်ရာများ ပြင်းထန်စွာ ရရှိပြီး နေအိမ်သို့ပြန်အရောက်တွင် သေဆုံးသွားခဲ့ကာ အတူသွားသည့် ဒေါ်အေးမိန်သည်လည်း ယာဘက် ခြေသလုံး၊ ပေါင်၊ တင်ပါးနှင့် ဝဲဘက်ပေါင်၊ ခါးဖက်နှင့် လက်မောင်း နေရာအချို့တို့တွင် ပြင်းထန်သော ဒဏ်ရာများရရှိသောကြောင့် ကျောက်မဲခရိုင် ပြည်သူ့ဆေးရုံမှာ တက်ရောက်ဆေးကုသမှု ခံယူနေ ကြောင်း သိရသည်။
ကျောက်မဲမြို့နယ်၊ လွယ်အန်တင်း ကျေးရွာအနီးတစ်ဝိုက်တွင် SSPP/SSA ၊ TNLA အဖွဲ့နှင့် RCSS အဖွဲ့ တို့သည် တိုက်ပွဲများ မကြခဏ ဖြစ်ပွားခဲ့သည့်အတွက် ၎င်းဒေသတစ်ဝိုက်မှ ကျေးရွာများအားလုံးသည် ရွာလုံးကျွတ်နီးပါး ကျောက်မဲမြို့သို့ စစ်ဘေးတိမ်းရှောင်လာခဲ့ကြရပြီး လက်ရှိအချိန်ထိ မပြန်နိုင်သေး သည့် စစ်ဘေးရှောင် ပြည်သူများလည်း များစွာ ရှိကြောင်း သိရသည်။
