သျှမ်းမြောက် ကျောက်မဲခရိုင်အတွင်း ဇူလိုင် ၇ ရက်(ယနေ့) မနက်ပိုင်းအထိ ကိုဗစ်ရောဂါ ကူးစက်ခံရသည့်လူနာ (၅၅၃)ယောက်ရှိပြီး ထိုထဲတွင် ကိုဗစ်-၁၉ ကာကွယ်ဆေးထိုးထားသည့် သူများပါဝင်ကြောင်း စုံစမ်းသိရသည်။
ကျောက်မဲခရိုင်အတွင်းမှာပါဝင်သည့် ကျောက်မြို့တွင် (၉၇)ဦး၊ သီပေါ (၁၄၆)ဦး၊ နောင်ချို (၂၉၈)ဦးနှင့် နမ္မတူ (၁၂)ဦးတို့ရှိပြီး မိုင်းလုံ ၊ နမ့်ဆန် နှင့် မန်တုံမြို့များတွင် ကိုဗစ်ကူးစက်မှုအနေအထား မည်မျှရှိသည်ကို မသိရသေးပါ။
ကိုဗစ်ရောဂါကူးစက်ခံရခြင်းကြောင့် သေဆုံးသူများမှာ ကျောက်မဲတွင် (၂)ဦး၊ သီပေါ (၅)ဦး၊ နောင်ချို (၂)ဦးနှင့် နမ္မတူ (၁)ဦးတို့ဖြစ်သည်။ ယနေ့မနက်တွင် ကျောက်မဲမြို့ ရပ်ကွက် (၈)မှ ကိုဗစ်လက္ခဏာဖြင့် အမျိုးသမီးတစ်ဦး သေဆုံးသွားပြီး မွန်းလွှဲပိုင်းတွင် သီပေါမြို့မှ အသက်(၆၀)ဝန်းကျင်ရှိ ကိုဗစ်အတည်ပြုလူနာ (၁)ဦး ထပ်မံသေဆုံးသွားကြောင်း သိရသည်။
“ရောဂါကူးစက်ခံရတဲ့သူတွေထဲမှာ ကာကွယ်ဆေးထိုးထားတဲ့သူတွေလဲ ပါတယ်၊ အသိထဲကတစ်ယောက် အနံ့ပျောက်လို့ ဆေးသွားစစ်တယ် (p)ထွက်တယ် Q Center မှာ နေရတယ်။ သူပြောပြတာဆိုရင် ဆေးလည်း မတိုက်ဘူး၊ နေရထိုင်ရတာလည်း အဆင်မပြေဘူး၊” ကျောက်မဲမြို့ မှ ဒေသခံတစ်ဦးက သျှမ်းသံတော်ဆင့်ကိုပြောသည်။
လက်ရှိကိုဗစ်-၁၉ ကူးစက်ခံရသူများလာသဖြင့် ကျောက်မဲမြို့ဒေသခံများက စိုးရိမ်မှုများစွာနှင့်နေထိုင်နေရကြောင်း၊ လက်ရှိမှာ အာမခံချက်မရှိသည့်အတွက် စိတ်ပူရကြောင်းလည်း ၎င်းက ဆိုသည်။
ကျောက်မဲမြို့တွင် ကိုဗစ်လက္ခဏာဖြစ်ပြီး ရုတ်တရက် သေဆုံးသွားသည့် သူများရှိကြသလို အသက်ရှူကျပ်ပြီး သေဆုံးသူများလည်းရှိကြောင်း ကျောက်မဲမြို့မှ ပရဟိတ လုပ်ဆောင်နေသည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“ တစ်ချို့သေဆုံးပြီးတဲ့သူတွေဟာ ကိုဗစ်လက္ခဏာဖြစ်ပေမယ့် ကိုဗစ်ပိုး ရှိ မရှိ သေချာစစ်ဆေးပေးတာတွေ မရှိဘူး။ အဲ့တော့ ပြည်သူတွေအနေနဲ့ အပြင်ထွက်ရင် Mask တပ်၊ လက်ကို သေချာဆေးဖို့ လိုတယ်၊” ဟု ကျောက်မဲမြို့မှ ပရဟိတလုပ်ငန်းတွင် ပါဝင်လှုပ်ဆောင်နေသူ တစ်ဦးက သျှမ်းသံတော်ဆင့်ကို ပြောသည်။
လက်ရှိ ကိုဗစ်-၁၉ ကူးစက်မှုမြင့်တက်နေချိန် ကိုဗစ်ကာကွယ်ရေး အသုံးအဆောင်ပစ္စည်းတွေလည်း ဈေးတက်လာကြောင်းလည်း ကျောက်မဲဒေသခံများ ပြောပြချက် အရသိရသည်။
သီပေါမြို့တွင် ပရဟိတကူညီဆောင်ရွက်ပေးနေသူ (၁) ဦး အပါအဝင် ယနေ့တွင် ကိုဗစ်အတည်ပြုလူနာ ၁၉ ဦး ထပ်မံတွေ့ရှိခဲ့ရပြီး အတည်ပြုလူနာနှင့် ထိတွေ့သူများကို ထားရှိရန် ရေဟော်ဘုန်းတော်ကြီးသင် စာသင်ကျောင်းကိုလည်း Quarantine Center အဖြစ် အသုံးပြုသွားမည်ဖြစ်ကြောင်း သိရသည်။
သျှမ်းပြည်တွင် ယနေ့မနက်ပိုင်းအချိန်ထိ ကိုဗစ် – ၁၉ ရောဂါ ကူးစက်ခံရသူ (၂၄၁၀)ဝန်းကျင်ရှိနေပြီး သေဆုံးသူ (၅၀)ဝန်းကျင်ရှိနေပြီဖြစ်ကြောင်း သိရသည်။
Leave a Comments