သျှမ်းပြည်တောင်ပိုင်း ညောင်ရွှေမြို့နယ် အင်းလေးဒေသတွင် ကိုဗစ် – ၁၉ ရောဂါ ကူးစက်ခံရသူ ပိုမိုများပြားလာပြီး Quarantine Center ထပ်မံဖွင့်လှစ်ရန် လိုအပ်နေကြောင်း စုံစမ်းသိရသည်။
“ကိုဗစ်အတည်ပြုလူနာတွေကို ညောင်ရွှေပြည်သူ့ဆေးရုံ၊ စံကားပြည်သူ့ဆေးရုံ၊ နန်းပန်ပြည်သူ့ဆေးရုံနဲ့ ဟဲယာရွာမတိုက်နယ်ပြည်သူ့ဆေးရုံတွေမှာ ဆေးကုသပေးနေတယ်၊ ထိတွေ့တဲ့သူတွေအတွက် Q Center ထပ်လိုနေသေးတယ်” လို့ အင်းလေးဒေသမှ ဆရာဝန်တစ်ဦးက ပြောသည်။
ဇူလိုင် ၆ ရက်(ယနေ့) အင်းလေးဒေသ ဟဲယာရွာမတွင် ကိုဗစ်အတည်ပြုလူနာ ၁၃ ဦး နှင့် နန်းပန်ပြည်သူ့ဆေးရုံတွင် ကိုဗစ်အတည်ပြုလူနာ ၄ ဦး ထပ်မံတွေ့ရှိခဲ့ရသည့်အတွက် အတည်ပြုလူနာ စုစုပေါင်း (၁၇)ဦး တွေ့ရှိခဲ့ကြောင်း သိရသည်။
“ရွာမှာ Q ဝင်နေတာ ၃၀ ကျော်လောက်ရှိတယ်။ ဟဲယာရွာမ Q Center က လူပြည့်သွားလို့ ဒီမနက်ပဲ နောက်ထပ်တစ်နေရာမှာ ဖွင့်ဖို့ ပြင်ဆင်နေတယ်။ အဲ့မှာက လူ (၂၀)လောက်တော့ ဆံ့မယ်” လို့ ဟဲယာရွာမ Covid – 19 Center ပြင်ပကူညီရေးအဖွဲ့ ဥက္ကဌ ဦးလွင်ကို က သျှမ်းသံတော်ဆင့်ကို ပြောသည်။
အင်းလေးဒေသပါဝင်သည့် ညောင်ရွှေမြို့နယ်တွင် ဇွန်လ (၂၃)ရက်နေ့မှ ယနေ့မွန်းလွဲပိုင်းအထိ ကိုဗစ် အတည်ပြုလူနာ စုစုပေါင်း(၈၄)ဦးရှိပြီး (၂)ဦးသေဆုံးကာ (၂)ဦး ဆေးရုံမှဆင်းခွင့်ရပြီးဖြစ်ကြောင်း စုံစမ်းသိရှိရသည်။
