သျှမ်းပြည် တောင်ပိုင်း ပင်လုံမြို့တွင် မီတာခမဆောင်သည့် အိမ်များကို စစ်ကောင်စီ လက်အောက်ခံ လျှပ်စစ်ရုံးမှ မီတာဘောက် လာရောက်ဖြုတ်ကာ မီးဖြတ်လိုက်ကြောင်း စုံစမ်းသိရသည်။
အဆိုပါ ဇူလိုင် ၂ ရက်နေ့တွင် ပင်လုံမြို့ပေါ်ရှိ ပြည်သူများကို မီတာခ လာဆောင်ရန် မဆောင်ပါက မီတာဘောက်ဖြုတ်မည် ဟု ခြိမ်းခြောက်မှုများပြုလုပ်ကာ တချို့ နေအိမ်မှား မီးမီတာဘောက်ဖြုတ်လိုက်ကြောင်း ပင်လုံမြို့ဒေသခံတစ်ဦးက သျှမ်းသံတော်ဆင့် ကို ပြောသည်။
“ သူတို့ကျနော်တို့က မီတာခသွားဆောင်ခိုင်းတာ။ မဆောင်ရင် အိမ်ထိ မီးသုံးခွင့်ကို လာပိတ်ပစ်မယ်လို့ပြောတယ်။ ဒီလထဲမှာဘဲ မြို့သစ်မှာ မီတာခ မဆောင်လို့ဆိုပြီး သူတို့ မီတာပေါက်လာဖြုတ်ပစ်တယ်။” ဟု ပင်လုံမြို့အမျိုးသား ဒေသခံတစ်ဦးကပြောသည်။
ဖေဖော်ဝါရီ ၁ ရက်နေ့ စစ်အာဏာသိမ်းယူပြီးနောက်ပိုင်း ပြည်သူများအနေဖြင့် စစ်အာဏာရှင်ဆန့်ကျင်ရေးအနေဖြင့် အခွန်မဆောင်ခြင်းအနေဖြင့် ဆန္ဒထုတ်ဖော်ခဲ့ကြသည်။
သို့သော် စစ်ကောင်စီဖက်မှ ဇူလိုင်လ အတွင်းမီတာခများကို ဆောင်ခိုင်းခဲ့ကြောင်း၊ ပြည်သူများ အနေဖြင့် မီးမရရှိပါက အခက်ခဲများစွာရှိလာသောကြောင့် မီတာခဆောင်ခဲ့ရသူများလည်းရှိကြောင်း ပင်လုံဒေသခံ အမျိုးသားတစ်ဦးက ပြောသည်.
“ ကျနော်တို့လဲ မတက်နိုင်ဘူးလေ။ မထည့်ရင်လဲ သူတို့က မီးလာပိတ်ပစ်မယ်။ မီးပိတ်ရင်လဲ ကျနော်တို့အတွက်က ခက်ခဲတယ်လေ။ မီတာခသွားဆောင်တော့လည်း ကျနော်တို့ သူတို့ကို ထောက်ခံသလိုဖြစ်နေအုံးမယ်။” ဟု ဒေသခံတစ်ဦးကပြောသည်။
ပင်လုံမြို့တွင် မီတာဘောက် စုစုပေါင်း( ၇၀၀၀) ကျော်ရှိပြီး မီတာမဆောင်သည့် မီတာဘောက် (၂၀၀) ကျော်ကျန်ရှိ ကြောင်း သိရသည်။
၂၀၂၀ ခုနစ် ကိုဗစ် ၁၉ ကာလတွင် အမျိုးသားဒီမိုကရေစီ အဖွဲ့ချုပ် NLD အစိုးရမှ ပြည်သူများ စားဝတ်နေရေးခက်ခဲ သောကြောင့် အခွန်များကို ဖြေလျော့ပေးခဲ့ကြောင်းသိရသည်။
ဖေဖော်ဝါရီ ၁ ရက်နေ့ စစ်အာဏာသိမ်းပြီးနောက်ပိုင်း ပြည်သူများ စစ်အာဏာရှင်ကို အလိုမရှိကြောင်း နည်းမျိူးစုံဖြင့် ဆန္ဒပြခဲ့ပြီး အခွန်မဆောင်ခြင်းဖြင့်လည်း စစ်အာဏာကို ဆန့်ကျင်ခဲ့ကြသည်။
Leave a Comments