သျှမ်းပြည် အရှေ့ပိုင်း တာချီလိတ်မြို့တွင် ကိုဗစ်-၁၉ တတိယလှိုင်းဖြစ်ပွားပြီး ပိုးကူးစက်မှုနှုန်းမြန်ဆန်နေသော်လည်း KTV၊ နှင့် လောင်းကစားရုံများဆက်လက် ခိုးဖွင့်နေကြောင်း စုံစမ်းသိရသည်။
စစ်ကောင်စီ တက်လာပြီးနောက်ပိုင်း တာချီလိတ်မြို့တွင် KTV၊ နိုက်ကလပ် နှင့် လောင်းကစားရုံများကို ပြန်လည်ဖွင့်လှစ်လာခဲ့ပြီး၊ ယခု ကိုဗစ်-၁၉ လှိုင်းဖြစ်ပွားချိန်ပြန်ပိတ်ခိုင်းထားသော်လည်း ဆက်လက်ခိုးဖွင့်နေကြောင်း တာချီလိတ်ဒေသခံများက သျှမ်းသံတော်ဆင့် ကို သတင်းပေးပို့လာသည်။
“ဂိမ်းဆိုင်တွေ လောင်းကစားဒိုင်တွေက ဆက်ပြီး ဖွင့်နေတာပဲ၊ ကိုဗစ်တွေများလွန်းလို့ ပိတ်ထားခိုင်းတယ် လို့တော့ အာဏာပိုင် တွေတော့ ပြောကြတယ်၊ ဒါပေမယ့် ဒီအချိန်ထိတော့ ဖွင့်တဲ့သူက ဖွင့်နေသေးတာပဲ” ဟု တာချီလိတ်မြို့ခံ အသက် ၃၀ကျော် အမျိုးသားတစ်ဦးက ပြောသည်။
တာချီလိတ်မြို့ ဝမ်ကောင်းရပ်ကွက်၊ ဟိုတယ်တာချီလိတ်အတွင်း ဖွင့်လှစ်ထားသည့် DAT Club & KTV မှ ကိုဗစ်ပိုး ကူးစက်ခံရသူ ၁၅ဦးရှိကြောင်းသိရသည်။
တာချီလိတ်မြို့တွင် ပြီးခဲ့သည့်ရက်ပိုင်းက အွန်လိုင်းလောင်းကစားဂိမ်းလုပ်ငန်းမှ အမျိုးသမီး ၃ ဦးတွင် COVID-19 ရောဂါပိုး စတွေ့ခဲ့ပြီး ယမန်နေ့က ၁၃ ဦး ယနေ့ (ဇူလိုင် ၂)ရက် မွန်းလွဲပိုင်းအထိ ၁၇ ဦး ထပ်တွေ့ရာ ဒေသတွင်း ကူးစက်သူ (၃၃) ဦး ရှိလာသည်။
ယခင်ကလည်း ကိုဗစ်-၁၉ ဒုတိလှိုင်းအချိန်တွင် တာချီလိတ်မြို့တွင် ကိုဗစ်-၁၉ ကာလအတွင်း KTV၊နိုက်ကလပ် နှင့် လောင်းကစားနေရာများကို ပိတ်ထားရန် ညွှန်ကြားချက်သော်လည်း ချိုးဖောက်သည့် 1G1 7 မှဟိုတယ်ကြောင့် ကိုဗစ်အများအပြားကူးစက်မှု ကြုံခဲ့ရသည်။
စစ်ကောင်စီမှ နိုင်ငံတော် အာဏာသိမ်းပြီးနောက်ပိုင်း တာချီလိတ်မြို့တွင် တရားမဝင် လုပ်ငန်းများအားလုံး ပေါ်ပေါ်တင်တင် ပြန်လည်ဖွင့်လှစ် လုပ်ကိုင်လာကြပြီး အမိန့်အာဏာများလည်း သက် ရောက်မှု အားနည်းကြောင်း တာချီလိတ်မြို့မှ ဒေသခံတစ်ဦးက သျှမ်းသံတော်ဆင့်ကို ပြောသည်။
“စစ်တပ်က အာဏာသိမ်းပြီးကတည်းက တစ်မြို့လုံးရှုတ်ယှက်ခတ်နေတာ၊ တရားဥပေဒစိုးမိုးရေးလည်း မရှိတော့ပါဘူး၊ အမိန့်အာဏာတွေကလည်း သက်ရောက်မှု အားနည်းနေပါတယ်” ဟု အထက်ပါ ပုဂ္ဂိုလ် ကပြောသည်။
တာချီလိတ်မြို့သည် တရားမဝင် လုပ်ငန်းများစွာ ပေါ်တင်ပြုလုပ်နေသည့်အတွက် ကိုဗစ်-၁၉ ကူးစက်မှု မြင့်တက်လာမည်ကို ဒေသခံများက စိုးရိမ်နေကြသည်။
