သျှမ်းပြည် မြောက်ပိုင်း လာရှိုးမြို့တွင် ကိုဗစ်- ၁၉ ကူးစက်မှု များလာသောကြောင့် အပြင်ထွက် ဈေးဝယ်ရန်အတွက် သက်ဆိုင်ရာရပ်ကွက်အုပ်ချုပ်ရေးရုံးတွင် ထောက်ခံစာပြုလုပ်နေရကြောင်း စုံစမ်းသိရှိရသည်။
လာရှိုးမြို့တွင် ယနေ့ ဇွန် ၃၀ ရက်နေ့မှ စတင်ပြီး သက်ဆိုင်ရာ ရပ်ကွက်အုပ်ချုပ်ရေးရုံးတွင် အိမ်ပြင်ထွက်ရန် အတွက် ထောက်ခံစာသွားရောက်ထုတ်ယူရကြောင်းသိရသည်။
အဆိုပါ ထောက်ခံစာသည် ဈေးဝယ်ရန်၊ ဆေးခန်းပြရန်အတွက်သာဖြစ်ပြီး တစ်ခြားကိစ္စဖြင့် အပြင်ထွက် မရကြောင်း လာရှိုးမြို့ ရပ်ကွက် (၆) နေ အမျိုးသားတစ်ဦးက သျှမ်းသံတော်ဆင့်ကိုပြောသည်။
“ ထောက်ခံစာကို တစ်အိမ်ကို တစ်ယောက်အတွက်ပဲလုပ်ပေးတယ်။ အပြင်ထွက်ဈေးဝယ်ဖို့ အတွက်ပဲရတယ်။ အလုပ်သွားလုပ်လို့ဖို့ ထောက်ခံစာက မလုပ်ပေးဘူး။ အလုပ်တွေအကုန်ရပ်ထားရတယ်။ ကျနော်တို့ စားဝတ်နေရေး အတွက် အရမ်းကိုခက်ခဲလာတယ်” ဟု လာရှိုးမြို့ ရပ်ကွက် (၆)နေ အမျိုးသားတစ်ဦး ကပြောသည်။
အဆိုပါ ရပ်ကွက်ရုံးတွင် ထောက်ခံစာများကို သွားစောင့်ယူနေရသောကြောင့် ကိုဗစ်-၁၉ ကို ပိုပြီးပြန့်စေကြောင်း ပြည်သူများက သုံသပ်ပြောဆိုသည်။
“ သူတို့အခု ထောက်ခံစာတွေသွားယူခိုင်းတာ။ သွားစောင့်ရတယ်လေ။ ပြီးတော့လူများတယ်။ ဒီလိုလုပ်ယူရတာက ပိုးကို ပိုကူးစေတယ်လို့မြင်တယ်။” ဟု ထောက်ခံစာသွားထုတ်ယူသည့် ဒေသခံတစ်ဦးက ဆိုသည်။
လာရှိုးမြို့တွင် ဇွန်လအတွင်း ကိုဗစ် ၁၉ ပိုးတွေ့လူနာ (၄၀၀) ကျော်ထိရှိလာပြီး၊ သျှမ်းပြည် မြောက်ပိုင်း တွင် ဇွန်လ အတွင်း ကိုဗစ်- ၁၉ ကူးစက်မှု တစ်ထောင် ထိရှိလာကြောင်း သိရသည်။
Leave a Comments