သျှမ်းပြည်နယ် အတွင်း မူးယစ်ဆေးဝါး သတင်းပေးသူများအတွက် လုံခြုံရေး အထူး လိုအပ်ကြောင်း၊ မူးယစ်ဆေးဝါး ရောင်းဝယ်ဖောက်ကားသူများသည် လက်နက်များရှိနေသည့်အတွက် စိုးရိမ်စရာများစွာရှိကြောင်း သျှမ်းပြည်နယ် လားရှိုးခရိုင် အမျိုးသားလွှတ်တော်ကိုယ်စားလှယ် စိုင်းဝမ်းလှိုင်းခမ်းက ပြောသည်။

“ တိုင်းရင်းသားဒေသတွေမှာ အလုပ်မဖြစ်ဘူးလို့ ကျနော် ထင်တယ်။ တိုင်ကြားဖို့ဆိုတာ သတင်း အတိအကျ သိရှိပြီးမှ တိုင်ဖို့က မလွယ်တဲ့ကိစ္စ။ နောက် မူးယစ်ဆေးဝါး ရောင်းဝယ်ဖောက်ကားတဲ့ လူတွေက လည်း သူတို့ဒီတိုင်း ရိုးရိုးနဲ့ ရောင်းဝယ်နေကြတာ မဟုတ်ဘူး။ သူတို့ က ငွေရေး ကြေးရေး လက်နက်တွေနဲ့ဆိုတော့ တိုင်ကြားတဲ့ သူအတွက် စိုးရိမ်စရာဖြစ်ပါတယ်” ဟု စိုင်းဝမ်းလှိုင်းခမ်း ကဆိုသည်။

မူးယစ်ဆေးဝါး ထုတ်လုပ်မှု၊ ရောင်းဝယ် ဖောက်ကားမှု များကို လုံခြုံစွာ သတင်းပေးပို့တိုင်ကြားနိုင်မည့် “ မူးယစ်ဆေးဝါး အထူးသတင်းတိုင်ကြားရေး ဌာန” ကို နိုင်ငံတော် သမ္မတ ရုံးတွင် ဖွဲ့စည်းထားပြီး ဖြစ်ကြောင်း ၊ မူးယစ်ဆေးဝါးနှင့်ပတ်သက်ပြီး ဆက်သွယ်တိုင်ကြားသူများ၏ လုံခြုံရေး ၊သတင်းအချက်မပေါက်ကြား ရေး အတွက် လုံခြုံမှု အဆင့် အတန်း သတ်မှတ်ဆောင်ရွက် သည့် လုပ်ထုံးလုပ်နည်း ချမှတ်ထားကြောင်း နိုင်ငံတော် သမ္မတ ဦးဝင်းမြင့် က ဇွန် လ ၂၆ ရက်နေ့က နေပြည်တော်၌ ကျင်းပသည့် အပြည်ပြည်ဆိုင်ရာ မူးယစ်ဆေးဝါး အလွဲသုံးမှုနှင့် တရားမဝင် ရောင်းဝယ်မှု တိုက်ဖျက်ရေးနေ့ အခမ်းအနားတွင် နိုင်ငံတော် သမ္မတဦးဝင်းမြင့်က မိန့်ခွန်းတွင်ထည့်သွင်း ပြောဆိုခဲ့သည်။

ထို့အပြင် မူးယစ်ဆေး ရောင်းဝယ်ဖောက်ကားသူများ၏ တရားမဝင် ပိုင်ဆိုင်မှုများကို သတင်း ပေး တိုင်ကြားသူ လက်ရဖမ်းဆီးသူ နှင့် နိုင်ငံတော် အစိုးရ သင့်တင့်သော အချိုးအစားဖြင့် ခွဲဝေပေးမည် ဖြစ်ပြီး သတင်းပေးတိုင်ကြားသူ ၏ လုံခြုံရေး အတွက် သတင်းထုတ်ပြန်မည် မဟုတ်သလို နိုင်ငံတော် ၏ချီးမြှင့် ငွေဖြစ်သည့် အတွက် အခွန် ကင်းလွှတ်ခွင့်ပေး မည်ဟုလည်း ထည့်သွင်း ပြောကြားခဲ့သည်။

အဆိုပါ “ မူးယစ်ဆေးဝါး အထူး သတင်းတိုင်ကြားရေး ဌာန” သည် တိုင်းရင်းသားနယ်မြေများ အတွက် အလုပ်ဖြစ်မလားဆိုတာ မေးခွန်းထုတ်စရာ ဖြစ်နေကြောင်း၊ လက်ရှိမှာ သျှမ်းပြည် မြောက်ပိုင်း အဝေးပြေးလမ်းမပေါ်တွင် နေ့စဉ် ပစ်ခတ်ကာလူသေမှုများတွေ့နေရကြောင်း စိုင်းဝမ်းလှိုင်းခမ်း က ထပ်လောင်းပြောသည်။

မူးယစ်ဆေးဝါးကုန်သည်များ၊ ရောင်းဝယ်ဖောက်ကားသူများ ကို တိုင်ကြားပါက သမ္မတ အနေဖြင့် မည်ကဲ့သို့ အရေးယူမည်ကို စိတ်ဝင်စားကြောင်း၊ နိုင်ငံတော်သမ္မတ ပြောသည့် စကားကို အောက်ခြေမှ အလုပ်မလုပ်လည်း သမ္မတ အနေဖြင့် မည်ကဲ့သို့ တုန့်ပြန်မည်ကို လည်း စိတ်ဝင်စားကြောင်း သျှမ်းပြည်နယ် မူးယစ်ဆေးဝါး လှုပ်ရှားနေသည့် လူငယ်များက ပြောသည်။

ဆက်လက်ပြီး မူစယ်မြို့ မူးယစ်ဆေးဝါး တိုက်ဖျက်ရေး အဖွဲ့မှ စိုင်းခမ်း က “ တိုင် ရင် လည်း ဘယ်လောက်ထိ အရေးယူမလဲ။ နောက်တိုင်ကြားတဲ့သူတွေရဲ့ လုံခြံုရေး ကို ဘယ်လောက်ထိ ကာကွယ်ပေးမလဲ ဆိုတာ မေးခွန်းထုတ်စရာဖြစ်ပါတယ်” လို့ပြောသည်။

တရုတ်နယ်စပ် မူစယ်မြို့တွင် မူးယစ်ဆေးဝါးရောင်းသည့် သူများပြားပြီး၊ နေရာ အနှ့ံ မူးယစ်ဆေးဝါးရောင်းနေသည်ကို ရဲတပ်ဖွဲ့မှ သိရှိသော်လည်း ဖမ်းဆီးခြင်းမရှိကြောင်း စိုင်းခမ်းက ပြောသည်။

“သတင်းပေးတဲ့ သူတွေ ရဲ့ လုံခြုံရေးကရှိသေးတယ်လေ။ ကျနော်တို့ မူဆယ်မှာ ပြည်သူတွေကိုတောင် လုံခြံုရေး မပေးနိုင်တာ။ မူးယစ်ဆေး ရောင်းဝယ်တဲ့ သတင်းပေးမယ့်သူတွေ အတွက် ဘယ်လို လုံခြံုရေး ပေးနိုင်မလဲ” လို့ စိုင်းခမ်း က ဆိုသည်။

ဆက်လက်ပြီး စိုင်းခမ်း က “ ဂိမ်းဆိုင်တွေမှာဆိုရင်လည်း ဆေးပြားတွေက ရနေတာပဲ။ ဒါတွေက ပေါ်တင်ရောင်းနေတာ ရဲတွေလည်း သိနေတာပဲ။ ဖမ်းမှ မဖမ်းတာ” ဟုလည်း ထပ်လောင်းပြောသည်။

မူးစယ်မြို့ မူးယစ်ဆေးဝါးရောင်းဝယ်ဖောက်ကားသူ များသည် ပြည်သူ့စစ် အဖွဲ့များနှင့် ချိတ်ဆက်ထားသဖြင့် ဖမ်းဆီးရဖို့ ခက်ခဲကြောင်း၊မူးယစ်ဆေးလုပ်ကိုင်သူအများစုတွင် လက်နက်ကိုင်များကြောင်းလည်း မူဆယ်ဒေသခံများက ဆိုသည်။

မူးယစ်ဆေးဝါး တားဆီး ကာကွယ်နှိမ်နှင်းရေး လုပ်ငန်း အဆင့်ဆင့်တွင် ပြည်သူများ၏ ပါဝင်မှုကို မြှင့်တင်နိုင်ရန် ဆုငွေ ချီးမြှင့်ရေး အစီအစဉ်များ၊ အကာအကွယ်ပေးရေး အစီအမံများ၊ သတင်း အချက်အလက် လုံခြုံရေး စနစ်များကို အရှိန် အဟုန် မြှင့်တင်ပြီး ဆောင်ရွက်နေသည်ဟု သမ္မတ ဦးဝင်းမြင့် က ပြောသည်။

မူးယစ်ဆေးဝါးကြောင့် လူ့အဖွဲ့အစည်း တရပ်လုံး တဖြည်းဖြည်းချင်း ဝါးမျိုးပြီး လူငယ်များကို အညွှန့်ချို့နေကြောင်း၊ နိုင်ငံရဲ့ ဂုဏ်သိက္ခာ နှင့် အနာဂတ် ကိုလည်း တစစီ နင်းချေနေကြောင်းလည်း သမ္မတ ဦးဝင်းမြင့် မိန့်ခွန်းတွင် ပြောဆိုခဲ့သည်။

၂၀၁၇ ခုနစ် နှင့် ၂၀၁၈ ခုနစ် အတွင်းဖမ်းဆီး ရမိသည့် မူးယစ်ဆေးဝါး အမှုပေါင်း ၁၃၆၄၀ ရှိကြောင်း သိရသည်။