သျှမ်းပြည် တောင်ပိုင်း ၊ ကလောမြို့နယ်၊ ရေယားဂိတ်၌ ကြံ့ခိုင်ရေးနှင့်ဖွံ့ဖြိုးရေးပါတီ (ကြံခိုင်ရေးပါတီ) မှတည်ထောင်ထားသည့် လူမှုကူညီရေးအသင်းယာဉ်ပေါ်မှ ဘိန်းဖြူများဖမ်းဆီးရမိခဲ့ပြီး စစ်ကောင်စီမှ သတင်းကို ဖုံးကွယ်ရန် ကြိုးစားနေကြာင်းသိရသည်။

ဇွန် ၂၄ရက် ညနေပိုင်းတွင် သျှမ်းတောင် နမ့်စန်မြို့နယ်၊ ကြံ့ခိုင်ရေးပါတီမှ တည်ထောင် ထားသည့် တောင်တန်းလူငယ် လူမှုကူညီရေးအသင်း၏ ယာဉ်ပေါ်မှတစ်ထုပ်လျှင်(၁)ကီလိုပါ ဘိန်းဖြူ(၁၀)ထုပ်ကို ဖမ်းဆီးရမိခဲ့ခြင်းဖြစ်ကြောင်း သိရသည်။

ထို့ ကြံ့ခိုင်ရေး လူမှုရေးအသင်း ပေါ် မူးယစ်ဆေးဝါးဖမ်းဆီးရမည့်သည့် သတင်းကို ဖုံးကွယ်ပေးရန် စစ်ကောင်စီ အုပ်စု က ဌာနဆိုင်ရာ ရဲစခန်း ကို ညွှန်ကြားထားကြောင်း သတင်းရရှိသည်။

“ယာဉ်မောင်းပဲပါတယ်၊ သူလည်းထွက်ပြေးသွားတယ်၊ ညတွင်းချင်း သတင်းပိတ် ထားတာ ဘယ်သူမှ မသိကြဘူး၊သတင်းဖုံးကွယ်ပေးဖို့ စစ်ကောင်စီက ညွှန်ကြားထားတယ်လို့ ကြားတယ်၊ အသင်းဝင်တွေအားလုံးက ကြံ့ခိုင်ရေးပါတီဝင်ပဲ”ဟု နမ့်စန်မြို့ရဲစခန်းနှင့် နီးစပ်သည့် ဒေသခံတစ်ဦးကပြောသည်။

အဆိုပါ ဖမ်းဆီးရမိသည့်ယာဉ်ကို ယင်းစစ် ဆေးရေးဂိတ်တွင် သိမ်းဆည်းထားပြီး အမှုဖြစ်စဉ်ကို ကလောရဲစခန်းမှ နမ့်စန်ရဲစခန်းသို့ အကြောင်းကြားချက်အရ သိရခြင်းဖြစ်ကြောင်း နီးစပ်သူများက ပြောသည်။

ယခင်ကလည်း အသင်းပိုင်ယာဉ်ဖြင့် သစ်များကို တရားမဝင် တင်ဆောင်ခဲ့ခြင်းကြောင့် ဒေသခံများက တိုင်ကြားခဲ့ဖူးပြီး သက်ဆိုင်ရာက အမှုပိတ်သိမ်းပေးခဲ့ဖူးကြောင်း ဒေသခံများထံမှ စုံစမ်းသိရှိရသည်။

မြန်မာနိုင်ငံ၌ ကိုဗစ်-၁၉ ဖြစ်ပွားမှုကို အခွင့်ကောင်းယူပြီး တရားမဝင်မူးယစ်ဆေးထုတ်လုပ်မှုကို တိုးချဲ့နေသည်ဟုယမန်နေ့ဇွန်လ(၂၆)ရက်နေ့ အပြည်ပြည်ဆိုင်ရာ မူးယစ်ဆေးဝါး အလွဲသုံးမှုနှင့် တရားမဝင် ရောင်းဝယ်မှု တိုက်ဖျက်ရေးနေ့တွင် ကုလသမဂ္ဂ မူးယစ်ဆေးဝါးနှင့် ပြစ်မှုဆိုင်ရာရုံးက ထုတ်ပြန်ခဲ့သည်။

ထို့ပြင် စစ်အာဏာသိမ်းမှုကြောင့်ဖြစ်ပေါ်လာသည့် မတည်ငြိမ်မှုမှာလည်း ထိရောက်သည့် ရဲတပ်ဖွဲ့လုပ်ငန်းဆောင်တာနှင့် နယ်စပ်စီမံခန့်ခွဲရေးအခြေအနေကို ပိုမိုဆိုးရွားစေသည်ဟု ထုတ်ပြန်ချက်တွင် ရေးသားဖော်ပြထားသည်။